Canpionato Dialetàl

El Canpionato del mondo de le tradissioni veronesi, un qualcosa de unico, par imparàr qualcosa e portàr la veronesità nel mondo. Ognuno de voialtri pol parteçipàr e no costa gnente, l'importante l'è gòdarse. Ogni canpionato finisse co' la consegna de le pergamene e dei premi durante la serata evento, par darghe la possibilità a ci pol, de incontrarse, far do ciàcole e passàr un momento in alegria. Varda le foto, lèsi le dimande e le risposte de l'ultima edissión.

 



REGOLAMENTO CANPIONATO 2019

REGOLAMENTO CANPIONATO 2019

REGOLAMENTO CANPIONATO v.2019

El Diretòr el farà de le dimande (da 8 par turno) che'l spedirà via imeil
(par 3 turni) a tute le squadre parteçipanti su:
-Parole dialetali -Storia de Verona, Provincia, Carnevale Veronese
-Cruciverba e Anagrama
-Cartoline vecie de Verona e Provincia
-Foto su l'arte a Verona e de cantoni sconti de Verona e Provincia
-Poesie
-Cultura Moderna Veronese
Le squadre le dovrà rispòndar entro un dato periodo (vedi p.4.1) al'indirisso canpionato@larenadomila.it

ISCRISSIONI - verte al 10 aprìl 2019 - Min 10 / Max 20 squadre
(in caso de nùmarose richieste el nùmaro pol aumentàr)
Par iscrivarse bisogna lésar tuto el regolamento e scrìvar a canpionato@larenadomila.it specificando:
-Nome dela Squadra (es. Paese, soranome, roba da magnar o qualsiasi altra cosa che la g'à a che far Verona e la cultura Veronese)
-Nùmaro Conponenti: da 2 a 4 Veronesi Provinsia – da 1 a 4 Veronesi fora Provinsia – 6 se presenti dei parenti (es.moiér o fioi ecc.) – Squadre miste da 1 a 4
-Nome o Soranome dei componenti (gnente cognomi)
(L' è vietado canbiar i componenti durante el canpionato)
-Indirisso I-meil del capitàn dela squadra (par ci vol anca un secondo indirisso) L' indirisso no'l pol essar canbià durante el canpionato.
-Logo de Proveniensa
-La Diression ve spedirà via imeil la conferma d'iscrission entro 24 ore da la data de spedission de la vostra imeil con un codice identificativo de squadra.
-Una 'olta iscriti vegnarà spedì la locandina ricordo del canpionato.
-No pol partecipàr al Canpionato ci l'è membro o ci l'è stà membro de la giuria (e relativi familiari) e/o ci colabora nel sito con rubriche storiche, cruciverba, proerbi, modi de dir. Ci l'a protestà o invià imeil de protesta no pol parteçipàr.

1.Canpionato:
1.1 Canpionato Dialetàl su 3 turni.
1.2 El Canpionato l'è a giron unico

2.Puntegio:
2.1 El puntegio el vien somà dal'inissio a la fine del canpionato. puntegio I° Turno + II° turno + III° turno.
2.2. In caso de parità de puntegio se varda ci l'à sbajà de manco.
2.2.1 Se persiste la parità se varda l'ordine de arivo dele risposte. Se in questa speciàl classifica la difarensa la risulterà inferior a 50 punti le squadre le sarà classificade a pari merito.
2.2.2 L'ordine de arivo el sarà convertì in puntegio e vegnarà publicado: es: 1° punti 200 - 2° punti 170 - 3° punti 160 ecc. (oviamente el vegnarà somà par tuti i 4 turni) tegnendo conto de velocità (1°-2°-3° ecc), giorno d'arivo (1°giorno-2° Giorno ecc), erori comessi ne le dimande.
2.3 La clasifica del canpionato la vegnarà publicada dopo 3 giorni dal termine del tempo de risposta.

3.Dimande:
3.1 El Diretor el spedirà a tute le squadre le dimande via imeil, sié par turno. Se par motivi tenici le squadre no le riceve le dimande, bisogna consultàr obligatoriamente el sito.
3.2 Come zà specificado ne la "Presentassion" le dimande i è divise par categorie
3.3 Le Dimande le vegnarà spedì la sera prima de la data stabilì entro le ore 22. In caso de problemi la giuria Ve risponderà entro 24 ore da l'invio de la "richiesta d'aiuto".
3.4 "No serVe essar poeta!" - Inventa 'na Poesia... La Poesia sarà composta in 8 righe; a esempio le righe dispari le sarà inserì dal Diretor (dopo aver siélto da le poesie del Berto) mentre le righe pari da le squadre. Deve vegnér fora 'na poesia de senso compiù. Vien premià soratuto "l'idea" e la "fantasia". Par eventuali erori de ortografia seremo un ocio, basta che no sia gravi da impedir de capir el senso, fasemo nojaltri le eventuali coressioni prima de publicarle. Le poesia le vegnarà composte a partir dal primo turno. 8 righe (se in più e in manco el voto sarà 0)

Un esempio:
Diretor: Eco qua mondo pitoco
Squadra: ...la balada de l'oco!...
Diretor: Drito in meso a la cusina
Squadra: ...su na teja picenina...
Diretor: Me comare moscardina
Squadra: ...ghe da 'na saladina...
Diretor: Che bisogna festegiar
Squadra: ...che diman 'ndemo al mar!

3.5 "Coeficente de dificoltà" se la squadra lassa le righe ne l'ordine proposto dal Diretor, le g'avarà un puntegio piassé alto. Se una squadra vol missiàr l'ordine de le righe proposto, ghe vegnarà cavà 1/2 punto.

4.Risposte:
4.1 Tempi de risposta via imeil a canpionato@larenadomila.it
I° Turno: dal 15-24 aprìl 2019
II° Turno: 02-10 maio 2019
III° Turno: 14-22 maio 2019

4.4 Se pol rispòndar a partìr da le ore 12 del primo giorno (ci risponde prima, el vegnarà considerà come ultimo a rispòndar).
4.5 Ci risponde: un giorno oltre el termine stabilido ghe vegnarà cavà 3 punti du giorni oltre el termine stabilido el vegnarà cavà 5 punti ci no risponde el vegnarà espulso
4.6 Ogni 'olta che se spedisse le risposte a canpionato@larenadomila.it, in automatico Ve sarà spedì un imeil de ricession da parte de l'organisassion. Se par caso non Ve 'riva la risposta de ricession entro poche ore, vol dir che l'organisassion no l'à ricevù nissun imeil da parte Vostra.
4.7 Ci risponde in maniera justa a tute le dimande e in poesia el ciapa almanco 6 (soto al 6 l'è considerà eròr), entro el 18 april nel 1° Turno -entro el 05 màio nel 2° Turno -entro el 17 majo nel 3° Turno, el riceverà in regàl 2 punti in più in classifica a la fin del canpionato. Con 1 eror 1 punto. El bonus l'è valido solo sui tre turni.

