El teritorio de Veronela el comprende oltre al comune anca le frassioni S.Gregorio e Miega con un poche de località Giavon, Desmontà, Opi, Caseta da le origini antiche. Ne la zona de Sabionara l'è stà catado durante i scavi del 1989 un çentro abitado de l'età del bronso. Arente a l'ex-lagheto de Canaviera a Desmontà gh'era una necropoli e numarosi reperti archeologici del secolo X-IX a.C. conservadi al Museo de Cologna Veneta. Tra i più importanti da segnalar una cùbia de schinieri del sec. X a.C. Altre testimonianse de l'età preistorica jè la torbiera dei Gradenighi a sud-est de Veronela che la s'à formada in epoca Quaternaria e un castelier a Opi (Oppi) del neolitico 'ndoe in epoca romana ghe passava l'antica Via Imperial o Porciliana che da San Martin Bon Albergo la finìa a Este. In epoca preistorica l'Adese el passava par Desmontà-Veronela-Sabion deviando verso Albaredo-Legnago dopo la famosa "Rotta della Cucca" del 589 d.C. Prima parò de 'nar avanti analisemo el termine Cucca. No l'è altro che l'antico nome de Veronela fin al Regio Decreto del 23 genàr 1902 trasformado nel toponimo atual grassie a un alterassion de "Verona". Podemo dir anca che i romani i s'à fermà in questo teritorio come i ne dimostra i bei reperti scoerti, come i quarei, anfore, urne e luçernete. Verso l'ano mile un poche de tere longo l'Alpon jè passade dai franchi e longobardi a laici o religiosi. Intorno a la capela de S.Apolinar a Sabionara s'à formà nel XII-XIII sec. d.C. l'antico comun de Cavalpone "Caput Alponis" e un fraco de tereni a sinistra de l'Alpon i passa in man dei monasteri de S.Fermo Minor e Santa Maria in Organo de Verona oltre a feudatari come i nobili Cressenzi e San Bonifacio. A l'inissio del 1300 i vilai de Cucca, Miega, San Gregorio e Bonaldo i deventa piasè importanti dal ponto de 'ista giuridico e urbanistico. Nel 1307 Federico de la Scala e col tempo la Fatoria Scaligera le ciapa el control. Antonio de la Scala el regala nel 1382 a Cortesia Marassi di Serego la Cuca e Miega mentre l'antico feudo de San Donato-San Gregorio l'è passà da la césa vesentina ai feudatari Lavagnoli. Soto la Serenissima grassie a la bona volontà de le fameje patrisie venesiane e veronesi, se scomincia a bonificar e disboscar el teritorio, somenandoghe çereali e vigneti. Nel 1600 se scomincia a coltivar el riso e la canapa deventando una vera e propia fonte de guadagno par Venesia. Dal 1797 i se alterna i domini francese e austriaco fin a l'unità d'Italia. Uno dei monumenti simbolo del paese l'è la famosa "Cucheta" (lat. coccum=nocciola) o "corte granda" 'ndoe ghe passà du imperadori Massimilian I nel 1509 e Carlo V nel 1532. Questa costrussion col tempo l'è stà trasformada da fortessa con relative tori a palasso e modificada da Andrea Palladio (1564-70) con la zonta de le barchesse. Tra le Vile da segnalar, in via Marconi, la classica vila Serego del 1870 con un bel parco, Vila Lavagnoli a San Gregorio costruida nel '700 che secondo tradission l'à ospitado Napoleone Bonaparte dopo la bataja de Arcole del 17 noembre 1796. Tra le cése, da segnalar quela de San Gioani Batista (diocesi vesentina) deventà parochia nel 1388, ricostruida più 'olte, la conserva ancora numarose opere: el batesimo de Gesù (Melchiorre Galluzzi, 1586), l'Anunciasion (secXVI), S. Roco e altri Santi (Antonio Dal Bianco, 1782), Madona con Butin (copia otoçentesca de un bassorilievo del Victoria & Albert Museum de Londra, atribuido a Desiderio da Settignano, sec.XV), la Vasca del batistero (1485), un poche de statue (S. Pancrazio, S. Rocco, S. Domenico, la Vergine), de Alessandro Vittoria (1524-1608); la césa de S.Gregorio (diocesi vesentina) del XIII secolo con magnifiche tele; quela de Sant'Antonio Abate a Miega de la fine del XV secolo con opere d'arte del XVII secolo; par finir l'oratorio de la Beata Vergine del Carmine a Giavon.