Quela dei Cimbri l'è un' isola cultural e linguistica che caraterisa gran parte del’altopian dei Lessini. Nel 13° secolo questo l'era un teritorio poco popolado e l'è stà asegnà dal Vescovo Bartolomeo de la Scala a un bel grupo de "coloni" de origine bavarese-tirolese, con el compito de tajar i albari e ridurlo in pascoli par el bestiame. Ai coloni l'è stà concesso de godar dei fruti de la tera, de costruirsi case, aministrarse, elesar propi paroci che i parlasse la sò lengua, conservar le proprie tradisioni e de unirse in comunità piassè numerose. Quele comunità, col passar dei tempi, jè cressude de numero e de popolassion e, verso la fine del Treçento, jà costituido i Tredese Comuni Cimbri de la “Montagna alta del Carbon”.I “trombini” o “s-ciopi” o “pistoni”, come i vien ciamadi in altra maniera, i sarìa derivadi da armi da guera del Sièçento/Seteçento usade, par lo più, per spaentar, per butar zò palissade, par farse largo tra la zente, per difendarse durante i viai. La sò denominasion, probabilmente la provien da un arma che podarìa somejarghe, el “tromblòn” belga e olandese del passà, el par g'abia origine da la “tromba” (o campana) de lo svaso de la boca da fogo. Nel passà in ogni borgada de la Lessinia, squadre de “trombonieri” i fasea dimostrasioni folcloristiche con le sò scariche a salve a le manifestasioni dei sò paesi. Ancò, do associasioni folcloristiche: I “Trombini” de San Bartolomeo e i “Pistonieri” del’Abasia de Badia Calavena le porta inànsi le antiche usanse parteçipando con i sò “s-ciopi” par ralegrar e ufiçialisar le feste del propio paese e dei paesi de la provinçia de Verona.

Storia e significado del trombin
El trombin al dì de ancò el gà la funsion de far un forte bacan ("el boto") con fumo, secondo un ritual de "scongiuro" contro i spiriti maligni e le aversità, ma anca con un significado de festa e gioia. La presensa dei trombini l'è atestà in varie zone de la provincia de Verona da alcuni secoli, ma in particolar in Lessinia. A la fin del XVII sec. le visite pastorali del vescovo Francesco Barbarigo a Vestenanova, Badia, Tregnago, Illasi e Boscocesanova iè salutade dal ricevimento e da le esplosioni con armi da fogo, somejanti a archibugi. E l'è nel secolo dopo, forsi ne la seconda metà del XVIII sec., che da le cronache de le visite pastorali se rileva la presensa ne le varie comunità de milisie locali, e grupeti de omeni siélti munidi de trombini che i podea, al`ocorensa, ésar impiegadi con compiti de polisia local. (Nel 1763 par la prima volta se parla de "schioppi" a indicar i trombini e non più i archibugi). A 'olte, 'ste milisie jera ciamade "Sepolcreri" e le g'avea el compito durante le funsioni de la Setimana Santa de custodir in costume el Sepolcro e de sparar con i trombini al Gloria del Sabo Santo e de la Pasqua. Da qual arma el deriva el trombin? Molto probabilmente el deriva dal`archibugio, dal qual l'è difarente par "l'apertura" de la cana a forma de tromba, da cui l'à ciapà el nome.

'Ndoe se usa el trombin
L`uso del trombin come uficialità cerimonial. Prima del sparo ghe la sfilada dei trombini, lo schieramento e el caricamento, cui sovritende un comandante: i "trombonieri" in costume, coi tochi in spala, i marcia in colona precedudi da bandiere e labaro portadi da butele in costume e da uno o pì sonadori de corno. Lo schieramento el vien fato in una zona adata, lontana dal publico, con i "trombonieri" messi a semiçercolo e i trombini colocadi a tera. Par el caricamento e el sparo, ghe vol tanta esperiensa: el trombin se carica versando una prima dose picenina de polvere nera con grafite ne la cana, distribuida col misurino dal comandante. Con una bacheta de legno se bate sul fianco del trombin in modo che la polvar impienissa ben el canel e che'l vaga fin al porta-capsula dove el bate el can. Una seconda dose de polvar nera da mina la vien distribuida sempre dal comandante (in ragione diversa a seconda de la grandesa del trombin) e compressa con asta e massa de legno insieme a alcuni tochi de giornal. El comandante distribuisse quindi una capsula d`inesco, dita "patrona". Ogni pistonier par ripararse dal boto e da le scotade el g'à ligà su la gamba sanca un toco de saco ("s-ciavin"). Dopo che l'è stà sonà el corno che l'avisa la zente che manca poco al sparo, ogni trombonier alsa l`arma in brasso con la cana rivolta al teren e el drito posto sul grileto. I spari i se ripete singoli o in copia, o a tri, secondo i ordini del comandante. El sparo l'è spetacolar e forte come el boto de un canon, "fragoroso e fumoso". El trombin inisialmente rivolto verso el basso, par el forte rinculo el viene sospinto in alto e questa manovra va controlada da ci spara acompagnandola con un meso giro del busto e una rotasion de 180° alsando el pesante trombin su la spala sanca. El tuto in modo da non éssar butadi in tera dal rinculo. Da la nugola se spande un forte udor de polvere da sparo. I trombini i se sparava e i se spara ancora durante el "Gloria" del Sabo Santo, durante le feste e le sagre locali in Lessinia, l`ingresso de novi paroci e alcuni matrimoni.