El paese de Vestenanova el cata a la fine de la Val d'Alpon e confina in parte con la provincia de Vicensa con coltivassioni de patate e numerosi pascoli ne la parte alta del teritorio e de ua ne la parte bassa. El çentro abitado el se presenta come un mucio condensà de case iluminade dal sol e dominade da l'imponente césa parochial de San Leonardo costruida tra el 1849 e 'l 1853 su disegno de l'abate Gottardi come nel caso de le cése de Casaleon, Roncà e Ferara de Monte Baldo. Al so interno podemo amirar una pala del Ceschini (1583-1649) dissepolo del pitor Alessandro Turchi, rafigurante i Santi Roco e Bastian. Quasi in contemporanea con la so costrussion jè stà ricostruide anca quele de le frassioni de Bolca nel 1860, Castelvero nel 1856 e Vestenanova tra el 1863 e 'l 1874. In questo teritorio l'è presente la césa romanica de Sant' Antonio Abate tra le più antiche de la val e situada sul col viçin al çentro abitado. In questa zona jè presenti i 'basalti colonari', un fenomeno natural de origine lavica molto difuso da ste parti come anca i fossili, basta pensar a la viçina Bolca. Propio in questa località la Fameja Cerato da oltre çinque secoli, nel più importante giacimento fossilifero del mondo conossudo come "Pesciara", continua a scoerzar novi reperti archeologici de notevole importansa storica. Tra i più bei segnalemo el Cocodrilus vicentinus, l'unico esemplar completo de la so specie, tri fantastiçi péssi Angelo conossudi anca come Eopletax papilio. Da visitar assolutamente l'è el Museo dei Fossili de Bolca 'ndoe podemo catar i reperti fossili de la sopracitada "Pesciara" con didascalie, disegni e ricostrussioni che spiega i fenomeni de la zona de 50 milioni de ani fa come l'avelenamento natural dele aque del mar che le querzea la zona. Dal punto de vista storico, le località de Castelvero, Vestenavecia, Vestenanoa e Bolca anticamente jera autonome. Infati "Castrum Vetus" (dal latin castel antico) ne indica el logo 'ndoe l'è stà costruida una forificasion o castrum. Nel 1145 questo toponimo risulta éssar atestado a causa de problemi tra el prior del monastero de San Mauro de Saline e i Canonici de Badia Calavena, par la giurisdision su la césa dedicata a San Salvator. Durante el periodo dei scaligeri, i proprietari terieri del logo iera i Mezzagonnella che presso el monte Castelar i avea costruido el so castel. Durante el periodo de la Serenissima el teritorio l'è passà soto la giurisdision de la fameja nobile veronese dei Da Campo che za' nel 1478 i risulta averghe un abitasion e una capela con relativo capelan da mantegnér, sgravadi da questo onore, grassie a l'assegnassion de la quarta parte de la decima a cura de Francesco q.Cristofaro Da Campo. Se parla de l'esistensa de Vestenavecia in un documento del 1145 ma la so orgine etimologica sembrarìa derivar da un nome de persona Vestinus, successivamente volgarisado in Vestena. Risulta anca, che dal 9 lujo 1414, sia Vestenavecia che Vestenanova i era passade soto la giurisdision de la nobile fameja venesiana dei Emo che longo la strada par Bolca l'avea costruido una serie de edifici rusteghi. Questo l'è stà uno dei motivi che l'a contribuido a lo svilupo de Vestenanoa e la so progressiva autonomia dal' originario nucleo de Vestenavecia, avegnuda con dificoltà par una serie de problemi su la riscossion de le deçime. Queste do località le fasea parte del Vicariado de la Montagna soto la giurisdission de la çità de Verona. A Vestenanova i era sta fabricade de le case denominade "vile", 'ndoe 'desso gh'è el çentro del paese, ma el comune l'era costituido anca da contrade sparse par el teritorio. Dei documenti i ne dise che i abitanti de Vestenanova a cause de le tasse massa alte, i era andà dal Consilio dei Savi e dal doge Marino Grimani che con decreto del 24 genar 1604 jà disposto la ridusion fiscal. Nel 1630 a causa de la peste, el paese l'a perso la metà dei so abitanti za in completa miseria. "Bubulka cum Vulpiana" inveçe l'era una "vila" apartegnuda zà dal X secolo a un convento de eremiti agostiniani dipendenti da Badia Calavena, anca se sora al Monte Purga, per motivi difensivi, l'era stà costruido un castel, de proprietà dei Mezzagonnella. Nel 1410 passo' sotto il dominio di Venezia come comune indipendente e faceva parte del vicariato di Tregnago. Nel XVI sec. a causa de scontri tra Venesiani e imperiali, questi loghi jè stà popoladi da persone inçerca de rifugio, tanto che Bolca podea contar quasi 450 abitanti. La prima notissia sui fossili de Bolca l'è databile 1555. Bona parte dei tereni coltivabili i era passadi in man a le Reverende Suore de Sant'Antonio del Convento de Verona e de la nobile fameja Verita' a cui bisognava pagar 'l livel. A la fine del '700, la contrada de Cracchi l'è deventà importante in quanto l'era deventà sede notaril de Antonio Cracco e successivamente del fiol Piero. Nel 1785 el comune de Bolca le riussido a deventar autonomo da Tregnago, grassie al riconossimento de vicariado. L'economia local, l'era conçentrada principalmente su l'alevamento bovin e la lavorasione del legno.