Ponte Piera El Ponte Piera l'è stà costruido quando Verona l'era deventà colonia Romana 89 a.C. Fato dai Romani in marmo rosso. Le 3 arcade verso el çentro storico i era stà ristruturade dai Scaligeri nel 1298. Fato saltàr nel '45 (IIa Guera Mondial). Ricostruido nel 1957 con piere recuperade nel'Adese. El ponte nel tempo l'è deventà uno dei simboli de la nostra çità.

Ponte Castelvecio L'è stà costruido su disegno de Gioani da Ferara e Jacopo Gozzo nel 1354. L'è longo 120 m e largo pi de 7. El posa su 3 arcade. El gà caminamenti in coto, i basamenti in marmo de Verona e con alcune piere asportade a edifici romani. Nel primo pilòn ghe incastonadi quindese capitei corinzi. L'è stà fato saltar ne la IIa guera mondial e rifato nel '50.

Ponte Garibaldi El 16/08/1864, l'è stà inaugurado un ponte in fero col nome de quel che l'avea costruido, Newille. Par passar bisognava pagar, in modo da rimborsàr le spese de costrussion. El 07/03/1867 l'era vegnuo a Verona Garibaldi, salutado dal popolo in festa e andando verso Aèsa, passando propio su quel ponte. Nel 1934 rinforsado e cambià nome in Garibaldi in ricordo de quel avenimento. Decorado con 4 statue in tufo l'era stà sopranominado Ponte dei Strachi.

Ponte de la Vitoria Le prime piere i èra sta posade nel '26, tri ani dopo era stà deciso dedicar el ponte ai caduti in guera. Longo 100m largo 16 el posa su 3 arcade. Sul lato interno dei piloni che i tien su i 4 cavai, ghè incisi i boletini dela 1a guera mondial. Un ponte imponente, tra i più bei stilisticamente de la nostra çità. Da Riva San Lorenso se varda el ponte con de drio el magnifico panorama de le Toresele.

Ponte Novo Anticamente colegàa la çità con l'isolo (la lengua de tera isolada dala çità). L'è nato ala fine del 1110 e l'è stà costruido tante olte a causa de distrussioni naturali. Rifato da Alberto I° dela scala, un incendio el l'à distruto e Mastino II° el la fato su da "Novo". L'è stà ricostruido anca dal Sanmicheli. Nel 1882 (l'ano de la piena) el s'à spacà poi sostituido con uno in fero, e nel stesso ano l'era vegnudo el re Umberto I in aiuto e par confortar la gente. Nel 1884 ricostruido el ponte ghera stà dato el nome de Ponte Umberto I. Nel 1894 ghè nè stà fato n'altro. Dopo 40 ani l'è stà demolido e nel 1938 l'è sta costruido n'altro. Fato saltar nel 1945. El ponte definitivo l'è del 1946.

Ponte Aleardi L'è stà inaugurado nel 1879 el ponte in fero a 5 arcade. Nel 1882 la piena el l'à distruto. Nel 1939 roinà da la guera l'è stà demolido e ricavà 200 tonelade de fero. Nel 1950 l'ultima costrussion. A Verona l'è conossù anca come "Ponte del çimitero".

Ponte de la Ferovia L'e' stà costruido a partir dal 6 marso del 1850, finì in meno de 3 ani. Inaugurado el 10/11/1852. Da li ghe passava i treni che i vegnea da Vicensa, passando par la stassion de Porta Vescovo e i se dirigea verso Mantoa. Ala cerimonia gavea partecipà parfin el marasciallo Radetsky (Radeschi). Le alte autorità citadine sora a un vagòn de veludo vermiglio trainado da una locomotiva ciamada Verona partida da Porta Vescovo, i sera fermadi a metà ponte, mentre na banda militare la sonava l'inno imperiale i smontàa a tera. Radetsky l'avea messo la pergamena comemorativa nel'ultimo arco del pasagio de destra in uno spassio 'udo predisposto, serado dal'ultima piera. El discorso inaugurale l'era stà dito da Luigi Negrelli de Montalto ideator del canal de Suez (Sues). Le mine tedesche nel 1945 non i era riusside a butar zo el ponte. Col tempo ghe sta stupade le ultime do arcade de sinistra, restaurado, e ritrovà la pergamena (trasferida a Venessia).

Ponte Càdena El nome Càdena, deriva dala cadena che al tenpo dei Scaligeri, congiungendo le do rive, inpediva e controlava tuti i spostamenti dei contrabandieri. A guardia del trafico, a metà de l'Adese, se pòl notar ancora, l'antica toreta Scaligera.

Ponte Navi Costruì verso l'ano 1000. Nel 1354 quando el ponte l'era in legno i s'à sfidà Cangrande II e so fradelastro Fregnano che sconfito el sa negà nel'Adese. Nel 1757 una grossa piena l'avea travolto el ponte isolando la tore che colegàa le do arcade. Du done e du buteleti restà imprigionadi nel ponte i ris-ciava de negàrse, ma un fachin dela Dogana, Bartolomeo Rubele, el s'à butà nel' Adese con l'aiuto de soghe e sigagnole l'è riussì a salvarli. El popolo in festa l'à volù donarghe un bel mucio de schei, rifiutadi dal Rubele (soranome el leon dela Valpantena). A quel eroe ghe stà intitolado un lungadese.

Ponte San Francesco L'à ciapà el nome dal Bastion che ghe li vissin nel 1930. L'è stà costruido par scurtàr la strada al popolo tra Porta Vescovo e Porta Nòa.

Ponte Postumio Nel 49 a.C. costruido arente al ponte Piera, pì elegante, con 5 arcade, l'era posissionà longo la via Postumia. Ora non esiste pì.