CEÁD MILE FÁILTE
SENTO MILA OLTE BENVEGNUI
Ciao a tuti! Me ciamo Evy e vivo a Dublino che in irlandese se dise Baile Áth Cliath. Son sempre sta n’apasionada de Irlanda e de la so cultura. De sta isola verda me piase la storia, la musica, la gente. Dublino l’è sicuramente più granda de Verona ma no lé Londra e qua te cati sempre na facia conossua o na persona che te saluda. Anca se le tanto diferente da casa, dopo un poco, te te abitui e la diventa un familiare e amichevole. In sta rubrica me piasarìa contarve de noialtri veronesi, veneti e italiani che emo deciso par un po, o par sempre, de vivar chi. Condividaremo esperienze en sta isola che i ciama “de smeraldo”, le nostre storie. Se sercarà de metar a confronto do culture difarenti ma bele…insoma ciacolaremo con tuti i veronesi, veneti e italiani nel mondo par sentirse manco distanti e sempre più orgojosi de esar veronesi…e alora? Sa spetìo? Verzì ste pagine che inissia la storia…
SLÁN
BYE BYE
Evy

Un giro par l'Irlanda, le Aventure de Evy
La pì bela roba da far quando te vivi a Dublìn le ciapàr na machina e ndar a védar cosa ghè là fora da la çità, o come i le ciama chi la Dirty Old Town (la vecia çità sporca). Sa far? Sa non far? Ndo ndar? De preciso no lo sarevemo mai. Fato sta che mì e do me amighe emo ciapà el via, afità la machina e vinto lo scago de la guida roersa. Emo pontà el dièl e semo ndè verso Sud. Prima tapa: la çità de Kilkenny ‘ndo emo catà un ostèl del dopo guera –ah g'avea paura che i ragni i me majasse de note! jera neri e grandi come la me facia- ma se sen adatà ala mejo ne na camareta da quatro. Parchegià e meso zo un po de roba emo scomensià a caminar e a capir ndo l’era el çentro. Se sen subito acorte che gh'era na specie de festival (Kilkenny Arts Festival www.kilkennyarts.ie). Qua in Irlanda la çità piassè granda l’è Dublìn, le altre, Kilkenny compresa, le par San Giovani, Isola…insoma lori i le ciama cità…mì le ciamo paeseti, citadine. Comunque sia gh'emo avuo sta fortuna de védar el paese in festa con bandiere giale e nere da par tuto e musica dal vivo nei vari pub e tanti fiori. Apena fora da l’ostèl emo caminà su na colineta ndo gh'era na césa gotica. La catedral de St. Canice le datà ala metà del 1300, la gà dele tombe del XVI e XVII secolo fora che je originali e na tore de lato tipica irlandese che se ciama Round Tower. Verso el çentro emo fato un bel gireto a piè e se sen sentà fora in un bel pub a St Kieran Street, una dele principali. Kilkenny l’e na cittadina medievale, ghe un bel castel grando che el gà la vista sul fiume Nore e su un parco grandissimo, tegnuo da dio ndo gli Irish i va a portar a pasegio el can, a zugar coi butini e i va anca a corar. Dal fiume se vede l’altra parte de la cità e un bel ponte. Ghe tanti localini modeni ma anca pub tradissionali ndo bear, magnar e far quatro ciacole. Oviamente gli Irish no i magna tardi la sera e i sèra le cusine par le nove o diese masimo. El giorno dopo semo ndè in serca de un po’ de ciesete e bassorilievi su tori e je tute in vilagieti super picoli e nascosti. Le indicassioni tipiche je del tipo: al cimitero sula sinistra gira a destra par l’uficio dele poste (che l’è verdo) e va drito fin al primo campo de cavre…se sen capii? El tuto in un acento che fa invidia ai nostri veci. Ben soma, lè così che emo guidà par un po’ a Ovest e emo sercà el castel, cioè le roine de Baleen Castle del 1647, a Freshford. I paroni no i gh’era ma emo deciso che, dopo tuta la strada fata e la fadiga par catarlo, l’era meo darghe n’ocio. El castel l’è in un campo privato dei signori Bowling e l’e circondà da filo spinà ed elettrico. Che l’è elettrico lo so parchè quando stavo scavalcando o ciapà la scosa. “Da fogo!” me son dita, deso rido ma in verità o ciapà un bel spaento! Par cui cari butei: mai scavalcar un campo Irish! Da Freshford emo ciapà na “scorciatoia” par ndar a Clomantagh ndo ghe un castel del XVI secolo. Se sen perse