Comun de la Bassa Veronese al confin con la provincia de Rovigo con le do frassioni piassé importanti Spinimbeco e Carpi, l'è posissionà longo la riva de sanca del corso de l'Adese. El teritorio l'è abità fin da la preistoria come pol testimoniar le 38 tombe messe su du piani, catade in Cà Franzine Noe nel 1968 de l' Età del Bronso; sepoltura fata con la "tecnica mista", quei cremadi i vegnea messi ne le urne funerarie mentre i altri i vegnea sepelidi completi de coredo. Interessante el vilaio scoerto in località Fabrica dei Soci e anca el novo sito archeologico a Cà Lovara de Spinimbeco. Probabile anca la presensa Etrusca, mentre 'na vila rustega in località Venesia Nova, tochi de fortificasioni, de mosaici e de la strada consolar "Aemilia Altinate" nel teritorio, pol testimoniar 'na forte presensa romana. Par ci volesse 'edar 'ste interessanti scoerte el pol far 'na visita al museo Fioroni de Legnago. Svilupada a l'epoca, l'era la lavorassion dei quarei con fornase bele alte come quela a Spinimbeco ciamada "Q.Orestis". Soto l'Impero Roman el teritorio quertà da boschi e paludi l'era stà bonificado in modo massìsso ma nel 589 d.C. a causa de la piena de l'Adese che l'à provocado la famosa "Rotta della Cucca" (toponimo de Veronela) e spostà verso sud el corso de l'Adese, l'è andà a farse ciavar. Tuto l'è deventà 'na palude, scancelando abitasioni e la via Emilia Altinate, a parte un toco de tera ricevudo da Berengario e Adalberto nel 961 'ndoe verso la fine del X secolo, i s'à stabilido i Benedetini de l'Abazia de Vangadiza; grassie ai monaci la zona l'à scomincià a rinàssar, con numarose opere ne bonifica. Nel 1405 soto la Republica Venessiana la frassion Carpi l'è stà consegnà ne le mane del capitan de ventura Luigi da Verme mentre el feudo de Vilabartolomea a Ottobono Terzi come ricompensa par el so impegno ne la conquista de Verona; quando l'è morto el Terzi el Vescovo de Verona l'à ben pensà de far passar le propietà, ne le mane de la diocesi de San Zen ma el Doge el 7 agosto 1413 l'à riconfermà quel dito in precedensa a Ottobono, che non avendoghe fioi in vita, tuti i beni jè finidi al secondo marì de so moier Francesca da Foiano, un çerto Lodovico de Sanbonifacio. Cossita stà potente fameja par piassé de sinquesento ani l'à governà el feudo de Vilabartolomea. In paese a testimoniansa de 'sta nobil casada gh'è la costrussion (ristruturà nel 1935) piassé importante de la zona, 'na palassina arente a l'Adese in stile gotico, con tor quadrangolar romanico-venessiana del XIII secolo. Tra le curiosità da segnalar che el Teatro Social costruido ne la prima guera mondial l'è stà decorà da un çerto Joseph Pikora, un boemo prigioniero de guera; la frassion de San Zen in Val, l'è el çentro abità de la provincia piassé lontan da Verona. Tra le cése da segnalàr quela parochial de Vilabartolomea dedicà a San Bartolomeo Apostolo costruida nel 1855 sui resti de quela de Santa Eurosia a tri navade de la qual che ghe resta solo el campanil; drento podemo 'edar magnifiçi afreschi, de Francesco Barbieri "lo Sfrisato" 'na Madona del Rosario con i Misteri e i SS. Domenico, Francesco e Sebastiano, sensa desmentegarse de la Discesa dello Spirito Santo del Farinati e quel su l'altar major atribuido a vari artisti del calibro de Palma el Zoeno e a Domenico Tintoreto la Madona coi SS. Bartolomeo, Gioani Batista, Antonio e Caterina. Ne la frassion Carpi gh'è la césa dedicà a Santa Margarita, ricordà come parochia dal 1460 e costruida a metà del '800 su disegno de l'architeto Ferrari con fassada a do torete e con el campanil tra i piassé alti de la Bassa Veronese voludo dal paroco Don Quirino Maestrello. A Spinimbeco gh'è la césa parochial dedicà a Santa Maria Assunta, ricordà come parochia dal 1526, costruida ai primi de l '800 sui tochi restà de la vecia césa del '500. A Vilabartolomea in Corso A.Fraccaroli gh'è l'oratorio de Sant'Ana con afreschi e un reliquario con sinquesento reliquie de santi sensa contar de l'urna con drento i ossi de Santa Celestina.