Comune a 39 chilometri da Verona, posissionà ne la parte oriental de la provincia veronese. Numarosi reperti de l'età preistorica, del bronso medio e del fero le pol testimoniar de la presensa de l'omo fin da l'antichità. L'origine del primo nucleo abitativo l'è de epoca romana come i ne pol dimostrar i reperti catadi ne le varie località del teritorio, tra queste, contrà Caldamura, 'ndoe jè ritornà a la luçe 'na sepoltura, tochi de mosaici, utensili vari e monede de l'epoca de Costantin, Valentiniano e Adriano mentre de un çerto interesse ne la zona, jè anca i resti de la strada romana che da Cologna la menàva a Vicensa ricordà col nome de "Strà". El toponimo Zimela se pensa che'l possa derivar da la legione romana dei "Gemina" che da ste parti nel 68 d.C. la s'era fermà, come ricordà dal grande studioso roman Tacito o da la presensa ne la zona de un sacel dedicado ai zumei Castore e Polluce o da la fameja Gemina de stirpe Atestina, de sicuro col tempo el nome l'è cambià in Gemella, Jumella, Zomelle, Gimelle, Zomella, Zumilla, Zumella fin a arivar a la forma atual. Dopo un tremendo aluvion e una grossa inondassion con relativa "rotta" a la Cucca (anticamente Veronela) del 589 d.C., l'Adese l'à cambià percorso, spostandose verso sud e lassando Zimela ma creando el Guà, corso d'aqua che passa ancora dal paese e nel teritorio. Dopo i romani e le invasioni barbariche l'è stà la 'olta dei monaci benedetini che i era riussidi a bonificar le so propietà de Zimela e Bagnolo impaludè par i motivi sora indicadi e portando el "Vangelo". I primi documenti che i parla de Zimela jè del 975 quando el Vescovo de Vicensa Ridolfo l'à regalà al monastero de San Feliçe, 'na capela in contrà San Vito. Storicamente la giurisdission del paese la passa dai Vescovi vesentini ne le mane de Alberto dei Conti. Unida ne la storia con Cologna Veneta, dal' IX secolo fin al 1204 l'è stà dominada da la dinastia dei Maltraversi. Subito dopo i se vede i Estensi con Azzo VI che l'à maridà Alisia, ciapandose la dota de "duo milia marcorum" e con sti schei l'à comprà el teritorio de Zimela. El 1212 l'è l'ano del riscato, quando la comunità de Zimela l'è riussida a darse un ordinamento comunal. A l'inissio del '300 Zimela passa soto i Scaligeri (fin al 1387) come 'ne dimostra un documento del 2 febrar 1307 'ndoe Federico de la Scala el concedea a un pochi de abitanti el dirito de sfrutar el teritorio par el pascolo e la legna. In sti ani se continua l'opera de bonifica scomincià ne l'alto medioevo, canalisando canai e controlando le aque con l'aiuto de ciàveghe. Dal 1405 al 1797 Zimela l'è passà soto la Serenissima, che l'à favorido la coltivassion del formento, l'introdussion del riso e dei cavaleri sensa contar che grassie ai laori de bonifica le atività agricole jè ripartide soratuto con la canapa par far soghe. L'ondese setembre 1807, el viceré Eugenio de Beauharnais fiol adotivo de Napoleon, el costituisse la comunità de Zimela che comprendea San Stefano, Volpino e parte de Bonaldo mentre in precedensa Volpino e San Stefano le formava un comune separà. Dopo Napoleon jè arivà i austriaci e Zimela l'à imposto el propio stema: "due Gemelli fasciati in campo roseo superiormente e rosso nella parte inferiore". Nel 1866 quando s'à creà el Regno d'Italia l'è nata 'na discussion tra Zimela e S. Stefano, risolta con un compromesso: el nome del comune l'è stà mantegnudo mentre la residensa municipal l'è andà a a San Stefano. Ai primi del Novecento un regio decreto l'à cambià el stema, che l' è ancora l'atual: "di verde, alla gemella in fascia ondata d'argento". Tra le cése da segnalar quela parochial de Zimela rifata a l'inissio del XX secolo sul logo 'ndoe gh'era un antica pieve ricostruida nel XVI secolo. Dedicada fin al 1140 a San Fioran (S.Floriano) l'è stà consacrà nel 1904 dal Vescovo de Vicensa. De la césa originaria ghe resta una piera ben fissada a l'esterno rafigurante 'na "Crocifission" con ai pié la Madona, Madalena e S.Gioani, opera del X secolo mentre la fasada l'è stà progetada nel 1896. Drento gh'è çinque altari, 'na statua de legno, 'na tela dedicada a Sant'Antonio del pitor Andrea Michieli. A Bonaldo podemo 'edar la césa de S.Apolinar benedeta e inaugurada el 22 noembre 1885 mentre el campanile l'è stà costruido nel 1928. A San Stefano la césa omonima l'è stà costruida nel 1792 su disegno de don Francesco Antonio Ziggiotti, che l'à progetà anca el Domo de Legnago. Su la fassada se pol amirar du festoni, du statue in tufo che le rafigura la "Mater Dolorosa" e "Sanctus Joannis" e due bassorilievi con le sène de la "Samaritana al pozzo" e dell' "Apparizione ai discepoli di Emaus". Sul cornison del timpano ghe tri statue che le rafigura i santi Piero, Stefano e Paolo. Drento, guardando dall'altare maggiore, vi sono i seguenti altari minori. A Volpino la césa de Santa Maria Madalena l'è del siésento. Tra le vile da segnalar a Zimela "Casa de Brunello" in stile sanmicheliano, Vila Cavazzocca arénte l'arzaro de sanca del Guà mentre difronte gh'è Vila Dondio del '700 con un bel parco; a San Stefano vila "La Morosina" del '600, Vila Cornaro e Vila Donà de le Rose del '700 con barchessa, capela e tor colombara; a Volpino Palasso Nievo e Vila Volpi.