La Rena Domila - La Renga - www.larendomila.it

Risoto col Tastasàl

Quatrosento gr. de riso Vialon Nano, tresentoçinquanta gr. de tastasàl, çento gr. de botiér, una spiga de ajo, çeola, nose moscà, formajo, brodo de carne.

Se tòl el riso e se lo buta ne la teja con un pò de brodo, un poco par 'olta se zonta el brodo quando el tende a consumarse. In un altra tejeta se prepara el ragù de tastasàl, con botiér, çeola tajada a strìcole sùtili e una spiga de ajo. El ragù el vien zontà al riso a 3/4 dela cotura. Consàr el tuto, con formajo e 'na gratà de nose moscà. Podì gustar 'sto risoto specialmente ne la Bassa Veronese 'ndoe jè specialisti ne le numerosissime sagre dedicade.

^ torna su ^

Risoto coi Spàrasi

400gr de riso Vialone Nano, 300gr de ponte de Spàrasi, 100gr de botiér, 1 litro de brodo, 1 cuciàr de oio de oliva, 1 seola, 'na spiga de ajo, parsémolo, sal, parmigiàn.

Se taja a fetine le ponte e le se fà frìsar con botiér, oio, ajo, parsémolo e seola tritada. Col resto dei Spàrasi se prepara un brodo fasendoli bójer par 30 min. Quando el sofrito l'à ciapà un color dorà se zonta la metà del brodo dei Spàrasi e se buta zò el riso. Sinque minuti prima che finissa la cotura se buta zò el resto del botiér e anca el formaio.

^ torna su ^

Risoto co' l'Anara

400 g. de riso Vialon Nano Veroneso, 800 g. de brodo, 200 g. de ànara masenà, 20 g de botiér, 20 g.. de oio bon, 40 g. de formaio grana, vin bianco, 1 carota, meza zeola, 1 gran de ajo, sgolmarin, sal e péar.

Meti a sofrizar le verdure ne la consàdura. Zontarghe l' ànara masenà par farla rosolar, métarghe el vin el sal e el pearo e farla cósar. Da 'na parte cósar el riso in 2 litri de brodo. Quando l'è coto zóntarghe el ragù de l'ànara un po de formai grana e portar in tòla.

^ torna su ^

Risoto co' la Ténca

1 Kg.Un chil de tenca, 400 gr de Vialone Nano, una çeola, 1 bicér de oio de oliva, 'na carota, un gambo de sèleno, basalicò, 'na spiga de ajo, sal e péar e un poco de parsémolo trità fresco.

Se lava ben la ténca, se la neta da le rèsche, molona e da la pele, e se cóse el tuto a lesso con le verdure. Ciapàr l'aqua de cotura par el riso. In una pignatina se sofrìse ajo, oio e parsémolo e se fa rosolàr la tènca par 10 minuti. Se zonta un poco de aqua de cotura dela ténca calda e quando la bóje se cóse el riso tegnendolo umido con sucesive zonte de brodo de ténca. A cotura ultimà controlàr el sàl e butar sora al riso el parsémolo trità.

^ torna su ^

Risi e bisi

300g de riso Vialon Nano, 300g de bisi sgranadi, 80g de botiér (buro), 50g de Panséta, 1 çeola, 1/2 cuciarin de parsémolo tritado, péar, sal e Parmigian a piaser.

Se sgrana i bisi (picenini e no massa mauri), e se mete a bójer le scorse in aqua par çirca n'ora (così ve si fati anca el brodo par cósar el riso). Se desfa in un pignatin el botiér, la panséta a tochi, el parsémolo trità e la çeola, fasendo rosolar el tuto e zontando i Bisi con un par de mestoli de brodo caldo, portandoli a 1/2 cotura. Ora se unisse el riso col sal, péar, el resto del botiér e un poco de Parmigian e se finisse la cotura. Deve risultar un riso in brodo denso o un risoto morbido.

^ torna su ^

RUBRICA "LA RENGA"

Rubrica dedicà al magnar tipico de la tradission Veronese. In 'sti ani grassie soratuto a Giorgio Gioco e al contributo dei Veronesi semo riussì a realisàr 'sta rubrica con la speransa che Te piasa... Alora ciapa el piròn e meti le gambe soto la taola...

Disionario La Renga

asédo=aceto,

bicér=bicchiere,

binar=raccogliere,

bóiar-bójer=bollire,

botiér=burro,

códega=cotenna,

consàr=condire,

cortèl=coltello,

cósar=cuocere,

cuciàri=cucchiai ,

fàe=fave,

figadin=fegatino,

gratacasóla
=grattugia,

métar=mettere,

miòla de bò=midollo

molona=testa,

panséta=pancetta,

paparele
=pappardelle,

parsémolo
= prezzemolo,

péar=pepe,

pése=pesce,

pirón=forchetta,

pìsego=pizzico,

pomo=mela,

radécio=radicchio,

resche=lische,

sèleno=sedano,

gulmarin=rosmarino,

sofrisàr=sofriggere,

strìcole=strisce,

sùcaro=zucchero,

tendarine=tenere,

zeola-çeola = cipolla

zontàr=aggiungere.