Vilafranca l'è uno dei Comuni de la Provincia Veronese piassé popolà a quasi 20 km in diression sud-ovest da Verona. Da 'na stassion Eneolitica nel teritorio de Vilafranca jè vegnù a la luçe tredese scheletri, un alabarda, un petoral d'argento e 'na sepoltura, che ne pol far capir l'importansa strategica fin da la preistoria de 'sto paese. De epoca romana inveçe l'è 'na scrita su piera dedicà a Tiberio, scoerta nel 1872 a la base de la tor del castel, che la ne fa vegnér a conossensa, tra l'altro, de l'esistensa de un arco costruido longo la Via Postumia, antica strada che nel so percorso verso Verona la traversava Vilafranca. Nel stesso logo jè stà catà anca un poche de monede, mentre un altra scrita ma de tipo funebre, grassie al Cipolla, l'è vegnù a la luçe soto el tabernacolo de l'altar magior de la vecia césa parochial, che la parla de 'na dedica de Lucio Aquilio a so mama e a so bupà. Con tuta probabilità da 'ste parti, ai tempi dei romani, gh'era un campo trincerà nato par difendarse da le invasioni dei cimbri a la fin del II secolo a.C. e tra le ipotesi se pol pensar anca che la gens Probiana, o mejo, i dissendenti de l'Imperator Probio nel III secolo d.C. i fusse vegnù a vivar in quela che 'desso ciamemo Prabiano, conossuda come scrito sui documenti del IX secolo come "Probianum". Alcuni studiosi i dise che, el çentro de Vilafranca in verità come scrito sui registri del '400 e '500 l'era arente al paese, 'ndoe gh'era la çitadina de Civenna o Clavenna, vecio borgo probabilmente de antiche origini che'l serviva ai eserciti par sponsar. Dopo che, l'è cascà l'Impero Roman, se pensa che nel 541 durante la guera gotico-bisantina el s'abia fermà l'esercito bisantin con a capo Marciano prima de assediar la çità. Del periodo Longobardo savemo solo che jè stà catadi pugnai e armi nel vilafranchese mentre del periodo feudal savemo che Vilafranca l'era aministrà sia da la Campagna Veronese e sia da la Iudicaria Gardensis. Nel 1040 i dise che arente a Vilafranca ghe sia stà una bataja persa dai Veronesi contro i Mantoani finida con la deportassion dei prigionieri a Mantoa. Nel 1154 Barbarossa con 4000 soldà el s'à fermà tra Vilafranca e Poejan e unido al Duca de Sassonia l'à nominà i so feudatari. Nel 1164 a Vaccaldo nel teritorio de Vigasi ma arente a Vilafranca, ghe stà la bataja persa dal Barbarossa contro i Comuni, vitoriosi a la fin a Legnano prima de la Pace de Costanza del 1183 che l'à determinà l'autonomia comunal. Cossita Verona par paura che in futuro ghe fusse altre rogne l'à volù aumentar le difese militari e par 'sto motivo s'à 'isto la nassita del borgo de Vilafranca. Con 'na delibera del 9 marso 1185 i "Rettori" de Verona su proposta de Viviano dei Avvocati i avea deciso de realisar un fosso de protession e la fondassion de un novo borgo al limite de la campagna «a far gente per il comune stesso e a difesa contro i Mantovani». El 25 e 26 marso 1186 un console e un procurador i avea consegnà a i omeni de 'sta nova Vilafranca i tereni. A ogni "colono" l'era stà assegnà un "manso" (unità de misura agricola con 33 campi veronesi, composti da 32 «pro laborare» e uno par la casa) sensa desmentegarse che 646 campi i era concessi a Vilafranca in bosco e pascolo par un total de 2088 campi assegnà a 179 mansi (in pratica 179 fameje). Anca se a Vilafranca gh'era stà cavà via tute le tasse la dipendea sempre dal Comun de Verona e par 'sto motivo se ciama cossita, "vila" nel senso de borgo o vilajo e "francus" libaro da le tasse. Inoltre tra le concessioni gh'era anca la possibilità de costruir un posso e de verzar el marcà. Verso la fin del XII secolo l'è scomincià la costrussion del castel sora 'ndoe 'na 'olta gh'era el "castrum", finida de corsa nel 1202 'isto le numarose bataje tra guelfi e ghibelini. Nel 1231 a Vilafranca l'è stà firmà la paçe tra 'ste do fassioni ma Eselin da Roman amigo dei ghibelin nel 1233 l'à tacà fogo al paese e al castel. Nel 1268 el castel l'à ospità i guelfi con Pulcinela