5. Par i partecipanti: A tuti i partecipanti che i à risposto a tuti e tri i turni, ghe vegnarà spedì via imeil el diploma de partecipassion....

Premiassion -  A le prime 3 squadre classificà ghe vegnarà consegnà la "Pergamena de la Veronesità". I posti disponibili i-è pochi, bisòn far richiesta al Diretòr.

5.1 Premi de Categoria
La squadra che risponde in maniera completa a le dimande (zontando altre informasioni a la risposta da dar) la gavarà el dirito al premio "Secia" e al capitàn ghe vegnarà consegnà el premio "Testina da Brodo". altri premi:
Premio Asso de Cope = A la squadra seconda clasificada
Premio Sinpatia = Par el nome pi bel votà da le squadre partecipanti
Premio 8° Concorso Poesia Barbarani = A la poesia pi bela
Premio Mastino = A le squadre più combative che le rimonta almanco 8 posissioni in tri turni.

p.s. Ci parteçipa al canpionato l'è obligà a presentarse a la serata de premiassiòn co' almanco un componente (a parte i veronesi fora provinsia). El canpionato l'è 'na festa par Verona, par ci parteçipa e par ci organisa che ghe mete l'ànima, la Vostra presensa l'è fondamentàl par la riussida!

6. Concorso de Poesia Berto Barbarani: A la poesia più bela (p.3.4) vegnarà consegnà una cartolina-diploma inedita del grande Berto Barbarani. Par entràr tra le candidate al premio, te devi rispòndar in maniera giusta a 1 dimanda par ogni turno.

7.Reclami: IscrivendoTe al canpionato, Te si d'acordo sul regolamento in tuti i so ponti chi de sora indicadi e del giudissio insindacabile dela Diression. Dunque l'è proibido reclamàr. Ci reclama durante el canpionato el vegnarà espulso.

8.Conclusioni: Lo spirito justo par partecipàr al Canpionato l'è: -Averghe voja de imparàr qualcosa de novo. -Contribuìr con la propia sapiensa a la divulgassión de la nostra léngua. -No preocuparse se i risultadi jè negativi, non sà mai finìo de imparàr. -No 'bandonàr el Canpionato in corso, bisogna savér ciapàr anca i risultadi negativi, avendoghe così anca rispeto par ci organisa e de ci partecipa. -L'importante l'è parteçipàr, parchè quel che deve vìnsar l'è la léngua veronese.

P.S. Come da lege su la Privacy i dati de persone, indirissi imeil dei partecipanti non vegnarà ne distribuidi e ne publicadi sensa l'autorisassión dei interessadi su internet o altri sistemi de comunicassión. Questi dati i vegnarà utilisadi solo par comunicassioni tra La Rena Domila e i interessadi par invio dimande e/o informassioni relative al canpionato o al sito.

I CANPIONATI - LIVRE D'OR

I CANPIONATI - LIVRE D'0R
Edissión 01-2000 Primo Canpionato - Viva la pearà
Edissión 02-2000 Trofeo Barbarani - Viva la pearà
Edissión 03-2001 Trofeo XII Apostoli - Viva la Pearà
Edissión 04-2002 Trofeo Botega del vino - I Tri Dotori
Edissión 05-2003 Trofeo Papà del Gnoco - El Cavàl de Gonela
Edissión 06-2004 Trofeo Verona Rateriana - I Cavassini
Edissión 07-2005 Trofeo Tomaso Da Vico - La Famèja
Edissión 08-2006 Trofeo Porta San Zèn - Fritàja co'la sèola
Edissión 09-2007 Trofeo de l'Adese - Straca Massele / Bala che vegna
Edissión 10-2008 Decimo Canpionato - Butelèti sensa buganse
Edissión 11-2009 1°Trofeo Al Camiere - Fritàja co' la sèola
Edissión 12-2010 2°Trofeo Al Camiere - Le Ave Mate
Edissión 13-2011 3°Trofeo Al Camiere - I Du Falcheti
Edissión 14-2011 Cenpions Lig Trofeo de Santa Lussia - Taca la cola
Edissión 15-2013 4°Trofeo Al Camiere - Pescantinopoli
Edissión 16-2014 5°Trofeo Al Camiere - Fritàja co' la sèola 
Edissión 17-2015 Trofeo Sandokan - Dighe ochi ti a le ànare
Edissión 18-2016 Trofeo San Roco - Élo gnente?
Edissión 19-2017 2°Trofeo San Roco - Le Ave Mate
Edissión 20-2018 3°Trofeo San Roco - Elkjaer Sindaco

>> tute le edissioni

SQUADRE PARTECIPANTI 2019

SQUADRE PARTECIPANTI
01-Garbéto & Malmaùro 2 Verona
02-I Sogni 3 San Michèl
03-Ave Mate 3 Sanguinè/Regio Emilia
04-Ganassoni 2 Toronto (CAN)
05-Elkjaer sindaco 2 Stadio Golosine
06-Fritaja co' la Seola 2 Verona
07-Tochi tochéti tocòni de pan 3 Bussolengo/Pescantina/Áesa
08-I Fioi del Bandàr 3 Stadio/Borgo Milàn
09-I Cavalèri 4 San Roco de Quinsàn
10-En Monte e 'na val 5 Lugo de Gressana / Breòni / San Martìn
11-Cani dal porco 6 Quinsàn
12-Ossi da brodo 6 Verona çity
13-Dighe ochi, ti, a le anare! 3 Becasieta
14-Trio Paloma 3 Corubio, Parona, Somacanpagna
15-Bele Muse 3 Barçelona (CAT)
16-Sempre VerTo 2 Bionde Cèo
17-Polenta e Fasói 2 Porto Alegre (BRA)

DIMANDE & RISPOSTE 2019 1°T

PRIMO TURNO


1. In quale cèsa catémo le inissiali W.S.M. sora a l'organo?: p.3:
a) San Tomàso <
b) Santa Maria in organo
c) Santa 'Nastasia

Le inissiali W.S.M. le se cata sora l’organo de la cesa de San Tomaso Cantuarense (o Becket), tacà al Ponte Novo. W.S.M. vòl dir “Wolfgang Salisburgensis Mozart”, cioè el Wolfgang Mozart de Salisburgo, a testimoniansa del pasajo del musicista che l’ha sonà l’organo el 7 genar 1770, vinti giorni prima che’l compisse 14 ani. La so bravura, nonostante l'età, l’era zà conossùa e facile che l’esibission ne la cesa veronese la sia stà grandiosa.

