El cantón de le monàde

Una rubrica molto particolàr che te fa passàr la tristessa e la te farà sicuramente sganassàr. Una de le prime rubriche del sito, nata nel lontàn 2002, nel corso del tempo la s'à sgrandà co' tanto de parchè e par come. No te resta che lèsar le curiosità, le barseléte o spedìr i to pensieri a La Rena Domila. Segnala anca ti qualcosa de "strano" che t'è capità. El cantón de le monàde l'è una rubrica 'ndóe l'importante l'è no pensàr a le desgrassie.Se par caso te gh'è una dimanda, qua te pol stàr sicuro che no te cati la risposta, se te vol imparàr l'inglese qua te pol stàr sicuro che te ris-ci de imparàr el todesco!
 



>DIMANDE SENSA RISPOSTA

DIMANDE SENSA RISPOSTA
01-Parchè se deve amàr el prossimo e no quél prima?
02-El soldà inamorado el pòl aver una licensa poetica?
03-La resa dei conti l'è una disfata nobiliàr?
04-Se pòl saltàr a piè pari anca col nùmaro dispari?
05-Se pòl naufragàr su 'n isola pedonàl?
06-Par svaligiàr 'na salumeria ghe vol el piè de porco?
07-Nela pissìna del Papa gh'è l'aqua Santa?
08-Se pòl tacàr via quadri clinici a le pareti del stómego?
09-La parole dolse le pól lassàr l'amaro in boca?
10-El ragioniér l'è na persona che conta molto?
11-I çentri nervosi i è quei con tanto trafico?
12-Un ocio vigile védelo le contravensioni?
13-Se pol lotàr par la vita e trascuràr i fianchi?

>SE TE ME SCOLTI

SE TE ME SCOLTI
01-Meio 'na galina ancó che 'n ovo dimàn.....firmà el gal
02-Se par la prima òlta el paracadutismo no'l te riesse, Vol dir che no'l fa par ti
03-No l'è belo quel che l'è belo, figuremose quel che l'è bruto
04-Penso che se dovarìa pagàr le tasse co' 'n soriso, g'ò proà, ma casso, i à volù i schéi
05-Mi s'éra convinto de éssar 'n amante ecessionàl, dopo ò scòerto che g'avéa l'asma
06-Gò fato l'amór con CONTROL, dimàn pròvo co' ALT e CANC
07-Ci trova 'n amìgo el cata un tesoro e ci cata un tesoro el se ciàva de l'amìgo
08-Un pomo al giorno el cava el dotór da intórno, 'na séola al giorno el cava tuti da intórno
09-Mi e me moiér semo stadi contenti par vint'ani, dopo se sémo incontradi

>'O 'ISTO COSE...

'O 'ISTO COSE...
01 - 'O 'isto un binario morto che'l spetàva de éssar sepelido 
02 - 'O 'isto un gal puntàr 'na sveja par paura dei éssar licensià
03 - 'O 'isto gati neri scapàr da cani rassisti
04 - 'O 'isto far assegni çircolari con un compasso
05 - 'O 'isto astronauti al ristorante dimandàr el conto a la roérsa
06 - 'O 'isto un atleta magnar 2 primi 3 secondi e 4 decimi
07 - 'O 'isto un bacàn supiarse el naso nel sò fassoleto de tera
08 - 'O 'isto diabetici crepàr in luna de miél
09 - 'O 'isto gondole cambiàr canàl col telecomando
10 - 'O 'isto un libro con l'indiçe fraturàdo
11 - 'O 'isto 'na moschéa piena de sdinzàle
12 - 'O 'isto un omo con un ocio pesto e uno ragù
13 - 'O 'isto un'atrice deventàr porno par aver ciapà tuto sotogamba
14 - 'O 'isto sci da neve con atachi epiletici

>LE ULTIME DAI VERONESI

LE ULTIME DAI VERONESI
01 - Quando el lovo el te smòrsega passiensa, ma se l'è 'na pégora che la te smòrsega incassate pure!
02 - L'amór te fa far cose mate, mi par esempio me son sposà
03 - G'ò dimandà de sposarme e la m'a dito de no! Da alora vivemo feliçi e contenti
04 - El vin el te copa lentamente, ma ci gà pressia?
05 - L'ultima de Belavigna meteorologo: le piove nel medioevo i era a séce roérse, anca a causa dela mancansa de ombrèle
06 - L'ultima del scarpolìn de San Pol: l'e' mejo stàr co' i piè par tera, parchè in vino veritas e in scarpe adidas
07 - L'ultima del Toni sartòr de Negrar: la fritola la passarà mai de moda, parchè la gà un taio classico
08 - L'ultima de Giani Carpenéa: pensavo che drio el vagón leto ghe fusse el vagón comodìn
09 - L'ultima del Ciano, fotografo de Santa Lussia: e Dio l'à creà la luçe parchè tute le prime foto ghé vegnù scure.
10 - L'ultima de Paiuscolo de la Cignaroli: quando tuti i mòcoli iè smorsà, al strovo tute le done iè bele

