Dopo el grande sucesso in Inghiltera e con le prime partìe nel Nord Italia, fa la sò comparsa a Verona el zugo del "fùbal".

1903 Un insegnante de greco del Maffei, un çerto professor Corrubolo el vien interpelado dai sò studenti par decidar quale nome darghe a la noa squadra de calcio apena fondada: "Podì ciamarla Hellas !" in omajo a la Grecia.

1904 Fratta Pasini, un butel de fameja nobile, punto de riferimento par i sò compagni de studio al Maffei, el partecipa a la creasion del' Hellas contribuendo in bona parte al fondo sociale de 32 lire. Ghe vien conferidi visto el grande entusiasmo, la carica de Presidente, el compito de fotografo, el posto in squadra da portier-capitan.

1905 Tra i primi colaboradori del Conte Carlo Fratta Pasini el fa comparsa Fantin, fiol de un magistrado. L' ossadura l'è rimasta formada da studenti del Maffei ma con la zonta de altri butei che quotidianamente jera impegnadi al laoro.

1906 El Primo gol "uficial" del' Hellas realisado a Vicensa in Campo Marzo (in un torneo con Treviso e Vicensa a fine april) l'è stà opera de un çerto Crespi. La Formasion: Orlandi, Fratta, Villardi, Camuzzoni, Fiorio, Brivio, Crespi (C), Carli, Bascheni, Fantin, Besenzon.

1907 Masprone, grande lanciador del disco Veronese (partecipante a le olimpiadi de Atene 1896) e atleta de la Bentegodi vien nominado presidente del'Hellas, quando la nostra gloriosa squadra vien inserida ne la "session zughi" de la società sportiva Bentegodi. L'Hellas continua l'atività amatorial snobando i canpionati veri.

1908 El zugo del balon el scominsia a contagiar tuti i butei e buteleti dei quartieri grassie a una notevole campagna publicitaria de la Bentegodi. Così nasse la seconda squadra "Hellas II" con Cavallaro, Vigevani, Cristani, Bevilacqua, Fracasso, Venturi, Corsini, Valeri, Fietta, Lucchi, Cherubini. Questa squadra partecipa a un torneo par seconde squadre nel vesentin, ma dopo 3 partìe se ritira con una vitoria e 2 paregi.

1909 Par la "Coppa Città di Verona", messa in palio dal Municipio in ocasion de la fiera de marso, arbitra Recalcati "giudice attento e imparziale". Partecipano, l'Hellas con do squadre, Vicensa e Milan. Quest'ultimo el vinçe el torneo.

1910 Su ordine de la federassion che la vol alargar el canpionato a varie regioni, l'Hellas vien schierada nel canpionato uficial. El Primo gol uficial in canpionato l'è stà a opera de Bianchi, Venesia-Hellas 2-2, e sucessivamente l'è stà data vinta a la nostra squadra parché el venesian Ricobon no l'era regolarmente tesserado. Nel giron Veneto-Emilian, 1° Vicensa, 2°Hellas, 3° Bologna, 4° Venesia.

1911 La prima vitoria del'Hellas sul Vicensa a opera de Bianchi e "Pippo" Forlivesi (sucessivamente nassional). Secondo posto in classifica de drio al Venesia e gnente promossion.

1912/13 Liniger, el primo straniero (svissero) in maja "gialo e blù" vegnudo dal Basilea a orchestrar la nostra difesa. L'Hellas vinçe el giron e incontra ne la seconda fase (...'na disfata), le grandi squadre come el Genoa, Pro Verceli, Casale, Milan.

1913/14 L'Hellas primo in classifica, con 4 vitorie e un paregio perde l'imbatibilità col Vicensa par 4 a 0. A causa de un infortunio al portier Girardi vien messo in porta, vista l'assensa de la riserva, el portier in "pension"da ormai 2 ani che l'era sentà tra el publico, Signoroni.

1914/15 L' Hellas nonostante aver catà un "bomber", no vinçe el sò giron. Corsi el segna 19 reti in 16 partìe.

