'Na olta gh'era numerosi molini su L'adese che iè stà distruti o danegiadi da la tragica piena del 1882. L'aqua la viagiàva a oltre 20 chilometri orari nela note tra el 15 e 16 setenbre. L'era stà previsto che dovea pioar, ma nissun se imaginàa che l'Adese se ingrosasse in chela maniera, invadendo con un casin mostruoso case, strade, piasse e mandando le case pì basse dela çità in teribili gorghi. El 17 setenbre du tersi de Verona l'era alagada, le piasse i era diventà stagni, le vie progni, e tuto el resto l'era fango e melma. Adiritura le barche de socorso non le podea transitar soto Porta Borsari. Al ponte Piera l'aqua l'era alta 12 m Veroneta l'era messa veramente mal. Case croade o trasportade con la gente drento, le abitassioni dal 'Adese. 4500 palassi de Verona i era stà inondadi ai pianitereni e nei primi tri piani. 300 distruti del tuto. Du ponti, 20 molini, e 27 rue idrovore i-era stà spassade ìa. La reassion l'era stà pronta e in poco tenpo costruidi novi arzari pì sicuri e interadi la magiorparte dei canali de Veroneta. El 27 setenbre 1882 l'era vegnudo el re Umberto I in aiuto e par confortar la gente. Nel 1884 ricostruido el PonteNovo gh'era stà dà el nome de Ponte Umberto.