2. Cassiodoro, ministro de Teodorico in un documento del VI° sec. el parla del vin veronese: p.3
a) Acinaticum <
b) Gargatùm
c) Amarognum

El teritorio de l’est veronese in epoca romana l’era un pagus, cioè un distreto de campagna circoscrito. Intorno ai comuni de Ilasi, Colognola ai coi, Monteforte d’Alpon e Soave se estendea la coltivassion de vegne pregiè e come se fasea in Valpolesela gh'èra l’usansa de consumar vini dolzi otegnui da ue passìe. I vini sechi ciamè “correnti” j-era manco aprezè e quasi ignorè. ‘na testimoniansa sicura che parla de un vin bianco dolzo simile al recioto de soave del giorno de ancò ne vien tramandà dal senator Flavio Magno Aurelio, più noto come Cassiodoro (450 – 593 d.C.). In qualità de ministro del re dei Ostrogoti Teodorico, ne le so epistole el se racomanda sempre de no far mai mancar su la taola real i vini veronesi prodoti da ue bianche, che secondo lu le g'avea “il chiarore di una lattea bevanda,; trasparente purezza e bel candore, sicchè parrebbe spremuto da gigli… Pari la squisitezza del profumo, la soavità, l’intensità e l’acutezza del sapore e la qualità di donare subito forza e energia”. Con el stesso procedimento usà par el recioto de la Valpolesela el ne parla de apasimento: “Si sospende sulle stanghe l’uva scelata in autunno dalle migliori viti, già asciugata sui graticci; si essica col tempo, esalando gli umori acquosi, e soavemente di addolcisce. Solo in dicembre, allor che tutte le cantine hanno il vecchio, qui scorre il vino nuovo : succo invernale,freddo sangue dell’uva, cruento liquore”.De Cassiodoro se ricorda anca un’epistola invià al Canonicario di Venessia, indoe el dimandava de poder aver ‘na grande quantità de vin veronese par la corte del re. (Ave Mate)

e.......Nel 1177 ‘n decreto de’ Imperator Barbarossa uficializzava el nome VALPOLICELLAE teritorio de produssion de’ prestigioso Acinatico. (Fioi del Bandàr)

3. Métar in ordine dal più grando al più picenìn: p.3: B C A
a) Sèrfoio
b) Persegàr
c) Sgulmarìn

4) Quale tra queste parole no l’è ‘na parte del corpo umàn: p.3:
a) asià < L’è un pesse tipo squaléto. Spinarolo in italian.
b) bombrìgolo
c) caùcia

5) In questa cartolina dei primi del ‘900 se catémo a p.3:
a) Albarè de Costermàn
b) Pesina <
c) Cavrìn
d) Roncà

La cesa parochial de Pesina l’e dedicà a San Gallo e a Luigi Gonzaga, costruia dopo el 1750 e consacrà ne l’ano 1769 dopo aver abandonà la precedente çesa de Santa Cecilia e de San Gallo presente da l’ano 1460 (quando Pesina l’e deventà parochia) ne la zona verso el castel. ‘Na scalinà la porta verso el terasso indoe sorge na maestosa faciada. L’e divisa in do, ne la parte inferior se verze al centro un gran portal (sormontà da fronton) , in quela de-sora ghe un finestron retangolar affiancà da le statue de San Gallo e de Luigi Gonzaga. Al sommo un gran timpano che el tien ‘na croce fra du vasi con fiama. Sie lesene, con basamento de piera le orna la faciada. Dentro ghe quindese tombe ( nove nel coridoio e sie in quel lateral) con sigilo de marmo bianco e rosso. El sofito l’e a botte con u n aceno de vela verso le finestre. Sul retro de la faciada ghe ‘na bela cantoria in legno sostegnua da do colone anca lore in legno con organo del 1791. Quando se va dentro da la parte sinistra ghe ‘na nichia sarà da un canceleto in ferro batuo, indoe se trova el batistero con ‘na vasca de marmo bianco sostegnua da un angelo e un tabernacolo par i oli santi. Ne i muri da le parti gh'è cuatro capele con altari de marmo pregià, policromi el tuto in stile baroco. Da la parte destra el primo altar l’e de l’ano 1766 e el ga ‘na pala de Giovanni Battista lorenzi ( 1741 -73) chel rapresenta drento un drapegio sostegnuo da angeli ‘na Madonna con bambino fra i SS. Antonio da Padova e Luigi Gonzaga. El secondo altar l’e dedicà a la Madona del Rosario e el g'a ‘na statua artistica de la Vergine. Da la parte sinistra el primo altar l’e dedicà a San Giacobbe e el contien ‘na pala atribuia a Giovanni Caliari. El secondo altar de l’ano 1764 l’e dedicà a San Giovanni Evangelista, santo che catémo ai piè de ‘na Madona con Bambino e Angeli ne la bela pala de ignoto pitor veronese (I.B.Z.) del secolo XVIII. El presbiterio l’e sarà da ‘na artistica balaustra de l’ano 1767. L’altar magior le sta voluo da Almerigo Gonzaga, principe de Castigione, anca la pala del coro le sta comissionà da lu e piturà da Francesco Lorenzi ne la seconda metà del XVIII secolo. Da la parte destra de i muri ghe piturà San Luigi che fa voto de verginità, San Luigi e la Madre, de sora San Luigi col padre, soto San Gallo col demonio soto forma de drago e San Carlo chel libera una osessa. Ne i muri de sinistra nela parte de sora ghe San Luigi con i apestè, San Luigi e la Madonna, la morte de San Luigi, soto se pol védar la pesca miracolosa, San Gallo chel distribuise el pan ai poareti.
Nel mezo de la parete destra se trova el pulpito, longo i muri ghe la via Crucis. Su la sinistra de abside (che guarda nord-ovest) gh’è el campanil con orologio e concerto de çinque campane, sul pinacolo el finisse con un angelo. (Ave Mate)

foto 01 21

6. 'Ndóe se catémo? p.5
a) San Gioàni in val
b) Santi Apostoli
c) Arche Scaligere <
d) Giardin Giusti

