CURIOSITA' DE L'IRLANDA
Tanti i vien in Irlanda con mile aspetative de sènari soranaturali, de energie magiche, de natura romantica e…i torna a casa forse un po disilusi parchè i se spetava qualcosa de diverso. Certo l’è che le tradissioni folcloristiche e la mitologia irlandese messià ai sènari che ghe da ste bande fa in modo che un qualcosa de magico suceda. Te vedi ‘sti sènari e dopo te entri in un pub qualsiasi e tra no stufado de agnel e un par de patate (che no le manca mai, de ogni forma e color!) te te ricati nel così conossuo "Irish Caric" cioè el tipico divertimento al’ irlandese: bireta, musica, ciàcole. E se te si fortunà nel pub i taca anca el camìn e alora te te cati propio nel posto giusto. In Irlanda, el famoso ciél el cambia rapidamente par l’efeto che el vento el g'a su le nùgole, i colori nel giro de un minuto jé diversi e te par che el tempo el se fermi o el cora pì veloce. El spassio el te ziga ne le recie grassie al vento e l’orizonte l’e imenso. El belo l'è che te pol caminar da na spiagia a na colina, da un prà pien de fiori a un lago e tuto nel giro de poche ore. La geologia de sta tera l'a fato in modo che, pur esendo n’isola picenina, la gabia sta richessa incredibile. Quel che ghe asolutamente da 'edar l'è tantisimo e te poderìa 'egnar la oja de tornar in sta tera pì olte..ancora e ancora: mì l’è da tredese ani che vegno qua e deso ghe vivo anca e.. no la ma gnancora stufà sta isola 'erda! Te arivi qua, la magioransa de le olte, da Dublìn. Dublìn la g'a parechio da ofrir e l’é un bon punto de partensa, l’e piena de osteli, b&b e otel de tute le stele e sorte. Pub ghe ne fin che te te stufi e ristorantini de qualsiasi etnia anca. De irlandesi ghe ne ma te capitarà de sentir parlar in ogni lengua trane inglese probabilmente…polaco, spagnolo, indian, cinese… apena fora da la capital pero te te inoltri ne la vera Irlanda e nel giro de poco te te rendi conto ndo te sì, anca se da la vista aerea la pol dar emossioni.

LA GUIDA D'IRLANDA IN POCHE RIGHE
DUBLIN! Da 'edar: Temple Bar, San Stephen’s Green, la National Gallery, el National Museum e le verie cése come San Patrik e Christ Curch. Tote na cartina turistica e dage n’ocio. Par moarte ghe: autobus, la Dart e la Luas e n’infinità de taxi. I punti turistici i ghe un po ovunque quindi par informarte no te g'he meti gnente anca parchè jè molto organizè da sto punto de vista qua invesse par quel che riguarda puntualità de trasporti mia massa. Scioping! Scioping! Scioping! A Grafton strit, Henry Strit e nei vari centri comerciali sparsi ovunque. Se te gh'è bisogno de supermercati i mejo par qualità e presso je: Tesco e Dunnes. Ghe anca de le coriere “coach” che te porta ovunque in Irlanda e i bilieti i costa veramente poco. A Sud de la çità ghe le montagne de Wicklow e te par za de esar da l’altra parte del mondo. Se te rivi da l’aereoporto de Shannon, ne la costa Ovest te si a un tiro de s-copo da la contea del  CLAIRE 'ndo ghe le famigerade scoliere de Moher (vedi la me foto son proprio là!) e lì vissin gh'è el Burren. a sud del Claire gh'è la contea del  KERRY con el visitatisimo Ring of Kerry. Al Nord invesse del Claire gh'è la contea de GALWAY e el Connemara, pì a Nord te gh'è el DONEGAL mentre de fronte a Galway gh'è le famigerate e stupende isole Aran. Andando a Sud te cati CORK. Andado sempre a Sud ghe Waterford City e Wexford. Al’interno isola el sénario l’è un po manco incantevole ma ghe tanti siti archeologici e storici de gran importansa. Le tombe preistoriche de Newgrange ne la contea del Meath. A Cork ghe tanti “Stone Circle” e cioè Sercoli de Sasi (no le che'l sona cosita ben en veronese …) ghe tombe e çerchi fortificadi ovunque nela parte Ovest. Cése cristiane ghe ne parechie e le pì importanti je ale Skelling Michael e ala Rock of Cashel, sensa parlar de le atmosfere che se cata a Clonmacnois, Glendalough e Monasterboice. Verso el Nord de l’Irlanda la campagna l’è imensa e stupenda, quasi selvadega in certi punti. El Nord je le verdi Glens of Antrim. “Glen” in gaelico vol dir “Vale” e le binare geometrie de le Giant’s Causeway. Nel Sud-Est Down la ofre la serena natura de i lo Strangford Lough con la grande presensa de le Mo’urne Mountains, mentre all’Ovest Fermanagh gh'è el sénario del Lough Erne un favoloso posto par i sport de acqua, la pesca e par esplorar i resti de i monasteri. Eco! Un po de “TIPS” (=sugerimenti, come i le ciama chi) par farse un’idea inissial de ‘ndo se preferisse andar…
E par la felicità de tuti ve do un po de siti de compagnie aeree:
www.aerlingus.ie
www.ryanair.com
www.easyjet.com (Belfast no Dublìn)
E par inissiar el to sogiorno a Dublìn visita l’agiornatisimo sito
www.visitdublin.ie
Par mì la miglior maniera de girar le ciapar na machina e ndar ndoe te porta el vento, sensa far masa programi e sensa farse masa storie.