La Rena Domila l'à riscoperto un toco de storia Veronese scomparsa e a conosensa de pochi intimi. Nela foto a fianco se pol notar dele case un po vecie, un portego e un cortil belo grando. Ste case iè a Montorio vissin al Lagheto Squarà. Tuto se podarea pensàr ma che na olta l'era "La Loza" dei Scaligeri quela proprio no! (Foto: 01 La Loza come la se presenta nel domila...) .Nel' XI secolo l'era un palasso giudissiario dove i controlava anca le aque soto l'aministrassion del Monastero de San Zen (Racolta dela Deçima, distribussion dei pascoli dala Lessinia a l'Adese e sede del tribunal çivil e eclesiastico).I Scaligeri sucesivamente i avea otegnù i diriti sule aque da parte de San Zen. (Foto: 02 Dal Lagheto Squarà na olta i partia do fiumi el Fiumisèl e Fibio). Nel 1273 Alberto dela Scala l'avea fato un "alveo soteraneo" che 'l portàa l'aqua delo Squarà al'interno del palasso e ala pescheria al çentro del cortil. Nel 1363 Cansignorio dela Scala l'avea abelido e ingrandido el complesso dele "Loze" compreso nela "Fatoria Scaligera" la quale l'era sta venduda nel 1410 a un çerto Azzo Francesco de Castelbarco "Palatium Ulivedo", (Foto: 03 La Cesa vecia de Montorio davanti al Lagheto Squarà vissin ala Loza) confiscado e vendudo a Marino Contarini da Venessia par do tersi e a Pasio Guarienti e Bevilacqua notaio par un terso. Sucesivamente i paroni dela Loza i è stadi un çerto Roberto Conte de S.Severin (general dela Cavaleria dela Serenissima Rep. de Venessia morto nela bataja de Galiano), (Foto: 04 El giardin come el se presenta nel domila. El pi antico giardin al' Italiana rimasto in vita a Verona.) Gaspare de S.Severin deto Fracassa secondo conte de Caiasso e la Fameja Battaglia par tresento ani. El primo de sta fameja a portar al masimo splendor el "Palasso" l'era stà Piero Antonio. ....el nobile, de fameja Veneta, sfruta el "giardin" non solo come logo de piaser e de delissia ma anca come zona da valorisar economicamente potensiando le fonti idriche che in quel tempo abondàa (Bojo, Fossato Maestro, Fontanela ,Giardin). (Foto: 05 e 06 El Bojo" ne la sò belessa) El Bojo l'è un sifòn che'l ciapava l'aqua dalo Squarà dando vita al Fibio portandola nel giardin rendedolo esteticamente molto belo e ai molini. L'aqua del Fibio la vegnea usada par primi dai molini che i masenàa gran e farina andando a vàl dai fabricanti de Lana, Carta e Fèr ale Ferrasse, 'ndoe nel 1405 i produsea le armi par la Rep. Veneta. Par l'aqua ghe stà numerose dispute che al giorno d'ancò se podarea definirle Condominiali. Ghera persone che gavea un molin longo el Fibio o qualsiasi altra atività e fregàa l'aqua ai-altri sensa autorisassion. Una olta adiritura l'era intervegnudo el "Magistrado ale Aque". Ritornando alo Squarà, un tempo partia anca el Fiumicello (fiumesèl) utilisado pìù dale lavandare che par scopi industriali e el sfociàa nel'Adese dove ghera i molini natanti. Nel 1539 Giò Lodovico Battaglia inissiò contrasti con i consorti del Fiumicello. Da una testimoniansa tradoto dal latin se lese che parfin el Boccaccio l'avea parlà dele feste che se tegnea a palasso (sensa esserghe stà de persona): //....Le çene a Montorio, le se svolgea al'aperto presso le freschissime e limpidissime fontane e i bali soto le frasche apositamente costruide. El Bandello el ricorda anca un pergolato nel giardin (vissin al Palagio) 'ndoe el se ritirava con alcune personagi dopo pransi e çene "luculiani" e bali e canti e suoni che durarono tuta la giornada. Se "accenna" anca al "celebrado nel Filocolo da messer Giovanni Boccaccio, piacevole e fecondo scritor, el Castel de Montorio".Chi el castel el vien inteso (Foto: 08 l'entrà al bojo) come Vilajo. infati el continua: <<Quivi facendosi pescare e prendendosi molte truttele, ternali, gamberi e quei delissioni pessolini dala molona grossa, che in diversi loghi i-à sortido nomi diversi e che vojaltri Veronesi ciamè Magnaroni>> l'era intervegnudo anca Lodovico Dante Alighieri (fiol del poeta Dante) che el se trovàa nel podere viçin, nela sò vila de Olivè. Intanto <<essendosi preso zà del pesse assai e fasendo gran caldo el Signor podestà con la compagnia el sà ritirado nel Palasso>>....// Nel 1820 i Conti Albertini i-avea trasformado il palasso nobiliare in edificio popolare. Nel 1920 l'e stà comprado dala Fameja Maggia atual propietario.


Mapa del 1700 de un çerto Bighignato, 'ndoe se vede la Loza nel 1500.


In rosso trategiado se pòl notàr "l'aveo soteraneo" fato costruir da Alberto dela Scala nel 1273 par portàr aqua dalo Squarà al'interno dela Loza Inoltre se pòl notàr el bojo (color azuro in alto a sanca ) ,du bojeti minori, e tuta la geometria del giardin dela fameja Battaglia, con al çentro la fontana (una 'olta pescheria) nel 1500.