La statua la se ciama proprio Verona e la se cata in sima a uno dei piloni de la recinsion de le Arche Scaligere. Antonio della Scala nel 1382 l’ha fato far el recinto intorno al çimitero co le arche più grande. Sora ai pilastri l’ha fato métar quatro statue alegoriche feminili. Do su via Santa Maria Antica, par ricordàr el dominio su Verona e anca su Vicensa (defati le statue le gà in man dei modellini de cità). Le altre su via Arche Scaligere a dimostrassion dei valori su cui l’era basà el potere scaligero: Temperansa (na dona che uda l’acqua e ‘l vin da do broche) e la Giustissia (impersonà dala biblica Giuditta che tien par i cavei la testa tajà de Oloferne). Le statue originali je al museo dal ‘67 par motivi de conservassion, invesse sul recinto de le Arche ghè le copie dal 2014, grassie a Louis Vuitton. Le 4 statue jè stade fate dal steso scultor anonimo. Una de le do personficassioni de cità no la ga el mantel e al posto de la corona la gà un cerchio fermacavei, par distinguerla da Madona Verona sora la fontana de piassa Erbe. (Trio Paloma)

foto 02 21

7. In questo particolar de ‘na tela de Domenico Macanzoni 1803-1873 (Galeria d’Arte Moderna) se catémo: p.3 
a) Nel piassàl fora Porta San Giorgio
b) Nel piassàl fora Porta Nóa < I Du campanili l'era un aiuto San Luca e SS.Trinità)
c) Nel piassàl fora Porta San Zen
p.s. Quando un giorno g’avì tempo, con calma, ve consiliémo una visita a la Galeria par butàr un òcio al resto del quadro e a le tante òpere presenti

Sto quadro el se cata a Verona ne la galeria de arte moderna a palasso Forti piturà da Macanzoni Domenico nato a Verona el 2 de febrar de l’ano 1803 da Chiara Ferrari e Lodovico, con lu l’a colaborà ne la decorassion de palassi veronesi. Al Macanzoni ghe piaséa realizar i paesagi metendoghe de le invension, ilussion e sogeti alegorici. Difati nel dipinto Fora de porta noa l’a interpretà a modo suo la veduta urbana. (Ave Mate)

foto 03 21foto 03 21 2

8. Questa pianta al Giardin Giusti l’è deventà famosa parchè soto: p.3 
a) Dante e Beatrice i s'a basà
b) Napoleon el g’a sconto i resti de so moiér
c) Ghe sponsava el scritór Goethe <

Se trata del cipresso de Goethe,ala so ombrìa el scritor todesco el s’ha fermà a sponsàr in via de andàr a Venessia. El se cata de fronte a l’entrata çinquesentesca, un vial de çipressi deventà famoso che’l riva fin a na grota de stalatiti, sovrastà da un mascaron che par che ‘l buta fora lengue de fogo. El giardin el conserva ancora intàte tute le statue del 500: fontane, grote acustiche, pergole, bossi al’italiana, statue de miti e un labirinto che par chel sia tra i più veci d’Europa. (Trio Paloma)

foto 04 21


DIMANDE & RISPOSTE 2019 2°T

SECONDO TURNO > stampa le dimande

1) A fine ani '80 de l' ‘800, Emilio Salgari sul giornal L'Arena, ne parla de le grandi esercitassioni militari a pochi chilometri da Verona. Secondo l'articolo, tanta zénte l'è corsa a védar: p.5

a) Quel restà del campanìl de Lugagnàn ciapà da una bala de canon
b) El tren de Re Umberto andà fora binario tra i forti de Dossobon e Lugagnàn
c) El volo a 250 metri de altessa de un balon aerostatico sora un forte tra San Massimo e Lugagnàn <<<
d) I laori par el primo colegamento telefonico tra San Massimo e Lugagnàn