1915/16 Una partìa del giron Veneto arbitrada da Gama, in tempo de guera, la vien zugada a Padoa con solo 7 nostri zugadori parché i altri 4 i avea perso el treno. Arivadi in ritardo, la partìa l'era zà compromessa, vien persa par 5 a 2.

1916/17 Canpionati fermi a causa de la prima guera mondial. Se ritorna a le origini con un torneo tra la Scola Tenica Provincial, el Pindemonte, la Sannimicheli e el Maffei.

1917/18 "Caduti in guera" Barbasetti, i fradei Benini, Vugevani, Signoroni, Cavalleri.

1918/19 Finida la guera, lo sport riparte. La Bentegodi visti i inutili tentativi de aquisir totalmente l'Hellas, forma una propria squadra.

1919/20 A causa de la guera l'Hellas resta sensa el campo (requisido). Inveçe de fondarse con la Bentegodi, l'Hellas preferisse el Verona FC (ne la sede del'Istituto Tenico de Corso Cavour). In marso l'inaugurassion de la sede al'albero Academia par concession de Alberto Masprone soto el nome de Hellas Verona.

1920/21 El derby tra le rivali: Arnaldo Porta nato a San Paolo del Brasil sigla la dopieta ne lo storico derby con la Bentegodi (H 2 - B 1)

1921/22 Grassie al gol de Egidio Chiecchi l'Hellas Verona vinçe in casa del Milàn.

1922/23 El portier Rossetti subentrado a Battistoni el deventa el grande protagonista de la Coppa d'Oro a Modena, parando el rigor ne la finale. Al' Albergo Regina la consegna de la copa del valor de 15.000 Lire a l'Hellas Verona.

1923/24 El zugador Gambarotta de la Novese protesta con l'arbitro Armano par un rigor assegnado a l'Hellas Verona secondo lu ingiustamente. Ma mentre el nostro atacante el stava par tirar dal "discheto", Gambarota incassà come na bestia el ciapa la rincorsa el segna ne la sò porta. Espulso!

1924/25 A Verona fa comparsa "Spaca reti" Levratto, in grado con el sò forte tiro de sfondar la rete e segnar gol uno drio a l'altro (15 gol). Solo quart'ultimo posto par la nostra squadra e 2 rigori decisivi sbajadi da Levratto ai fini del risultado.

1925/26 Quatro portieri par el Verona, ma solo Dal Maso se salva, i altri tri, uno pèso de l'altro.

1926/27 El Verona finisse el canpionato al terz'ultimo posto nel giron, vinçendo parò con la Juve a 10 minuti da la fine e el portier Combi el g'à uno sfogo de pianto. La Gazeta de lo sport titola: "Un'altra legenda che se ne va: l'invincibilità dei canpioni d'Italia".

1927 La più pesante sconfita de la sò storia, 11 a 0 dal Genoa.

1927/28 Un altro straniero a Verona par tirar su la squadra. L'alenador l'ungherese Bekei ogni zobia a le 20,30 el fasea lessioni teoriche a la squadra. A fine canpionato 60 gol subiti e solo 2 vitorie!

1928 1 Agosto 1928, la nassita de l'AC Verona con Presidente Emilio Tiberghien a seguito de la fusion con la Bentegodi e Scaligera.

1929/30 Canpionati a giron unico e Verona in serie B (6° Posto con 39 punti).

1930/31 El novo presidente l'è el capitan Dall'ora e la nova maja l'è blu con croçe giala.

1931/32 Par el terso ano consecutivo Patuzzi da Isola de la Scala l'è el capocanonier del Verona con 40 reti in tri stagioni.

1932/33 Olivieri, el più grande portier del calcio italian (canpione del mondo del '38) el finisse la sò aventura col Verona dopo averghe milità dal dugno del 1930. Canpionato de Serie B a do gironi da 13 squadre.

1933/34 Grassie ai gol de Busin dito el "bigolo" nei sparegi salvessa, el Verona alenado ancora una volta da l'ungherese Janos Bekei resta in serie B. Inaugurado el novo "Stadium comunale" dopo lo sfrato dal campo de Borgo Venessia.

