Comun de la Bassa Veronese a 16 chilometri in diression sud-ovest da Verona, con le frassioni Forete e Isolalta. L'omo a Igasi l'è presente fin da l'antichità come pol dimostrarne i resti de 'na necropoli in località Campagna Magra de popolassioni çeltiche vegnude a vivar da 'ste parti, che le fasea riferimento a la cultura de La Tene (III sec. a.C.); oltre a le tombe jè stà scoerte anca spade, armi, vasi e utensili. Su l'origine del nome i nostri storiçi i g'à varie versioni, gh'è ci dise che possa derivar da Vicus Athesis, vilajo su l'Adese, ipotesi scartà parché el fiume no l'à mai traversà el teritorio de Igasi anca se documenti dal XI° al XIII° secolo i ciama 'sto comun Aderis, Adhecis, Athesis, Vicoatesi e Vigaxio nel 1209; piassé probabile la seconda version, Vicus Attii, çità dei Atti, nome de la gens romana con a capo un çerto Attus presente anca ne la vissina Castel d'Assan "Aciano". E propio nel periodo roman se vede scrito el nome Tartaro, fiume che'l traversa el teritorio comunal, ne le "Historie" del poeta latin Tacito 'ndoe vien parlà de "paludes Tartari fluminis". Come avemo capido, l'origine de Igasi l'e sicuramente romana e a quei tempi, l'era posissionà su la strada consolar che la corea de fianco a la Via Postumia, importante via de comunicassion del nord Italia. El primo ducumento scrito su Igasi l'è del 926, un ato de vendita 'ndoe vien nominà un çerto Ariverto de Dragimperto originario de "Vicus Aderis". Ma le prime testimonianse scrite, sicure, jè del 21 majo 1014 quando l'imperador Enrico II l'avea concesso a l'Abassia de San Zen la zona de Igasi restà ai Benedetini fin al 1221. Cossita in 'sto periodo i frati i s'à fato su le maneghe e jà scomincià 'na granda opera de bonifica de le zone impaludé 'ndoe se podea catàr i famosi "gambari" mentre a laoro ultimado jè stà piantà fruta e verdura come nel caso de la "rava"; nel stema comunal infati catemo sia el gambaro che la rava. Nel 1164 l'imperador Federico Barbarossa l'è vegnù in Italia nel tentativo de contrastar l'autonomia e 'el podér dei comuni, che nei ani l'era aumentà dando vita propio in quel'ano a la famosa Lega Veronese; cossita Barbarossa dopo essarse fermà a Vacaldo ('na corte longo la strada che da Igasi la porta a Castel d'Assan) el s'à scontrà con la Lega Veronese e dopo aver perso l'è scapà verso la Lombardia. Nel 1226 l'è stà costituido ufisialmente el Comun de Igasi con tanto de statuto, con a capo un "Decano" con a fianco dei consijeri e l'aministrador "Massaro", oltre al "Saltaro" che'l regolava el sfrutamento de boschi e pascoli. Nel 1232 del paese no gh'è restà gnente dopo le incursioni dei mantoani che par secoli jà lotà contro i veronesi; particolar importansa g'avea in quela ocasion la roca posissionà a difesa del fiume Tartaro butà zò nel 1442 par paura che la cascasse ne le mane del nemigo. Dopo i periodi Scaligero, Visconteo e Cararese, Igasi l'era al çentro de importanti comerçi e sede de un prestigioso Vicariato soto la Republica Venessiana, ( inissialmente nel periodo de la Serenissima fasea parte del Vicariato de Cà Campagna). Nel periodo Venessian no gh'è stà particolari avenimenti, come anca nel resto de la provincia Veronese a parte la peste del 1630 o qualche passajo de soldà. Soto Venessia l'è stà sistemà la rete idrica, ben disboscà e bonificà le paludi e le tere piene de gramegna, mentre a Igasi se podea contar ben oto pile par la laorassion del riso che le se movea grassie ai corsi d'aqua usadi par l'irigassion dei campi de propietà de le asiende che g'avea tereni e le coltivàa el riso; al dì de ancò, un pochi de paroni de fondi agricoli i g'à ancora i antichi diriti par irigar i so campi. Non podemo desmentegarse che i era stà piantà i morari par i cavaleri e grassie ai numarosi pascoli, l'industria de la lana l'era deventà un importante fonte de guadagno. Dopo la fine de la Republica Venessiana jè rivà Napoleon e i Austriaçi, Igasi dopo aver superà le guere del risorgimento l'è deventà Italiana nel 1866. Tra le cése da segnalar la parochial dedicà a San Zen e ricordà in un documento del 1014 da l'imperador Enrico II. De la vecia costrussion gh'è restà el campanil del XIV secolo e un fonte batesimal del 1473; rifata ne l'800 l'è stà sostituida nei ani '60 da la noa césa. 'Pena fora a Igasi podemo 'edar el Santuario de la Madona de Campagna Magra del XVII secolo, costruido con probabilità dopo la peste del 1630. 'Stà località la catemo insieme col scomparso Lago de Vacaldo ne le carte del XVI secolo, 'ndoe la vien ciamà Campagna Grassa forse a causa del disboscamento che l'à fato destinar la zona al pascolo, sbassando de conseguensa el livel de produssion agricola. A Isolalta la césa parochial originaria del XV secolo conserva afreschi del '500. Tra le Vile da segnalàr Vila la Zambonina in stil baroco del XVIII secolo, con grandi sale decorade, statue e un bel giardin a l'italiana che l'è stà propietà prima dei Giusti e dopo dei Portalupi. A Forete da ricordar Vila Malaspina in stil veneto mentre a Isolalta catemo el complesso rustego con colombara de la Vila Carnesali. Tra i personagi famosi da ricordar el musicista Italo Montemezzi nato a Igasi nel 1872.