'Na 'olta Verona

'Na 'olta Verona
'Na 'olta Verona
Le foto de Verona e de la Provinçia veronese nel '900, Un qualcosa de unico, par ricordàr quel che no gh'è più, divise par categorie. Piassé de 170 fotografie, una meio de l'altra, catà nel nostro archivio e nei marcà de l'antiquariato, che metémo a dispossissión dei veronesi. Se anca ti, te conservi una foto o cartolina de un tempo, te pol spedirla al nostro sito e noàntri la condividémo co' altri, scrivi a redassion@larenadomila.it Come no ricordarse del tram a Verona o de le lavandàre, de l'Isolo o dei ponti in fero, decantà da Barbarani e piturà da Angelo Dall'Oca Bianca! Te pol sgolàr su Verona come te fussi del '900....







> Le vie de Verona

 La Verona de un tempo

Vicolo Balena, poco distante da Via Quatro Spade. Ciamà cosìta parché un tempo gh'era 'na botèga che vendéa ossi de balèna, utilisà par le ventàle o nei busti da signora. Volto Barbaro a du passi da Piassa Erbe, 'ndoe el 26 otobre 1277 l'è stà copà Mastino I De la Scala, un tempo se ciamàva "Volto dei Centauri". El capitàn Zaccaria Barbaro nel 1476 l'à fato sistemàr 'sto logo; da quel mmomento l'à cambià nome. Vicolo Borella, de drio al Municipio; ci g'avéa i bordéi o "andava a putane" zugàva a le Boréle, un boowling a la veronese. Vicolo Borgo Tascherio, da Tasquerius; se cata, tacà a Piassa Isolo. Un tempo se tirava su le tasse in natura, poco distante da la Porta Organa e da le mura romane. Vicolo Botte tacà al teatro romàn; un tempo gh'era una fontana de piera a forma de boteséla. Vicolo Broglio tacà a San Zèn, da brolo, toco de terén coltivà a piante da fruta "brolo supra plateam que est ante ecclesia S.Zenoni". Piassa Broilo o Brolo del Vescovado nel XII secolo, deventà Platea Broli 'ndoe gh'era un marcà dei legnami. Contrada de la Cadrega. Secondo la tradissión, fin al XVIII secolo gh'era 'na stele romana de Cornelio Annone sestoviro, spacà, che paréa una "cathèdra", in veronese cambià in "carèga". Nel medioevo la contrà l'era ciamà "dei caliari" quèi che consàva la pel, forse nel tempo cambià in calegari, caregari, quèi che faséa le caréghe, artigiani presenti in compagnia de scarpolini e casolini. Campagnola, zona coltivà a orti a destra de l'Adese (Borgo Trento) anticamente ciamà "Contrada Sacco" (spianà nel 1517). In Piassa Cisterna a San Gioàni in val, se pol 'edar ancora una costrussión a forma de pozzo; un tempo ghe finìa drento l'aqua che vegnéa zò da al fontana de fero. Via de la Costa la g'a un simbolo caro ai veronesi, taca via soto al volto dal 1700 tra Piassa Erbe e Piassa Dante: la costola de un ittiosauro; i dise che sia stà un trofeo de una de le tante botéghe de spezie tacà a quele dei sogari (la via, nel XIV, l'era ciamà Bina Sogeriorum). In Vicolo Derelitti nel rión de San Stefano nel 1602, l'è stà fondà el pio istituto par i buteléti sensa genitori che i andàva a manghèl. Via Fama tacà a Corso Porta Borsari, un tempo l'era ciamà Introl del Brentarol ma nel 1704 catémo l'ostaria de la Fama trionfante ispirà a 'na statua  de Marco Marchesini murà ne la casa dei mercanti. Via Gazzera arente a via San Leonardo, g'avéa sede nel '700 la "Compagnia de la Gazzara" con òmeni e done, che tra l'altro faséa rapresentassioni teatrali nei giardini e parchi. Vicolo del Guasto tacà a la cèsa de San Matéo a porta Borsari l'era conossù come "Introl del Guasto". Ghe abitava nel '600 la famèia de Gio.Batta del Guasto "samitario" co' la botéga de seda apeciàl "sciamito". A la fine del '400, una cronaca parla che la famèia vegnéa da Pescara, co' el cambio de parola da Vasto a Guasto. Via Porta Organa tacà a Piassa Isolo un tempo l'era conossù come Via Ladri. Via Mazzanti a pochi passi da Piassa Erbe, prima del '500, ano in cui l'omonima fameja l'avéa crompà la casa, se ciamava Via dei Pignolati. Co' el termine "pignolà" un tempo se indicava el tessuto de fustagno. El Cortile Marcà Vècio tacà a Piassa Dante, dal 1400 aò 1631 l'era el marcà del gràn. Ciamà "vècio", parché quel novo l'è stà fato in Piassa Bra. Via Nizza tacà al Ponte Novo e Piasseta Pescheria, un tempo l'era conossù come Via Stallaggio Pesce. Piassa Pasque Veronesi un tempo "Piazzetta Case Abrucciate"; i du toponimi ricorda quando i francesi nel 1797 durante la Pasqua del 1797 i era in lota co' i veronesi. Dopo èssarse serà drento a Castèlvecio i è riussì a vegnér fora e tacàr fogo a le case Liorsi, Perez e Orti. In Vicolo Quadrelli arènte al Ponte Novo, nel '700, gh'era un deposito de calsìna e quarèi; Italianisà a fine '800 ne la forma atuàl. 

 




Pin It