Nel giornal la “Nova Arena” le sta publicà tra el 21 e 22 lujo 1887 uno scrito de Emilio Salgari che l’era inviàda la redassion a asistar le manovre militari al forte de Lugagnan vizin a Verona, quelo costruìo dai austriaci dal 1860 al 1861 ciamà da lori “ WerkPrinz Rudolf” in onor de l’Arciduca d’Asburgo e Lorena,el principe ereditario d’Austria – Ungheria catà morto dopo el 1889 con la so amante de 17 ani a Mayerling. Eco qua el so articolo:  “Ieri sera verso el tramonto semo andè al forte de Lugagnan con l’idea de asistar al bombardamento noturno che se disea el fusse tanto belo. La sera l’era stupenda a ocidente el sol el calava rapido in mezo a un mar de fogo fasendo scintilar i veri de le case e de le casete che le circonda San Massimo. Tirava n’aria fresca fresca che la portava ciaramente a le nostre rece le canonade che vegnea sparè dai forti de Lugagnan e Dosobuono e da le baterie de i dintorni. A San Masimo se semo acorti de la vicinanza del campo. L’era un continuo andar e vegner de borghesi ci a piè ci in carossa e dei soldè de tute le armi. Ora un artiglier che passa, con il fusil in spala e el mantel streto al peto, ora un bersaglieri mpolvarà, sudà, nero dal sol, ora un drapelo di fantaccini, ora una conpagnia de soldà del genio con la zapa o el bail su la spala e elfusil con una baioneta inestà su l’altra. Uficiai de artiglieria e fanteria i galopa innazi e indrio, ci va al Comando, ci va al forte. Insoma l’e ‘na procession continua, avarià che soleva la polva fissa fissa che in poco tempo l’imbianca e la cieca. A 500 passi dal paese scomizia i campamenti. A destra e sinistra de la strada tra i morari e la polenta vedemolonghe file de tende, bianche le une, gialastre le altre, po’ cani e cavai in quantità e dopo tanti fasci de fucili, dopo soldà de ogni arma che i andasea avanti e indrio traverso el sol. Tuti i dialeti de Italia iera riunii . Qua se ride, la se canta, piasse distante se conta le fole o se discute sui tiri de la giornada. A sinistra ne la strada jèacanpà l’8° artiglieria e el 68° fanteria. Verso S. Lucia ghea campà el 67° e quando el canon el tase se sente i urli dei soldè. A le sièrivemo al forte de Lugagnan. Qua el movimento le ancora piassè vivo. Le strade je piene de caroze e cavai, de curiosi e de soldà. El canonegiamento che prima jera forte adesso l’à desmesso. Sora al forte ghera ancora ‘na gran nùola de fumo biancastro e n’altra piasse picola la ondegiava verso el paese de Lugagnano cupà dal nemico. Superemo la ferovia da campo a scartamento ridoto che la unisse tute le baterie col forte. A la nostra sinistra dedrìo a ‘na trincea, vien fora le ponte de do enormi canoni Krupp che a quanto i ne disej’eincaricà de batar Santa Maria de Sona. Su la trincea camina do sentinele col fusìl armè de baioneta par tegner distanti i curiosi da la bateria. Se sente urlar:” Pronti! fuoco!” Da la grande boca del canon piassè vizin emo visto vegner fora ‘na grande fiama che l’a mandà in aria tanto fumo bianco e tante sdinze; subito dopo un gran boto seco seco l’a rimbombà. Elcontracolpo de l’aria l’està così violento chel ‘na fato andar indrìo de qualche passo. Messo minuto dopo l’altro canon l’a sparà con altretanto ciasso. A quela dopia provocassion un lampo el sa visto in diression del paese de Lugagnan: l’era un colpo del nemico. Dopo che le tre canonade lì gh’è sta tuto silenzio, e semostàavisè che no se sarìa mia sparà fin a note fonda, alorasemoandè verso San Massimo. El colpo d’ocio che dasea i campamenti con chel scuro lì l’era proprio belo. In mezo ai campi tra i morari e la polenta, tra le tende e i cari, i foghi i brila a zentinari e i se specia sui fassi de fusii. Chì se prepara el magnar de la sera e se vede ramine e gamèle, là i scherza i ride i urla i canta. J’e tuti alegrie purj’afatigà tuta la giornada soto el sol che scota. Intorno a ‘nato la iluminà da tante lampade se vede ‘na sessantina de uficiai de tute le armi che magna, anca lori in alegria. A San Massimo gh’è ‘na gran confusion,gh’è pien de gente da tute le parti, le ostarìe je stracolme con soldà, uficiai e done, par che ghe sia ‘na sagra o qualcosa del genere; ariva caroze da tute le diression.Apena catémo un posto par sentarse i vien a dirne che se stava par alzar l’aerostato e che i canoni i sta par sparar ancora El balon el se alza dedrio al forte de Lugagnan, l’era un gran bel globo de seda ingabià in una maja,elpol tirar su do persone; sotoghe ‘naçesta de paja con tanti sacheti da zavora. Ghe anca l’ancora se par caso el balon el rompe le corde. Quando semo rivà nojatri l’aerostato l’era tegnù a tera da ‘na ventina de soldà. El tenente del genio l’era za ne la çesta portandose adrio l’aparecio telefonico. Pian pian el balon l’a scomizià a alsarse andando su dondolando a 300 metri de altessa el balon el se ferma:l’è deventà picolo picolo e sentemo sonar la lasù la trombeta. Da tera se risponde al segnal e el telefono el scomizia a funzionar, L’uficial el comanda de far sbassar el balon de 50 m. eco che alora la machina a vapor la se mete in movimento la corda la se fa su, elbalon dondolando el se ferma a ‘na altessa de circa 250m. Eco se sente un colpo de canon e un baglior verso el forte de Lugagnan, un gran rimbombo seguìo da un gran silensio. Ma se saveache da li a poco sarìa ripartìo i colpi de canon. De punto in bianco e rivà un fasso de luce da dentro el forte de Lugagnan: l’e la luce eletrica piantà dentro al forte che la fa slusìr i veri de le case, le campagne e le baterie con un efeto belo e grandioso. Eco se riscomizia a sparar ancora, i lampi i se riflete su la superficie del balon che ‘l resta sempre fermo la in alto. L’etuto un colpo de luce de fumo e rimbombo de canoni. Anca i du Krupp i’asparà, con un efeto spaventoso. Dopo un squilo de tromba j’asmorzà la luce e tuto s’efermà. Silensio e buio par un’ora, e ancora luce: verso le coline de Sona. Poche canonade, un quarto d’ora e ancora buio. A mezanote emo visto l’aerostato vegner zo: ‘na ventina de soldà i là ciapà e l’a portà 3-400 metri piasse distante; du tenenti jera drénto a la çesta e el balon le andà ancora su de 300. Da li a poco sa ripreso a sentir i colpi de canon…. Insoma tuta la note s’a continuà cossità creando un bacan da paura. Se sentea un forte odor de polvar,ghera fumo dapartuto. J’era le 3 de la matina e tuti i canoni i sparava. A le 7 semo andà via da l’area del forte par tornar in çità ma emosentio ancora tanto sparar el canon verso Lugagnan e Dossobon. Volio un consiglio cari letori?  Andèal forte de Lugagnan e ste là ‘nanote, vedarì un spetacolo che ve conpensarà de la veglia, garantio. Stasera el bombardamento el vegnarà ripreso”. (Ave Mate)


2) Secondo el sistema metrico-decimàl veronese, presente ne le tabele ufissiali de l'800, che ne parla de pesi e misure, el "goto" l'è: p.3
a) cl 23,8 <<<< presente sul sito da scargàr (parlémo del sistema veronese, no de altre çità)
b) cl 25,0
c) cl 23,1
d) altro specificàr....

(Tochi Tocheti T.D.P.)
misura goto

3) Secondo un proérbio de la tradissión veronese, "el luàme de porco": p.3
a) va ben, solo, par consàr la salàta ne l'orto
b) no luama né canpo, né orto <<<<< presente sul sito
c) va ben par sgrassàr le pignàte de coto

4) Ne la "Càmara de i sposi" de Barbarani cosa catémo tacàdi al muro? p.3
a) un gran filò de santi <<<< Tute le poesie, 4 canzonieri, presenti sul sito
b) do suche marine
c) un vaso de fiori

5) Qual tra questi no l'è una problema de salute de i cavài? p.3
a) la riòma - catàr gastrico-intstinàl, malatìa comùn a equini e bovini, da rèuma = flusso
b) la paarìna o palarìna da no confondarse co' la pianta magnà da i ochi pavarìna, l'è la afta equina
c) la mònega <<<< scaldìn

6) In quali de questi comuni NO gh'è una césa dedicà ai SS.Fermo e Rustico? p.3
a) Messàne
b) Colognola
c) Sorgà <<<<
d) el Diretòr schersa, gh'è in tute e tri
 
7) In questa cartolina de fine '800 taià a tochi dal Diretòr se catèmo a: p.3
a) Giassa
b) Ferara de Monte Baldo
c) Campofontana<<<< su Gùgol bastava scrìvar (campofontana + cartolina)

canpionato

8) Completàr la poesia max 8 righe (no de manco), co' fantasia e bon senso; punti da 4 a 7. Se no te rispondi o te scrivi 7 o 9 righe, 0 punti, parole italiane/italianisàde 1/2 punto in manco. Te pol modificàr l'ordine de le righe.