nei boschi. Emo fato un po’ de stradine a dopio senso con un saco de curve ma ala fine seguendo le istrussioni de un vecio col can (ala prima a destra gira…) emo catà la strada principale e, dopo un poco, el castel. La tersa tapa l’è sta nela contea de Tipperary a Cashel, ndò i fa el sidro, ma noialtre sercavimo sempre un castel. In realtà ghe na roca medieval stupenda che la se vede za da la strada e par de esar in una favola. Sula roca ghe na cattedrale gotica tuta in roina, sensa teto e con dei muri ricostruii ma se vede chiaramente certe decorazioni e ghe na parte che le medievale del 1100. Fora se vede un paesagio da cavar el fià e ve lasso n’altra de le foto che o fato che un po la rende l’emossion proà. Da Cashel emo deciso de ndar verso el mar a sud e emo scelto Wexford come meta final de la giornada. Arivà là emo parchegià al porto e fato un gireto par vedar de prenotar un Bed and Breakfast. Dopo un po’ de giri ne emo catà uno con tri posti liberi, un bel bagno pulio e un oste che balbettava ma simpatico. In realtà Wexford no l’è che la sia bela, le picenina, sporcheta e un po’ triste sinceramente parlando. Alora emo deciso de ndar a magnar ne na pisseria ndo, pasando prima, ne parea che el profumo el fusse bon. Ghemo meso un po a ricatarla ma ghe l’emo fata. Ovio che la pissa qua no l’e che la italiana ma l’era la più bona che o magnà fin desso. Se capitè da chele bande domandì de “Robertino”. La domenica emo fato na bela colassion, le me amighe le sa aventurà con un Irish Breakfast con panceta, ovi, salsicce e fonghi. Le gha tuta la me amirassion ma mì no ghe lo fata! Visto che l’era el nostro ultimo giorno de tur dovevamo scomessiar a riavicinarse verso nord. Emo fato un po’ de costa e a metà matinata se sen catà in un paesìn ciamà Rosslare sul mar. Che emossion vedar el mar, ma che fredo però! ( stan che vien Puglia o Sardegna butei, mi ve lo digo! Almanco par l’estate un po de caldo…). Par finir prima de ritornar a Dublìn emo fato sosta a Wicklow, çitadina de mar, colorata e con tanti localini carini. Pinta e pranzo lì e dopo de ritorno par le sei de sera con un po de tristessa ma…lo rifaremo presto..deso che saven che guidar no le sto gran drama! A la prosima aventura!… Evy

L'è rivà San Patrissio
“San Patrissio vien de note co le scarpe tute rote…col capèl de la Befana…” Forse sbajo storia… Carnival in Irlanda? Più o meno Desmentegheve fritole e spiuma da barba: qua ghè San Patrissio chel porta: gnomi, fatine, carri, gente in mascara, teatro de strada, bande americane e la famosa parada. Tanta, tantisima cagnara, i pub i se impenisse de gente e le strade le se impissa de alegrìa. Finalmente le giornate jè pì longhe e la primavera a le porte. Per Paddy’s day fameie, butei e maraje varie (tanti turisti) jè in giro a far bordél. Gh’è sinque giorni de festa anca se chel pì importante l’è el 17 de Marso giorno de la morte del santo nel 461 d.C. che se celebra con la famosisima parada Visto che ve voi ben e che ho scrito poco sti mesi, ve “regalo n’anticipassion” e un po’ de storia de sta festa. Inansituto Patrissio l’e chel, che l'à butà fora tuti i bissi da l’Irlanda con un campanèl, l’è partìo da la ponta de Croagh Patrick, 'na montagna alta 765 metri, meta al dì de ancò de pelegrinagi crisitiani. Infati, picola curiosità, qua in Irlanda no ghè bissi (de chei veri!). San Patrissio l’à cristianizà tuta l’isola, l’à fondà un saco de cése che se cata sparse su tuto el teritorio. Patrissio el ghe spiegava la religiòn a la gente usando un serfojo (trifoglio) che'l simbolegiava el conceto de Trinità: Padre, Figlio e Spirito Santo. El serfojo, ciamà Shamrock, l’è ancò el simbolo de l’Irlanda (insieme al’arpa dei bardi) e qua, par mascherarse, i se le pitura in facia. Eco alora che par selebrar ‘sto Santo Santisimo i nostri amici irish i fa i bagordi e, tanto par cambiar, i bee un par de pinte. L’e un carneval!!! San Patrissio l’è festegià