>VERONESI FAMOSI SCAPA' DAL FISCO

VERONESI FAMOSI.. SCAPA' DAL FISCO
El famoso presidente U.S.A. Bill Clinton in verità i dise sia nato a Presina e come laòro el fasesse el contadìn. In paese l'era conossù come Gulielmo Clinto. Par colpa de la tompesta che la gà smigassà l'ùa, l'à dovù emigràr in Merica in çerca de fortuna. Clint Eastwood vero nome Clinto dal Boscarél, l'era el barbón che'l girava par le vie de San Zén. Giorgéto Mación inveçe l'è nato a Bosco Césa Noa poco distante da la giassara del Grietz 'ndoe l'à vissù co' do vache e quatro cavre prima de 'deventàr el famoso George Jr. Bush. A CampoSilvàn catémo el bacàn de la Lessinia Silvestro del Stalón conossù in Merica par avér interpretà i film Rambo e Rocky col nome de Silvester Stallone. Da Monteforte gh'émo Tom Cruise, conossù come Tommaso Crocera o mèio Tomìo da la Crosàra, Da Custòsa inveçe l’è la famosa cantante Ana Ossa o Anna Oxa. Quatro amiçi i sonava ne le ostarìe col nome de “The Doors”, o meio “Le porte” infati uno g’avéa casa a San Giorgio, uno in Piassa Santa Toscana, uno tacà a l’Ospedàl Militàr e l’altro sul Corso Porta Nova. 

>CORSO VERONESE-INGLESE A LA BONA

CORSO VERONESE-INGLESE A LA BONA
VERONESE
logo flag verona
INGLESE
logo flag verona
Fa ti Make you
Vedi ti See you
Voria I wish
Se te vol If you want
Crédèghe! Believe it!
Ghe feto o ghe sito? Do you do or are you?
Casso vuto? Dick want?
Te gh'è rasón You have reason
L'è na brasa quèrta He's a covered ember
Varda 'sa l'è vegnù fóra  You see what come out
'Na 'olta par omo  One time for man
No sta torme in giro  Don't turn me a round
Fa debiti ma cùrate Make debts but treat you
Te me la canti bela  You sing it beautiful
Ma sito fóra But are you out?
Tira móla e martèla  Pulls, lets go and hammers
'Sto baldachìn  This box
Te sté andando via de oco You are going to the duck
Te si fóra come un balcón You are outside as balcony
Te la sè lónga You know very long
Ghe n'ò fin sóra le réce I have got until over ears
Ghe n'èto altre You have got others
Can dal vaca Dog from cow
Te sì ai passi del poro limón You are at the steps of the poor lemon
Te vol ovo, galina e cul caldo  You want egg, chicken and hot ass
Ci no'l ga testa el ga gambe Who has not head, have legs
Semo a caval de na mussa orba We are a cross of a blind ass
Sasso che rugola non fa motta Rolling stone doesn't do mass
'Oltàr el butin en la cuna Turn the baby in the cradle
Semo in braghe de tela We are in cotton jeans
'Na scarpa e 'n sòcolo One shoe and one socket
Ci no caga el se gonfia Who do not shit, blow up
Ci ruma cata ossi  Who rummage find bones
Quèl che no stràngola ingrassa What does not strangle, fatten

>PAESE CHE VAI

PAESE CHE VAI....
Nomi de paesi che esiste dalbòn in giro par el mondo
PAESI NASSIÓN
Anara Nigeria
Ajo Arizona
Bacan Island of Indonesia
Bagola Ungheria
Caucia Spagna
Cunel Francia
Fraga Spagna
Falìa Senegal
Gossa Crucarìa (Germania)
Galani Grecia
Limon Costarica
Morar Regno Unito
Ongia Congo
Patela Portogàl
Rapola Finlandia
Rossignol Belgio
Sisora India
Salgar Colombia
Seola Park of Seattle Washington
Saon Francia
Siresa Spagna
Sisolar India
Tola Nicaragua
Zobia Congo

