El Canto del cor - poesie veronesi

La Rubrica dei Poeti veri e de quei in erba. Se te vol colaboràr anca ti e far conòssar le to poesie in tuto el Mondo, el nostro sito te mete a disposissión una pagina al mese in questa rubrica.... alora cosa te speti? scrivi a: dieserighe@larenadomila.it 


 

*Regole*

 

REGOLE


Regole:

1) La Redassiòn, no l'è responsabile de le poesie spedì dai nostri letori e in particolàr coàndo el materiàl no l'è propio e no autorisà da tersi.

2) L'è proibìdo publicàr le poesie sensa citàr autòr e sito.

3) La poesia, parchè no stufa el letòr, l'è meio che sia longa al max 32 righe, dopo te pol far quel che te vol, vedi Ti

4) L'è meio no parlàr de desgrassie o de pensieri filosofici, gh'è tanto da dir, le persone le deve passàr  du minuti serenamente

5) No parlàr de politica, gh'è altri siti che pol farlo e anca meio de ti.

6) Meio specificàr el logo de la to proveniensa

7) La Rena Domila, ciapa la to poesia e come da to autorisassión la vién publicà sul sito, ma no su altri sistemi de informassión.

8) I To dati no i vién distribuìdi a tersi, gnanca soto tortura (gatarissòle soto a i pié).

Gino Ubàldi


CON LA FANTASIA POL CAPITAR DE DIR...

che belo sarìa …
sgolàr con la chimera,
far sogni favolosi,
con alegria,
via da la monotonia,
pèrdarse con la fantasia
a cantàr in poesia;

che belo sària ...
parlàr con la luna
pituràrghe le spére,
dàrghe nomi a le stele,
cambiar in diamanti
le gòsse de àqua;

che belo sària ...
parfumàr el vento
de odorosa lavanda,
‘scoltàr ne l’aria
un’armonia de note,
falivàr i monti con perle e solitari;

che belo sarìa…
semenàr el mar,
de bùti brilanti
su le grèste bianche
de le onde blù

che belo sària..
védar boschi e foreste,
fòie dai mile colori
e su le rame a cantàr
pítari e rossignói;

che belo sària ...
vèdar farfale dai mile colori,
védar prè con mile fiori,
mile córi, mile amori;

che belo sarìa...
vìvar la vita
con più fantasia
longa o curta che la sia,
con mile desideri,
con gnénte de nero,
ma con tuto a colori...


Agostino Migliorini - Traensòl


EL FERAR

Na smartelà,
'n dièl schizà,
na gran bastiéma:

Dio, che mal
e che gran péna.

 

Silveria Gonzato Passarelli

SBOSSEGA

Quando de note
mi sbossegàvo,
savéa che te vegnéi
e sempre te spetàvo.

'Na sièla fata in casa,
de sùcaro un cuciarìn,
i to labri sul me viso,
le fetine de mandarìn.

Ti te me lassàvi
la luçe impissà,
te comodàvi le cuèrte,
te andài dal papà.

Ma solo par poco:
de novo te tornavi,
faséa finta de dormìr
e ti te me vardàvi. 

 

Luigi Ederle - Gressana


LA BALA DA FOGO
 

'Na bala da fogo
'l gh'éa 'l pòro Bèpi,
'l sercàa Dio e la Madona
che i ghe désse na man,
ma 'l pioéa e spianssisàa,
su la strada e sul marciapié!
Gh'éra par lu la procession,
omeni: alti grossi e duri
i ghe macàa ne la serùmola
e ogn'un 'l le butàa par tera.
Pòro can nessun na man... 
ghe daséa o 'l ghe disésse: "Ciao."
Stufo mòrto par le pàche 'ciapè,
'l s'à sentà sul pilòto,
e sopiàndo e 'l s'à dito:
"Ma che festa èla mai coesta?"
Pian pian, la bala la s'à sedà,
e lu coi oci demagolè l'à ìsto:
che la procession no' l'éra altro,
che la fila de olmi che gh'éra
fra la strada e 'l marciapié.


 
 
 
Pin It