dapartuto in ogni cità e vilagieto irlandese ma, fator comerciale molto importante, l’è festegià in tuto el mondo. A Boston par esempio i colora el fiume de verde, infati sta cità le molto conossùa par éssar stà in pasado meta de migrassioni irlandesi. A Verona sicuramente ghe sarà dei pub che festegia “in verde” la giornada e alora: piturive la facia de verde, tachì na bandiera irlandese a le finestre e via coi festegiamenti! La festa Nasionàl de St Patrick (Paddy’s day) la scominsia el 12 de Marso fin al 17, giornada de la parada. Eco el programa par quanto riguarda Dublin: 14 de Marso - Cacia al tesoro: divertimento asicurà par tute le età! Con la scusa de catàr el tesoro se scopre la cità Skyfest: zughi pirotecnici spetacolari e musica; 15 Marso: Merrion Square la diventa na piassa con eventi sparsi ndoe de certo no se se stufa; 17 Marso. La Parada!!! Da no pèrdar, màscare, ospiti dal’estero, bande Cèilì Mòr: el pì grande evento de dansa e musica tradissionàl irlandese con la famosa Kilfenora Cèilì Band Durante tuti i giorni del festival ghe sarà eventi musicali, spetacoli in gaelico, teatro da strada. Spero de vèdarve in tanti… mi laorerò piturà de verde, ma dopo le 4 TUTI “IN PIASSA”!!! Ve speto… Par informassioni sui eventi sparsi par l’isola o par averghe magiorni info ‘ndazì su:http://www.stpatricksfestival.ie/cms/home.html
Evy

Ciao Nona
A olte so de esar un po introversa. Ma, almanco sta olta, sento el bisogno de sfogarme e condividar chel che sento nel cor. Sabo, el 28 de lujo, la me cara nona Rina l’è morta e la sa portà ja na parte de la me vida e de mì, par sempre e cissà ndoe. L’era vecia, la gavea 94 ani, l’era nata nel tredese, la stava tanto mal puareta.,l’è meo cosita forsi... Quasi sento ani de vida, sento ani de vera e pura storia italiana. El nostro dialeto che parlaìmo, chela particolar s-cieta lengua de la campagna veronese, del sol, dei fosi, de la bruma e de le nebie…e ancora, de do guere, dei treni, dei dolori e dele picole felicità. Come dopo de la mesa de Nadal, de drio la ciesa, ndoe se beea el brulè che broava e che savea de ciodi de garofano. O Signor, quanto che la me mancarà, gho ancora da domandarghe masa robe. Quando ero butina pensaa che la sarea visua par sempre. Begavamo tuto el tempo e mì pensaa che erimo così diverse e invesse, ala fine dela fiera, semo compagne. Tute e do dure e sciete. Uguali come do gosse d’acqua. Son distante, gho paura che non la riessa a catarme, a vedarme, a capir el senso de le mé scelte.. Ela vedova a 37 ani con trì fioi, mì a trent’ani su de un’isola foresta. Semo sempre stade do mondi difarenti. Semo sempre stè do anime compagne, istesse spué. El sangue no el conta bugie, le come se avesse sempre sentìo nel me cor la soferensa de le gure, la fortuna de magnar polenta calda, la solitudine del cor e l’usta de la campagna le matine de Inverno. L’onor de la famea e de la tera da sapar. Ma no ghé mai sta tempo de parlar de sentimenti, quasi come i fusse na vergogna o na roba da siori. Son cressua così col sò orto, con la salata piantà anche in giardìn, con na lavatrice che no bisognava tacar parchè le robe le se lava ne la brenta a man col saon. Le storie che la contaa del filò, de le letere del nono quando iera zoiini, de la sia Carilia con le quaie e i fogassini e ancora le ciacole sui beghi nei campi, le sporte de fraghe, de perseghi, dei pomi – mama quanti pomi che emo majà dividendoseli un toco par omo – e i radeci, -quanti radeci!- . Na vida così…visua con dignità e semplicità. Ancò gh'è el sol in Irlanda, dopo tanti giorni de acqua. O comprà dei crisantemi giali, come quei de l’orto, i ghà l’odor che me ricorda casa. O meso la foto de la nona sul davansal e na candela impisà par ela, così ovunque l’è la sà ‘ndo son. El sangue no el conta bugie. Era? Ciao nona, te sarè sempre nel me cor, grassie de tuto. Va, cara puarina, va a d’acquar le piante che mì nasio la tola… la to butina