1934/35 200 presense in gialoblù par Luigi Bernardi, un record!

1935/36 La Serie B ritorna a giron unico. Grande Verona che grassie a l'alenador Capra otien risultadi importanti....esonerado!

1936/37 Grassie a le parate de Egidio Micheloni el Verona l'è riussio a evitar i sparegi par la salvessa.

1937/38 Problemi tenici e economiçi par el Verona che l'è costreto a alenarse a porte serà e Remondini vien vendudo al Milàn par 45.000 Lire. I schei binadi su non i vien investidi, riciamando inveçe veci zugadori.

1938/39 A Verona fa comparsa un altro straniero par dar magior entusiasmo a la piassa, l'uruguaian Canebones Oliviero Icardi. (18 partìe e 10 reti)

1939/40 Di Prisco, uno dei più grandi bomber del Verona a fine stajon el vegnarà cedudo al Padova ma la sò cariera la sarà breve e deventarà un politico.

1940/41 Le 19 reti de Luigi Zanetti de Isola de la Scala no jè servide a evitar la retrocession del Verona in Serie C a causa de la pessima difesa.

1941/42 El Verona col terso ataco del canpionato, 68 reti, ariva terso e gnente promossion.

1942/43 Grassie ai 15 gol de Guido Tavellin e de 50 del resto de la squadra, el Verona vien promosso in serie B dopo aver vinto el sò giron e la final col Parma.

1943/44 In lujo la federassion forma tri gironi misti A-B. A setembre la sospension dei canpionadi a causa de la seconda guera mondial. I zugadori del Verona i partecipa nel fratempo al "Torneo del Presidio" divisi ne le squadre de minadori, de le tradote, dei pontieri e dei alpini. Vien organisada in rena la "Coppa Arena" con 6 zugadori par squadra, e el Capocanonier Tavellin vinçe un servissio da scritoio che vien baratà dal zugador con una giuba.

1944/45 canpionato ancora sospeso par guera - In rena vien organisado un altro torneo.

1945/46 Giovanni Chiampan presidente del Verona. La squadra vien inserida a la ripresa dei canpionadi nel giron misto B-C Alta Italia.

1946/47 Torna la serie B. Verona col novo alenador ungherese Venicech. Da Cadidai vien el zugador Sergio Sega che deventerà el capocanonier a fine stagion con 15 reti.

1947/48 Verona secondo e gnente serie A.

1948/49 Ris-cio retrocession par un Verona con un mucio de zugadori espulsi.

1949/50 Disdoto reti a testa par Ugo Pozzano e Guido Tavellin e du cambi de alenadori no i serve al Verona par scurlar l'ambiente e disputar un canpionato de alta classifica.

1950/51 El novo alenador l'è Angelo Piccioli.

1951/52 El presidente Chiampan iscrive al campionato una squadra interamente composta da zugadori nati a Verona. L'alenador l'è Zekeky. A stagion in corso sarà sostituido da Piccioli, voludo dai componenti de la squadra, che si piassa al 9° posto con 41 punti.

1952/53 Grassie ai 15 gol del "salvatore della patria" Gino Pivatelli el Verona l'è salvo.

1953/54 Novo presidente, al posto de Chiampan ariva Giorgio Mondadori.

1954/55 Verona salvo par un punto.

1955/56 Ritorna l'alenador Angelo Piccioli

1956/57 -Prima promossion in serie A del Verona. Ne l'ultima partìa al Bentegodi davanti a 10.000 persone conquista el punto promossion.
La formassion Ghizzardi, Donzelli, Begalli, Frasi, Cardaro, Stefanini I, Galassini, Ghiandi, Maccacaro, Bertucco, Bassetti. Alenador Piccioli. Altri zugadori: Basiliani, Stefanini II, Canio e Poli. Presidente Giorgio Mondadori. 

1957/58 Bel girone d'andata del Verona nel primo canpionato de serie A, ma gnanca i grandi gol del brasilian Del Vecchio (in una partìa 5 gol a la Sampdoria) e le zugade del norvegese Gundersen (ex-hockeysta) nonchè quele de Bagnoli no i evita a causa dei numerosi infortuni la retrocession.

