Drento ala basilica te pòl catàr una statua in marmo rosso de Verona, bela granda, dipinta con forme grese. L'è quela de San Zen, vestìo da Vescovo. Nela man sanca el gà el pastoral dove ghe tacà un pesse, mentre con la man destra el benedisse. Ve si mai dimandà parchè San Zen el ride? Barbarani ne la sò poesia al Santo Patrono el disea:
".....savio, prudente par virtù fornide
da quel'aria de furba santità,
che i l'à ciamado el me San Zen che ride
sule batoste de la so çità!....."

Ghè dei studiosi che iè arivadi a stè tri posibili conclusioni: 1. El ride parchè, se l'è na statua medieval, in quel'epoca, i fasea le statue con quel sorisin che te par che le te toga par el cul, vedi el monumento equestre de Cangrande. 2. El ride parchè nela liturgia, la letissia pascoale, l'era colegada al soriso dei fedeli. 3. El ride parchè podaria essar un motivo folcloristico. (El riso, come dator de vita). La risada non l'è sta mai abolida, la gente la sganassava magari par scapàr da la paura e dal a morte. Non gh'è gnente de çerto su quel soriso, ma l'è grassie a questo che i Veronesi i sà ligadi al Santo Patrono.

Le legende e i miracoli

1. Un giorno mentre San Zèn el pescàa, tranquilo sula piera, el vegnea avicinà da tri mesageri del re Gallieno, che i gavea chiesto de andàr a cavar ià el diaolo ala fiola del re. El Santo, bon come un toco de pan, generoso, l'à voluo prima sfamar sti pori anbassadori regalandoghe 3 pessi. Poco riconossenti, i ghe frega el quarto, ma questo pur cusinandolo, l'era rimasto cruo. Vergognandose iè tornà da San Zèn, che'l g'à perdonà el gesto.

Da li i Veronesi i s'a ispirà par la riceta dei bigoli con la sardela a San Zen.

2.Nel 589, l'Adese in piena, l'avea ragiunto le porte dela cesa dove ghe 'desso l'atual basilica. I fedeli çerti de negarse i sà racolti drento la cesa e invocando el Santo, le aque le s'a fermade e le sà inalsà verticalmente protegendo i çitadini.

3.I bo de un contadin i stàa portandolo in un gorgo generà dal diaolo. San Zen che'l stàa pescando l'era corso in aiuto del contadin sfidando el diaolo, che prima l'avea abandonà el poro omo, sucesivamente visto che non se andàa a una conclusion, i avea deciso de sfidarse a tanburel. In prima batuda el diaolo el gavea lancià un toco de montagna contro San Zen che l'àvea respinto con la Rena. San Zen sucesivamente con un colpo da maestro riussì a travolger el diaolo in una grota. Par la partìa persa el diaolo come pegno, la dovuo trasportar na vasca de granito rosso da Verona a Roma che però nel trasportò la ghe cascà, e anca ai giorni nostri nela basilica a sinistra se pòl vedar el toco de vasca con sora le inpronte del diaolo.

La vita
Santo African nato atorno al 300. Vescovo de Verona nel 362. In verità non l'era de pele scura ma ciara. I Miracoli principali conpiudi iè su l'Adese e el Diaolo.