Eco, quando l'anima l'è straca
anca la testa taca a scantinar.
Ma vegno a casa e taco via la giaca
e te cato che te me speti par disnar 
Da quel momento m'è andà via de paca
tuti i pensieri che me fa supiar
e me torna ne l'anima un po' fiaca
la contentessa che me fa cantar.
(Cani dal Porco v.7)

Da quel momento, m'è andà via de paca 
tuto el morbin che g'avea indosso
la contentessa, che me fa cantar 
el fiá de saltar de qua e de là del fosso.
Eco: quando che l'anima l'è straca, 
no ghe purghe, medissine, dotori..
anca la testa taca a scantinàr! 
sparisse i bei ricordi e resta i dolori.
(Dighe Ochi ti a le ànare v.7)




 

DIMANDE & RISPOSTE 2019 3°T

TERSO TURNO > stampa le dimande

1) La ceséta de Santa Maria de la Ciusara, ne la Bassa Veronese, l'è deventà famosa, parché durante dei laori de sistemassion, i g’a catà: p.3
a) Un sarcofago egizio
b) I resti de 'na dona murà viva <<<<
c) Una quadro de Picasso sconto soto l'altàr

La ceseta de Santa Maria de la Ciusara a Bonavigo, vissin al fiume Adese, la se presenta con una sola navata e con campanil in faciada; la gha le absidi nel spessor del muro, cosa abastansa nota nel veronese. Anca l’abside central l’è nel muro de fondo, ma la calota le sta troncada e retificà. I du contraforti costruidi alzadi de drio, al posto del semicerchio sporgente, i mostra ghe s’ha dovuo rinforzar la muradura par rimediar a un crolo ed evitar dani più gravi. La costrussion, fata de matoni completamente, la presenta anca trati de muri fati con quarei disposti a spina a pesse, e le stà rimanegiada varie volte, ma sempre rispetando lo schema inizial. La faciada l’è ornada de archeti pensili e la vede anca le lesene, roba insolita in un contesto del XII secolo e forsi ciapada dal muro de fondo. Le picole absidiole, simile a nichioni, le vede afreschi che se data entro el XII secolo, dandone la data de epoca romanica. Tute e do le pareti absidali le gha do santi in piè, ai lati de la monofora e una grande figura nimbada a mezzo busto ne la calota. Ne la calota dell’abside de destra, se vede un giovin santo che benedise, mentre soto ghe sta un prelato con un libro (l’orlo de la so veste la gha un motivo pseudocufico) e un santo con la lancia e lo scudo. Quela de sinistra la contien le figure de do giovini con na corona in man, con de sora un santo con la barba con i vestiti sacerdotali. Varie je stade le interpretazion de sti santi: ci dise che i presbiteri i sia santi vescovi, la probabilità che la copia con la corona i sia forse Vittore e Corona, e la certeza che el militar el possa essar un santo guerrier (se parla anca forse de Giorgio o Teodoro o Demetrio). Però le tuto arbitrario. La figura superior de l’abside su la podaria essar na version imberbe del Cristo, parchè come dise i studiosi, el ghe someja con quelo de la ciesa de San Piero a Caldier. Certo che però qua a Bonavigo i santi i risente de lo stil bizantin; probabilmente se trata de un artista, che’l se move anca a San Giorgio Ingannapoltron (abside Ovest) e sui pilastri a San Fermo Magior ne la metà del XII secolo.
I documenti i dise che sta ceseta le sta tegnuda dai Camaldolesi de San Michele de Muran; nel 1400 a questi ghe subentrado i frati de Santa Maria de Muran, e i ghe restadi fin al 1768, quando la republica de Venessia la gha tolto ai monasteri la cura de le ciese de campagna. Bonavigo, cussita, el gha avùo un prete del clero diocesan. El convento le sta sopresso e tuto quel che gh’era qua l’è sta messo all’asta e vendudo. Ci ha comprado sta cesa l’e sta un tal Luigi Zaccagna, chel s’ha vendudo tuto: s’ha perso dipinti e quanto gh’era detro. Agli inizi del Novecento, na bona anima, la fameja Mutti la l’ha comprada.
El campanil el gha na campana del 1503. Entradi in cesa, longo el muro de sinistra ghe un loculo, a destra de questo inciso su matoni se cata na epigrafe, in gotico corsivo che forse la ricorda la consacrassion de sta cesa, ma forse anca del loculo, cissà! Se lese: + ANNO DM MILL. CC. NONAGESIMO QUARTO INDICIONE SETIMA HEC … KMARSE FUIT HEDIFICATE OPR DM CONF PBRI ET RD EE sul primo quarel, sul secondo: CNST D ANO SECUDO e sul terso + E GOTEBALDUS (segue el sigil). Purtropo un tocheto de quarel le vegnudo so, quindi anca qua non tuto le ciaro. Ma insoma, se pol dir che dopo tanti studi questa le la tradussion: NELL’ANNO DEL SIGNORE 1294, DURANTE LA SETTIMA INDIZIONE, QUESTA chiesa dedicata a S. Maria (?) tabernacolo (?) FU EDIFICATA PER OPERA DEL SIGNORE, DEI CONFRATELLI SACERDOTI E DEL RETTORE DI DETTA CHIESA./CONSACRATA NEL SECONDO ANNO/ DA GOTEBALDO. La cesa le sta’ restaurada tante volte; nel catin de l’abside sta scrito “DOM RESTAURATA FUIT ANNO SALUTIS MDCCXXXVI”. Altri restauri sembra i sia sta fati nel 1901 e nel 1912. L’altar principal l’è sta fato in stile baroco nel 1705 da Francesco Zanetti, e el ghavea un tritico su tavola fato e firma’ da Leonardo da Verona, datado 1494 (se alega foto). L’è sta portado dai proprietari dal restaurator Coffani a Mantova, nel so studio a Palazzo Ducale, e posto in ambiente al sicuro. Ne la parte centrale ghe la Vergine in trono col Butin, a destra un vescovo e a destra San Gioani Batista, ne la luneta sora ghe el Padre Eterno. Gh’era anca la predela con tre tavolete, ma je stade vendude a pochi schei dal propietario de alora a un antiquario de Venessia. Come se diseva però, le cose più strane e importanti jè le absidiole con i afreschi de stil bisantin.A la fin del 1800 in ocasion de un restauro de la çesa i muradori i’à sentìo al fianco destro l’altar magiòr che batendo col martel sonava vudo, e verzendo questa parte è saltà fora una nicia che altro no era che una abside con tanto de afreschi rafigurante un cristo drìo a benedir, un vescovo e un santo guerier. Verzendo anca da la parte sinistra è saltà fora l’altra absidiola afrescada ma anca un cadavere de dona con una ciotola de fianco, da far pensar che la sia sta murata viva. No s’è mai capìo ne ci la fosse la dona, erela na monega, na strega o na prostituta? Però se sa che qua sta parte le stà murada nel XV secolo e ridota a fossa comune par le moneghe: infati jè stade diverse le ossa de scheletri feminili trovadi. La ciotola comunque ghe l’ha in casa i paroni. (Ave Mate)