1958/59 Va via el presidente Mondadori sostituido da Gerardo Girardi e vien veduda mesa squadra, resta parò el grande Osvaldo Bagnoli.

1959/60 Vendudo al Napoli par 45 milioni di lire a fine stajon, Giorgio Maioli uno dei zugadori più positivi de la squadra in un canpionato disputado dal Verona nel' anonimado de metà classifica. Un altra crisi e altra fusion con una squadra citadina 'pena promossa in serie C, l' Hellas. La noa denominassion l'è Hellas-Verona A.C.

1960/61 Hellas-Verona A.C se salva par miracolo vinçendo le ultime 4 partìe.

1961/62 Hellas-Verona A.C sfiora la serie A. Sospeti par partìa venduda al Napoli nel sparejo promossion da parti de alcuni zugadori veronesi.

1962/63 Setimo posto con 41 punti e vari cambi de alenador.

1963/64 Se zuga al novo Bentegodi, prima partia con 20 mila spetadori soto neve e fredo con un incasso de 13 milioni de lire. Presidente Bruno Albarelli.

1964/65 Alenador Giancarlo Cadè. Curiosità: Verona in crisi dopo 5 sconfite consecute incontra la Spal e Cadè a metà partìa manda in porta el tersin acrobata specialista in "rovesciade" Eros Fassetta a causa de l'infortunio del portier Liberalato. El para de tuto con mane e piè e a un minuto da la fine el gol par el Verona a opera de Giulio Sega.

1965/66 Bonazzi l'è el novo presidente del'Hellas Verona. Omero Tognon el novo alenador

1966/67 Saverio Garonzi deventa vice-presidente. Tognon viene esonerado verso metà canpionato. Subentra Ugo Pozzan che, in un secondo momento, el vegnarà afiancado da Nils Liedholm ne le vesti de diretor tenico.

1967/68 Con Saverio Garonzi novo presidente del'Hellas Verona l'è Serie A!

1968/69 Con i zumei del gol Bui e Traspedini el Verona resta in Serie A

1969/70 Grassie ai grandi gesti atletici del Brasilian Sergio Clerici "Gringo" el Verona resta ancora in serie A

1970/71 Verona ancora salvo, 11° posto con 26 punti. 

1971/72 El Verona se salva con la quota più bassa de la storia, 22 punti

1972/73 Ritorna Cadè alenador. El 20 majo 1973 Gianfranco Zigoni "Zigo-gol" e compagni (da segnalar Luppi e Sirena tra le fila gialo-blù) i vinçe col Milan al Bentegodi (5-3 el risultado final) e gnente scudeto ai rossoneri...."la fatal Verona", vista la contemporanea vitoria de la Juve su la Roma par 2 a 1.

1973/74 El canpionato de la "telefonada" de Garonzi a Clerici prima de Verona-Napoli. El giudice sportivo penalisa el Verona e lo spedisse in serie B, nonostante la salvessa meritada sul campo.

1974/75 "Pantofola" Roberto Mazzanti ne lo sparejo col Catanzaro regala la promossion in serie A al Verona. Rapimento de Saverio Garonzi a le 19:20 del 29 genàr 1975.

1975/76 Grande capitan Paolo Sirena e grande salvessa, alenador Ferruccio Valcareggi.

1976/77 9° Posto con 28 punti.

1977/78 Ultimo ano par Zigoni, Luppi, Busatta, Bachlechner, Maddè e Valcareggi.

1978/79 Verona retrocesso in serie B e Saverio Garonzi abandona el Verona dopo 13 ani de presidensa.

1979/80 Giuseppe Brizzi novo presidente del Verona.

1980/81 Celestino Guidotti "Tino" novo presidente del Verona e Cadè un altra volta ritorna come alenador. Squadra massa zoena e se ris-cia la serie C.

1981/82 Ariva l'alenador Osvaldo Bagnoli e el Verona vinçe subito el canpionato con Garella, Lely, Cavasin, Tricella, Oddi, Odorizzi, Manueli, Di Gennaro, Gibellini, Guidolin, Penzo, Vannoli, Ipsaro, Fattori, Fedele, Marmaglio, Valente, Guidotti e Piangerelli.