>LA CAREGA DEL DIRETOR

LA CAREGA DEL DIRETOR
Cosa dir de la carega, dir de ben o dir de mal? L'è un compito assai duro, duro come un toco de legno. Ela pol essar fata de diverse piante, nogàra, làrese, fò, sirèso e ròaro, ma al dì de ancò de plastica, pvc, resine e derivadi dal petrolio, co' le forme più strane pensà da grandi desainer, che no ià mai posà el cul su le strope incrosà. Nel novo milenio, se parte da un trespolo da papagàl che te cati ne le noe ostarie o loungebar (ma che casso vol dir lounge bar, ma casso parlito?), fate de fero che te par de averghe un caucio impiantà nel..... a quele a bogonela che te finissi in tera co' le gambe par aria. Ma vuto métar, sentarte su la paia come l'à fato un butìn domila ani fa? Ma vuto métar la sensassion de verghe una sperangola de legno che tièn la schena drita come 'na steca de bacalà? La carèga l'è sempre stà el simbolo dei potenti, de re e regine, noàntri a Verona gh'èmo parfìn el rion de la Carèga, secondo i antichi, una catedra de un magistrato romàn tal Cornelio Annone spacà a metà pronta par sentarse sora. I sovrani come Re teodorico o el nostro Principe Cangrande, i g'avéa quela co' soto el bocàl, quertà da le vesti regali, cosìta no i g'avea da alsarse e scapàr in bagno come femo noàntri quando gh'èmo el cagoto. I novi desainer che i ghe ne spara de c...vacade, no i è riussì a far un model de 'sto tipo, che sarìa comodo, magari i cinesi par laoràr sempre i ghe l'à in dotassion. Ma la comodità no la va mai de pari-passo con la modernità. Par passàr da la carèga a la banchèta ghe vol poco, ma almanco te pol stàr sentà in do, tacadi come do morosi quando i se ciùciòna. Insoma, pol verghe forme diverse, fata del materiàl più strano, anca de piera. Se te ve in montagna o longo le campagne te cati le sponsaore, giusto par postàr el cul, magari soto a 'na pianta a l'ombria o tacà a uno de quei capitèi de Santi e Madone. Montagna, eco, ghe n'emo una qua tacà a la Lessinia, ciamà Carèga divisa in du tochi, a Verona gh'è tocà le gambe o meio la val, al Trentino la speràngola, o mejo le çime. Anca la natura l'à volù dar el so contributo, dandoghe questa forma de tuto rispeto. Ma al dì de ancò, anca se no gh'è conti, contesse e regine, gh'èmo i politici ormai abituadi a starghe sentà par ani, come i g'avesse la cola soto al cul, tanto da pensàr che i abia utilisà anca dei ciodi; par lori parò, nel tempo ciapa la forma de una poltrona, 'ndoe i pol stà stravacà par ani e ani sensa destacarse e sensa verghe el bocàl de soto. Come dapartuto, a seconda de come tira el vento e par no darghe dispiaser a nissuni, tiràndo l'aqua al to molin, te pol stàr "sentà su do careghe"; bison èssar brai parò, no l'è da tuti, anca se, quando te riva l'ocasion te lo fe anca ti, sicuro! Ma se te si scarognà, pol piovar soto al cul anca quando te si sentà. E no gh'è gnente da far. Se inveçe te capita 'na desgrassia o i te conta 'na bruta notissia, te te senti mancàr la carega soto le ciape, un sconforto. A scola me ricordo, l'era un bruto voto, un bel quatro, tanto che podéa vèrzar 'na botega de sole carèghe! Insoma ne la nostra vita pol èssar utilisà in mile modi e in mile circostanse. L'è utile par ci l'è arènte ai malà nei ospedài, par starghe vissin, farli stàr meio con la propia presensa, ma anca par star tacà a la cuna de to fiol. A proposito de cuna, l'è belo cunarse su quela a dondolo, magari denànsi a un camin co' le brase e 'l fogo che bampa, come faséa to nona che la se ponsèa co' l'ucia mentre la taconava i calsèti sbusi nel calcagno. Se te zònti un posto a tola, parchè gh'è un amigo in più, te tol la carèga e tuti iè sentà in compagnia, a magnàr, bèar e ciacolàr. Se inveçe te ve in vacansa al mar te pol verghe quela a sdràio par ciapàrte el sol. Più scrivo, più penso e più me vièn in mente che la carèga te pol catàrla al laòro, in ufissio, gh'è quela co' le ruèle soto, par spostàrla de qua e de là sensa far fadìga. Gh'è n'è anca una, no tanto alta, ciamà sgabèl, parò no l'è cosìta comoda, la serve solo par postàr el cul un poco, sponsàr e nar via quasi subito, come quando te parchegi la machina con le quatro frece in strada. Se te giri el mondo te vedi che gh'è popolassioni che preferisse sentarse in tera o su dei cussini o magari sui rami dei àlbari o sora le bestie, ognuno de noàntri g'à el desiderio de ciapàr fià, stando comodi e no l'è importante come. La carèga in pratica, la cambia forma nel tempo ma stando ferma, la va drio a la vita moderna sempre de corsa, sensa movarse. Una vera compagna che te compagna e che soratuto la demostra de èssar una vera amiga, no la dise gnente quando te magni pasta e fasoi! (Andrea Toffaletti)

{



 

 

Pin It