2) Nel 1905 le cronache le parla che in località Savàl l’è nata una bestia particolàr: p.5
a) un vedeléto a do teste <<<<<
b) una cavréta a sié sate 
c) un musséto a righe bianche e nere 
d) ‘na pégora rossa
e) un cavàl sensa coa

Un vedél con do teste è nassùo a Saval (Quinsàn) nel 1905. Le do teste jera ben fate con i du coi che se zontava apena prima de le spale; tuti du completi de esofago e trachea. Anca el corpo l’era perfetamente svilupà. Par so sfortuna l’e morto durante el parto, particolarmente dificoltoso. L’e sta regalà dal sig. Salvi, paron de la bestia, ai fradei Cartolari par ampliar la “collezion zoologica” che i g’avea. (AveMate)

3) El famoso "Introl del Brentaròl" l'è l'antico nome de: p.3
a) Piassa Erbe
b) Via Quattro Spade
c) Via Fama <<<<
d) Via Emilei

4) In questa cartolina del ‘900 se catémo nel Comùn de: p.3
a) Roncà
b) Legnago
c) Vilabartolomea <<<<

foto 05 21

Se catemo nel comun de Vilabartolomea, esatamente ne la frazion de Spilimbecco, che anticamente l’era conossùa anca come Spinimbecco dal Gioberti. Nel XVI secolo,inizia le visite pastorali, con un zentinar de persone. De la cesa antica no se conosse date de costrussion, e no l’e mai sta consacrà, e mai la ghe sarà, come disea D.G. Galvani, forse parchè ghe volea el benestare di Giuspatronati, che no lo volea dar. Secondo D. Giacomo Meriggi de Azzalini, economo dal 1764 al 1780, la cesa l’e sta costruìa nel 1355 dai Sanbonifacio, con in dotazion 24 campi de tera. Questo el risultava da un antico inventario ormai perso. La cesa parochial l’e dedicà a Santa Maria Assunta, e l’era sensa sacrestia. Nel 1594 è sta scrito: “ ECCLESIA EST NOVITER CONSTRUCTA ET MULTA DEFICIUNT IN EA”. E ancora: “PAVIMENTUM ECCLAE ET PT ALTARIS MAIORIS ET IN CAPPELLA ILLIUS FIANT”. Tolendo par bona la data de costruzion de Meriggi, “NOVITER CONSTRUCTA” podaria essar riferìa a una ristrutturazion del XVI secolo. Tante notissie le riguarda la manutenzion, come “PROVIDET NE PLUAT Q TECTUM IN EA PARTE IN QUA EST CAMPANA” nel 1533 oppure “REPARETUM TECTUM ECCLAE NE DEPLUAT” nel 1716. El conte Marugolato nel 1594 ga vuo da Roma diverse Reliquie e messe soto el tabernacolo con scrito “ UT APPARIUT EX PUBLICIS SCRIPTURIS QUAE IN EADEM ARCA SERVANTUM”, mentre nel 1716 Mons. M. Gradenigo el dise che j’e “ A LATERIBUS ALTARIS MAJORI” e in gran numero “NONNULLAS SACRAS RELIQUIAS VISITAVIT”. Pure nel 1594 el conte Marugolato insieme al Retor i otiene dal vescovo de Verona, card. Agostino Valier el permesso de costruir una fonte batesimal “ REV.MUS D. EPUS AD SUPPLICAT; TAM REV. CURATI QUAM ILL.MI CONTIS MARUGOLATI SUPDICITI CONCESSIT EISDEM LICENTIAM IN D.TA ECC.A ERIGERE POSSIT FONTEM BAPTESIMALE UM REBUS ONBS NECESSARIIIS, ET FACULTATEM IN S. BAPTISM. SACRAM. MINISTRARE IUX RITUM SAE ROMANAE ECCLAE”. Ma Spinanbecco no ga vuo subito el sò battistero, el dipendea da Villabartolomea, e l’era considerà una semplice filiale. Anca i olii sacri i venìa custodii da Villabartolomea, “ SUB CLAVI IN FENESTRELLA”, come racomandà nel 1645 custodìe dal Retor “SEU PRO TEMPORE EXISTENTI ECONOMO”. Quando nel 1780 el scrivan Stefano Prando, su consiglio de Meriggi el scrive al vescovo in ocasion de una visita a Castagnaro, disendo che la colpa del ritardo l’e solo del parroco de Villabartolomea, se move qualcosa, e ne la visita del 1810 el risulta essar funzionante, al centro de la cesa in una “CAPPELLULA” La prima notissia de giuspatronato l’e del 1530, in Visita Pastoral ne la persona del conte Nicolò dei Sanbonifacio, confermà da quele del 1569 e del 1632. Da questa visita savemo che la ciave del tabernacolo de le reliquie l’era in man ai Sanbonifacio, e che mons. Giustiniani dopo che no l’a poduo vederle per mancansa de ‘sta ciave l’a decretà che “ MANDAVIT UM CLAVEM REMANERE APUD RECTOREM”. Tuttavia i boni raporti tra el Vescovo e i Sanbonifacio j’e sempre sta otimi, tanto che nel 1650 l’e sta la nobil fameja a presentar al Vescovo el novo Retor, e no el contrario come norma. “A QUIBIS ( CONTI DE SAN BONIFACIO ) IDEM RECTOR FUIT PRESENTATUS”. Nel 1740 Spininbecco l’e andà ne la vicaria de Carpi (“ SUBEST VICARIAE FORNAIAE DE CARPI” ma tuti i raporti con Villabartolomea j’e restà, come anca la facoltà di Sanbonifacio de nominar el Retor e anca el dover de mantenerlo. Nel 1844 altre fameje se zonta come Patroni: Bevilacqua, Lazise, Buri, e altre ancora nel 1886. Nel 1908 vien proposto de rinunciar al giurispatronato, che el finirà el 10 luglio 1910. (Ave Mate)