da le Carceri e Lodovico Sambonifacio durante i preparativi par l'assalto a Verona contro Mastino de la Scala. Cossita 'na olta deventà Scaligera, Vilafranca al castel gh'è stà zontà 'na tor. Nel 1285 Alberto de la Scala l'avea confermà quel scrito ne l'ato del 1185 e anca se in 'sto periodo ghe stà numarose guera el paese el s'à ben svilupà soratuto con l'atività de le pegore e de la lana. Nel 1337 la zente l'era scapà ne le campagne durante la guera tra i Scaligeri e i Venessiani coi so aleadi; par 'sto motivo Mastino II l'avea fato costruir tra el 1345 e 'l 1353 un murajon che partendo da Valeso e passando da Vilafranca el finiva a Nogarola Roca, conossudo anca come el "Serajo". Costrussion che l'è servida a poco ai Scaligeri, parché nel 1387 i De la Scala i à dovù lassarghe el teritorio veronese a Gian Galeazzo Visconti. Dopo i Visconti e i Carraresi l'è stà el turno, nel 1405 de la Republica de Venessia, e Vilafranca l'era a capo de uno dei Vicariadi con a le dipendense Alpo e Poejan. Nel XV secolo Venessia l'à combatù da 'ste parti contro i Visconti e i Mantoani, come nel 1441, quando i gà butà zò in gran parte el Serajo. Finide le guere el castel l'era deventà rifugio par i ebrei in fuga da Verona e in tuto el teritorio vilafranchese s'à visto un bel svilupo economico. A parte la guera dei Venessiani contro la Lega de Cambray e la "visita" de Carlo V, nel XVI secolo s'à 'isto 'na discreta ripresa economica grassie anca a la produssion de la seda con i "cavaleri" e grassie al Doge de Venessia, che con decreto del 22 febrar 1592, l'à fato partir el marcà setimanal del luni sensa contar numarose concessioni fiscali. E con la certessa economica ghe stà un bel aumento demografico e con abili ingegneri e geometri, l'è stà realisà come ai tempi dei romani, una çitadina ben organisà e ordinada. Nel 1630 par merito dei Lanzichenechi l'è rivà la peste dimesando el numaro de la popolassion, ma par fortuna che, essendoghe l'esension da le tasse, e l'istitussion de un novo marcà al mercoli con gran e fen, l'economia la s'era riciapà. A metà del '700 l'è stà deciso de far un solo marcà setimanal nel giorno de mercoli, presente anca al dì de ancò. Con l'arivo de Napoleon nel 1796, jè finì i i privilegi e Vilafranca l'era entrà a far parte de la Republica Cisalpina nel Dipartimento del Menso. Da dopo el congresso de Vienna fin al 1848 Vilafranca Austriaca la vivea in tranquilità e durante la prima guera de indipendensa l'era stà ocupà da l'esercito piemontese nei giorni de la bataja de Custosa. Nel 1859 la seconda guera de indipendensa l'è finì propio a Vilafranca; Dopo la vitoria a San Martin e Solferin, Napoleon III el s'era messo d'acordo con "Cecco Beppe" arente a la ceséta de San Gioani de la Paja par finir i combatimenti. Cossita l'è rivà el momento del tratado firmà in casa Gandini, consegnando el Veneto a l'Austria. Dopo la III guera de indipendensa nel 1866 Vilafranca l'è deventà Italiana. Tra le cése da segnalar quela parochial dedicà ai Santi Piero e Paolo scomincià nel 1768 sora ai resti de quela vecia nata con la fondassion del borgo; del '400 jè le cése: de San Roco, costruida dopo la peste 'ndoe gh'è la conservà afreschi de la scola del Morone; de San Gioani in Paja arente al "Monumento del Quadrato" costruida par volontà dei cavalieri de San Gioani Gerosolomitano; de la Dissiplina 'ndoe ghe conservà 'na tela del Farinati del '600 e statue del '400 ne la cripta. Arente al castel gh'è la césa dei Francescani de l'800. Del castel ghe restà i muri esterni e quatro tori mentre soto la tor prinçipal gh'è la ceséta del Cristo costruida nel 1708 sui resti de un antica capela, che la conserva 'na Madalena del Brusasorzi e 'na Crocefission del XII su l'altar major. Da ricordar el palasso "Albergo Sole" che durante el dominio venessian l'era la casa del Comune e nel 1859 l'à ospità Carlo Alberto mentre un simbolo de Vilafranca l'è Palasso Gandini-Morelli-Bugna 'ndoe l'è stà firmà la paçe nel 1859.