Comune de la pianura veronese traversà da l'Adese e posissionà a sud-est de Verona, famoso par la coltivassion dei "pomi", el g'à come frassioni Santa Maria, Perzaco, Volon e Bosco. El teritorio l'è stà abità dai romani come i ne dimostra i reperti catadi, tombe, lapidi, monede vasi, scudele e da le popolassioni galiche. Dal ponto de vista toponomastico la prima ipotesi la ne dise de la probabile origine romana de Zevio, infati, tegnendo conto che la letara "d" par corussion fonetica se trasforma in "z" e che 'na 'olta Zevio el vegnea ciamà Devio, podemo risalir a la parola latina "devius" che vol dir fora via. Zevio l'era lontan da la Via Postumia e quindi fora strada, ipotesi che i studiosi i preferisse scartar. Nel corso dei secoli l'è stà ciamà in diverse maniere come ricordà nei documenti: nel 861 se lese la variante "Gebitus"; nel 903 gh'e scrito "in Gebitus locus"; nel 920 catemo "palus zevedana" (palude); ne la bola pontificia del 1145 "plebem geberti"; nel documento del 1184 "bar.gebitum"; jebetum o gebetum lo catemo scrito ne l' Historia langobardorum de Paolo Diacono e podarìa far pensar ai Gebeti o Gepidi, 'na popolassion barbara che nel 566 l'è scapà dal longobardo Re Alboin verso Zevio, 'ndoe i à abità par un poco de tempo par concession, a la fin, del stesso Alboin. 'Sto re l'à sposà Rosmunda fiola del re dei Gepidi, un çerto Gebeto conossudo anca come Cunimondo, famoso parchè Alboin, dopo averlo copà el g'à usà el "cranio", par farghe bear la pora butèla. Zevio l'era uno dei tanti "Pagus Gebetum" sparsi ne la provincia veronese deventà col tempo Gebetum, Tera dei Gepidi. Nel XII secolo i paroni de Zevio i era i Lendinara, amiçi de Federico Barbarossa, che jà dovudo far le sue contro la popolassion zeviana che l'era insorta brusandoghe el castel dopo aver sentido de la sconfita de l'imperador a Legnano. Come ne dise un documento del 1182 grassie a l'aiuto del Vescovo Ognibene, i Lendinara i è riussidi a deventar paroni da novo de Zevio. Nel XIII secolo grandi lote tra Guelfi e Ghibelini; i g'a tacà fogo e messo soto sora el paese nel 1232 mentre 'l castel l'è stà butà zo dai Guelfi mantovani nel 1236. Soto i Scaligeri da 'ste parti jè passà nel 1378 i soldà de Bernabò Visconti in diression Verona su ordine de 'na "Scaligera", che no l'era dacordo su la sucession dei De la Scala. Dopo le Dominassioni Viscontea e Carrarese l'è rivà quela Venessiana nel 1405. In 'sto periodo e par essar precisi nel 1438 dopo le lote tra Venessia e i Visconti, el condotier venessian Federico Sforsa l'à preferido butar zò el castel piutosta che deventasse base par el nemico. A causa de la guera de la Lega de Cambrai contro Venessia el paese nel 1509 l'è stà messo soto sora da novo. Zevio in epoca Venessiana l'era a capo de un Vicariado con soto i paesi de Albaro, Scardevara e Paquara mentre in epoca Austriaca, nel 1818, el distreto el comprendea Isola Rissa, Palù, Opean, Ronco e S.Gioani Lupatoto. Nel 1880 l'è stà inaugurà su l'Adese el ponte caro ai zeviani e batesà col nome del sindaco che l'à volù costruir l'opera, un çerto Antonio Perez. A Zevio, da 'edar gh'è el "castel" che in un documento del 920 l'era de Re Berengario, passà ai Lendinara e nel XVIII trasformà in residensa da la fameja Sagramoso. De la vecia costrussion gh'è restà el ponte levador, le galere e i soteranei, con el val pien de aqua del'Adese. Tra le cése da segnalar la parochial dedicà a San Piero ricostruido nel 1839 su disegno del Giuliari al posto de un tempio del XII secolo, con drento 'na tela de la scola del Brusasorzi e un batistero otagonal del '400 in marmo rosso; la césa de Santa Toscana nel çimitero l'è stà costruida 'ndoe g'avea casa la Santa nel '300; la césa parochial de Santa Maria del 1820 conserva 'na tela de Sante Prunati con rafigurà la "Madona e i Santi"; la césa de San Bartolomeo Apostolo costruida a la fin del XVIII secolo podemo catarla, inveçe, ne la frassion Perzaco; Tra i palassi da segnalàr Palasso Todeschini arente a la césa de Santa Toscana con sale afrescade del '500; Palasso Smania un tempo dei Conti Arrigoni degli Oddi con afreschi del '400. Tra le vile da segnalar la Da Lisca, la Perez, la Bonomi da Monte, la Albertini e la Rivalunga. Tra i personagi famosi da segnalar el grande pitor Altichiero nato a Zevio nel 1320 che l'à afrescà la césa de San Giorgio e quela de Santa 'Nastasia a Verona e Santa Toscana nata da la nobile fameja de' Crescenzi.