5) Questa pala d’altàr se cata in una de le cése de Verona, ne la capela: p.3
a) Varalli <<<<
b) Brenzoni
c) Pellegrini


foto 06 21

Nel 1618, in piena Controriforma, monsignor Giulio Varalli la voludo far sul fianco destro de S. Stefano na capela monumental par trasferirghe da la cripta e celebrar in modo degno le più importanti reliquie de le tante che se conservava lì. I lavori jè andà avanti par qualche ano, dal 1618 al 1621 e sto sacerdote el g’ha speso piussè de tremila ducati, tuti i so guadagni. A l’esterno se presenta come un paralelepipedo sormontado da un cilindro, pogiado a la fiancada destra de la ciesa e altro fin al querto. Dentro ghe se acede atraverso na grande apertura ad arco fata nel fianco del muro, in corispondensa de la seconda campata. Sui do lati de l’arco ghe muradi do epitafi simetrici in piera nera, solo uno el se leze, par avertir el fedel che ne la capela ghe custodide le osa de quatro degli inocenti copadi ne la strage de Betlemme, de quaranta martiri veronesi e de cinque santi vescovi de la cità. La pianta de la capela le un quadrato, su cui pogia quatro archi, uno de ingreso e tre ghe incornisa i cenotafi e le pale. Ala intersezione degli archi se alza quatro penachi afrescadi che racordava lo spazio cubico con el tamburo otagonal, coronado da na calota emisferica. La cupola le piena de stuchi che i incornisa oto afreschi de Virtù, mentre su la somità ghe la prospetiva aerea del trionfo del Padreterno. Le pareti jè querte da intonaco bianco con tanti stuchi che i forma cornise e motivi clasici ad altorilievo con riche dorature. Le grandi pale de altar le vede dopie cornise strombade ad arco. Le tele le rapresenta i tre grupi de martiri e santi le cui reliquie je stà portade da la cripta. I dipinti, jè stà fati da tre alievi de Felice Brusasorzi; de questi tre, el Turchi e il Bassetti i se trovava a Roma, dove jè stà infuenzadi da Caravaggio. Eco le opere: Alesandro Turchi (1581-1650) deto l’Orbeto (el papà l’era spadaro e l’era restà orbo, so fiol quindi l’è diventado l’Orbeto) l’ha rapresentado Il martirio dei Quaranta Martiri veronesi copadi soto Diocleziano, e la scena la se svolge in riva a l’Adese, el se trova a sinistra; Marcantonio Bassetti (1586/88-1630), abile ritratista ghe fu dato Cinque Santi Vescovi Veronesi sopra il cenotafio de destra. Parlemo dei vescovi Gaudenzio e Petronio del V sec., Senatore del VI e Andronico e Probo (no certa datazione). I volti dei vescovi i par ritrati, e qua se vede ben la lezion de Caravaggio. Pasquale Ottino (1578?-1630) l’ha fato la tela che le ogeto de la domanda, parlemo de la Strage degli Inocenti. La scena l’è cruenta e tumultuosa, du sgheri de Erode seminudi, i tien i butini in man. I se sfoga sui picoli corpi nudi dei butini tolte a le so mame e je tenudi da lori come animaleti da macelar. Le mame jè desperade, tanti butini jè a tera morti. Su lo sfondo palazzi e architeture i ciama a la mente una cità, forse Verona con i du arconi che ricorda i portoni de la Bra. A sto pitor se atribuisse anche i afreschi che decora la parte superior de la capela con San Francesco, San Carlo Boromeo, l’Arcangelo anunciante e Maria nei penachi; sora nel tamburo le alegorie de le Virtù, in alto el Padreterno. (Ave Mate)

6) Completàr el cruciverona - 1 p. a risposta:
17 rebaltà: Giuseppe in veronese BEPO
17 in pié: ingrediente dei gnochi de malga BOTIER
18 in pié: Te ghe roèrsi sora la polenta PANARA

foto 07 21

7) "Vorìa cantar Verona, a una çerta ora........de note, quando monta su la luna: ..........quando i boschi che dorme el par che i cora..... drento barche de sogni a far fortuna...." Con questi versi, scomìnsia el Giulieta e Romeo de Berto Barbarani ne l'ultima versiòn. Ci core ne la prima versiòn? p3
a) cani
b) òmeni <<<<
c) done
d) soldà

8) Completàr la poesia max 8 righe (no de manco), co' fantasia e bon senso; punti da 4 a 7. Se no te rispondi o te scrivi 7 o 9 righe, 0 punti, parole italiane/italianisàde 1/2 punto in manco. Te pol modificàr l'ordine de le righe.

Dopo disnar un vecio el fa do passi
el se tol ‘na bancheta, el conta i sassi;
alsa i oci e vede 'na casa andar a fogo
l'è el sesto pian del so' amigo cogo !!!
El s’a fermà su al quinto pian
parchè el calor l'era massa 'ntenso
e bisogna supiarse su le man
ma proseguir, no g’avéa mia senso.
(Sempre Verto - XI°Premio Barbarani)

L’è inverno, el vento fredo che te ingiassa
e bisogna supiarse sule man...
El s’à fermà su al quinto pian
gnanca pensarghe de nàr fóra in piassa.
Ma 'péna rifiorisse Primavera
dopo disnàr on vecio el fa du passi
el se tol na bancheta,  el conta i sassi.
el resta lì fin quasi che vien sera.
(Fritaja co' la seola p.7)

N'ociàda sul cantièr"
El s'à fermà su al quinto pian
el çimento strapegà co la çigagnola, 
e bisogna supiarse su le man
par no brusarse co' la corda che tirona.
Dopo disnàr un vecio el fa du passi
par controlàr come va i laòri:
el se tol 'na bancheta, el conta i sassi
inasiadi in un cantòn par trar su i muri.

(Garbeto & Malmauro p.7) 




CLASSIFICA  - 2019



Classifica finàl
class 03 2019
Classifica dopo el secondo turno

class 02 2019
Classifica primo turno
class 01 2019
** class.meil velocità (al momento +2 ponti a fine canpionato)
Class. meil:
1° risposte entro il 18 aprìl primo turno - 5 maio 2°t - 17maio 3°t
2° risposte  sbaià
3° quando iè rivà le risposte (ultime do colone punti e dif. in giorni minuti e ore)

FOTO PREMIASSIÓN

 








Pin It