L'origine de la fameja Della Scala l'è bastansa scura. Se scominsia a parlar de ela intorno al 1147 par via de un çerto Balduino, console del Comune. Ma el vero capostipite par ch'el sia stà Jacopino che el ghà avù quatro fioi : MANFREDO Vescovo de Verona LONARDINO deto MASTINO(I) -ALBERTO I e FEDERICO deto BOCCA. Lonardino l'era amigo de EZZELINO DA ROMANO e quando questo l'è sbalà, Lonardino (deto Mastino) che l'era Podestà de Verona(1259) con so fradel Alberto I iè deventà paroni de Verona e insieme i do fra dei i ha fato nassar la SIGNORIA SCALIGERA(1277). Alberto I el sposa la siora Verde di Salizzole e da la loro union nasse BARTOLOMEO I - ALBOINO - CANGRANDE I e COSTANZA. Ma Alberto I el ghà anca un fiol naturale (GIUSEPPE) ch'el pensa ben de nominar Abate de San Zen.Da Alboino che se sposa prima con CATERINA VISCONTI e dopo con BEATRICE DA CORREGGIO nasse ALBERTO II e MASTINO II. Da Mastino II ch'el sposa TADDEA DA CARRARA nasse CANGRANDE II, PAOLO ALBOINO e CANSIGNORIO, oltre ai fioj naturali FREGNANO (ch'el pensa ben de far ribellar contro so pare Verona nel 1354) e PIETRO (che invesse el pensa ben de deventar vescovo de Veronae de Lodi) CANSIGNORIO el lassa solo fioj naturali che ghe succede ne la dinastia: BARTOLOMEO II e ANTONIO. Cangrande II el lassa solo un fiol naturale GUGLIELMO che nel 1404 riconquista Verona ma el more subito dopo. La dinastia la riprende con BRUNORO e PAOLO che però i se stabilisse in Baviera dove,par mancansa de fioj maschi,né regolari né naturali,la se estingue nel 1598. In sostansa la storia dei DELLA SCALA la pol riassumarse in tri momenti storici :primo momento =fin al 1311 co la creassion de la Signoria; secondo momento =(1311-1336) co la formassion de uno Stato predominante ne l'Italia settntrionale;terso momento =(1336-1387) co la decadensa dovuta a le incapacità dei capi e a le beghe in fameja. Nel 1387 i Scaligeri i cede a l'assalto dei Carraresi e dei Visconti. La Signoria dei Della Scala l'è ricordada principalmente a Verona da le tombe monumentali (Arche scaligere) presso Santa Maria Antica, dal Palasso dei Signori, da Castelvecio e dal Ponte Scaligero. foto:Arche Scaligere