1982/83 Grande canpionato del Verona grassie ai novi arivi Guidetti, Dirceu, Zmuda, Fanna, Marangon, Volpati, Sacchetti, quarto posto e "Coppa Uefa". Ne lo stesso ano "Coppa Italia" persa in final con la Juve a opera de Platinì.

1983/84 El bomber Nico Penzo a la Juve e in cambio "nanu" Galderisi, mentre da la Roma vien Maurizio Iorio. Grassie a questi du zugadori el Verona conquista la tersa final de "Coppa Italia". Dopo la grande partìa de Belgrado el Verona vien eliminado da la "Coppa Uefa" a opera de lo Sturm Graz.

1984/85 Verona Canpione D'Italia - Tino Guidotti presidente e dopo la splendida conquista del tricolor deventa Fernando Chiampan. Bagnoli alenador e i "Canpioni" jè: Garella, Ferroni, Marangon, Tricella, Fontolan, Briegel, Fanna, Volpati, Galderisi, Di Gennaro, Elkjaer. I completava la rosa: Spuri, Sacchetti, Bruni, Donà, Marangon II, Turchetta. 43 punti in 30 incontri con 42 reti fate 19 subite. 15 Vinte, 13 paregiade, 2 Perse. 

1985/86 Unica partecipassion del Verona in "Coppa Campioni". Dopo la vitoria con el PAOK de Salonico, el Verona el se cata davanti la Juve, 0-0 al Bentegodi e nel ritorno "a porte serà" a Torino 2-0 par i bianco-neri. Protagonista de quest'ultima partìa l'arbitro Wurz che ghe ne combina de tuti i colori e Verona eliminado. Squadre indebolida dopo la partensa de Fanna, Garella e Marangon e 10° posto in canpionato.

1986/87 Novi zugadori i vien inseridi par rinforsar la squadra "Pablito" Paolo Rossi, Pacione, De Agostini e Galia e el Verona conquista el 4° posto con 36 punti e si torna in Europa.

1987/88 Roberto Tricella, capitan del Verona campione d'Italia, el va a la Juve con De Agostini. I tifosi i scominsia contestar el presidente Chiampan. In canpionato el Verona termina al 10° posto. Grandi sodisfassioni in Coppa Uefa. Elimina el Pogon Stettino (1-1 in Polonia, 3-1 al Bentegodi), l'Utrecht (1-1 in Olanda, 2-1 a Verona) e lo Sportul di Bucarest (3-1 in casa, 1-0 in trasferta). Vien fermà nei quarti dal Werder Brema, che vinçe 1-0 al Bentegodi e paregia in casa 1-1.

1988/89 La squadra se piassa a l' 11° posto con 29 punti dopo dure contestasioni a Chiampan.

1989/90 Retrocession in B. El Milan perde a Verona 2 a 1 la partìa e lo scudeto ne la "fatal Verona".

1990/91 Fernando Chiampan vende la società a la "fantomatica" Invest de Milan. Presidente deventa Angelo Di Palermo che poi lassa a Emyl Mirzhakanian. A tirar le fila de la Invest l'è Roberto Uzzo. El 21 febrar 1991 el Tribunal de Verona dichiara el falimento del'Hellas Verona. Fascetti compie un autentico miracolo e riporta el Verona in A. 

1991/92 Una nova proprietà compra el neonato Verona Football Club. Presidente deventa Stefano Mazzi. I vien compradi i stranieri Stojkovic e Raducioiu. Ma el Verona ritorna in B, nonostante la guida tenica la sia passà a Nils Liedholm e Mariolino Corso.

1994 El primo derby col ChievoVerona "Ceo", el 10 diçembre 1994 finisse 1-1.

1998 Al'inissio del 1998 vien venduda la squadra al novo Presidente Gianbattista Pastorello.

2001 El primo derby in serie A col Ceo, el 18 noémbre 2001 finisse 3-2 par l'Hellas.

1903-2003 El Centenario