Non molto tenpo fa, gh'era i molini su l'Adese anca in çità. Ghe n'era tanti de quei che galegiava, mentre quei su tera ferma i era in numaro minore e i se trovaa pì a nord. Zà nel 1239 se contava na çinquantina de molini deti "natanti". I vegnea ciamadi così, parchè sia el deposito del gran, che quel dele màsene i posava su tri barche "sandoni". Su du posàa la casa, funsion de protesion su magasin e màsene, el terso barcon el sostegnea la grande rua idraulica a pale larga çirca 5 metri de diametro. La strutura l'era de forma quadrata de 10 m de lato, ancorada a riva con na grossa càdena "castria". Al molin se ghe 'ndàa tramite 'na passerela "peagna" che de inverno l'era come 'na sbrissiarola. Sul molin, oltre ai çereali se masenàva coloranti, zolfo, calçina.