L'origine del Carneval de Verona la se perde nela note dei tempi e la se colega forse par analogia in alcuni elementi costitutivi del "Baccanale" a antichissimi riti pagani e al çiclo de Demetra, dea greca dei racolti e dela fertilità che i Romani i vedea in Cerere, antica divinità italica del'agricoltura. Nela sò "Istoria de Verona" el Dal Corte el conta che, in conseguensa dele disastrose inondassioni del'Adese - fra el 1520 e el 1531 - e a causa dele devastassioni dei Lanzi-chenechi todeschi durante la guera tra Carlo V e Francesco I in Lombardia, nela çità de Verona se morea de fame. In quela çircostansa i "pistori" aumentando el costo del pan e non volendo ne farlo e ne vendarlo ala popolassion afamada, el 18 dugno 1531 la zente incassada a S. Zen l'era corsa in piassa assalendoli e acontentandose de portar ià el pan e el gran. El pericolo dela rivolta l'era stà scongiurado nominando alcuni çitadini, che a sò spese i avea dato da magnar ai abitanti piassè pitochi dela contrada de S. Zeno. La tradission la ritien che nela benemerita comission ghera anca el Da Vico, indicado come "istitudor o restaurador" del "Bacanal del Gnoco", avendo fato distribuir gratuitamente su sò libara inissiativa ai Sanzenati pan, vin, botier, farina e formajo nel'ultimo vendri de Carneval. Par tuta la el tempo del dominio Venessian fin al 1791, la "Festa del Gnoco" l'è stà a spese dl publico Erario; la ventada dela Rivolusion Francese non l'è riussida a scancelar la tradissional manifestassion carnevalesca. Dopo la spaventosa parentesi del'ultimo conflito mondial, finalmente, nel 1949 la storia çitadina registra la sò rinassita secondo le secolari tradissioni; la carica vitalisia e ereditaria del re del nostro carneval, el Papa del Gnoco, l'è stà trasformada in eletiva, mediante le votassioni dei capi fameja residenti o nati nel rion de S. Zen. Ai nostri giorni el "Bacanal del Gnoco" de S. Zen puntualmente el ritorna, sempre mejo. Ogni bona fameja veronese, la imbandisse la tola con bel piato de gnochi fumanti.