01 Speciali - L'Adese a Passo Resia

01 Speciali - L'Adese a Passo Resia
01 Speciali - L'Adese a Passo Resia
01-SPECIALI - "L'Adese nasse italiàn da 'na mare todesca a Passo Resia" le parole dela poesia del grande poeta Tolo da Re ne la so poesia "L'Adese",... >ma pochi de voialtri parò, conosse o i sà con precisión, 'ndóe nasse el nostro fiume. Sul versante est del paese de Resia nel comùn de Curón, al confìn co' l'Austria ne l'alta Val Venosta a 1550 mslm, come se vede da la foto scatà dal Monte Ortles dal vostro Diretòr da oltre 3000 mslm. Fin a pochi ani fa se pensava che la sorgente la fusse in méso al bosco, tanto che l'è stà messa 'na tabela con tanto de indicassión. Ma le cose iè ben diverse. Nel 1999 i alpini che i g'avéa la manutensión de le "opere militari" i sera baràca e buratìni consegnando el "Vallo Alpino Littorio" de Resia a la Provincia Autonoma de Bolzàn. Una volta entrà nel bunker n°20 "Vocca" (nome codice N.A.T.O), s'a visto 'ndóe l'era la vera sorgente de l'Adese, piassé in alto de la misura scrita qui soto.

Ma femo un passo indrio. Storicamente la costrussión, s'a scominsià, nei ani '30 con una linea difensiva su tuto l'Alto Adese al confine co' l'Austria lago de resiae in particolàr dal 1939 al 1942 a Resia, con fosse anti-càr, caserme, sbaramenti e linee de rifornimento. Mussolini nonostante el fusse deventà amìgo de Hitler no se fidava e la difesa vegnéa messa su in gran segreto, tanto che gnanca el popolo savéa qualcosa; in particolàr nel 1938, la cosa l'è deventà sempre piassé granda a Resia verso quota 2050 mslm al "Piàn dei Morti" con sbaramenti e ostacoli anti-càr. La notissia che l'Austria faséa parte del dominio todesco,

a piaséa sempre manco al Duce e la situassión ne l'Alto Adese l'era sempre più in tensión visto che no l'era stà digerido dal popolo, el novo parón nel 1920 cioè l'Italia. Cossita vista la situassión, Mussolini l'a ordinà nel 1939 de scominsiàr subito la costrussión e de corsa, de le fortificassioni al confine nord, tanto che nel 1940 se podéa contàr 66 impianti. Nel 1942 i laòri vièn fermà al confìn con la Germania non più Austria e nel 1943 i todeschi i riva infufà come de le bestie nel Nord Italia visto che'l zugo del Duce no'l piaséa più. Ma ritornèmo al Bunker n° 20 visitabile su prenotassión, un opera costruì con sabia e giara sensa fero. Come se vede ne la foto l'è belo imboscà,

gnanca el buso de la seradura l'è visibile. Drento l'è longo 270 metri par 450 mq. e la temperatura l'è de 10 gradi e 6 'ndóe vién fora l'aqua del nostro fiume. Iè presenti 2 ingressi mentre un tempo l'armamento l'era de 5 mitraliatrici con corpo fisso e 1 s-ciòpa mitraliatrice. L'aqua pena la va fora par 200m no l'è incanalà ma la va zò par la montagna verso el lago de Resia. Semo abituà a védar l'Adese passàr soto ai ponti de la nostra çità, a volte pién de aqua da far paura, qua l'è poco più de un pissaroto, ma che porta una bunker de l'Adeseçerta emossión, soratuto quando te ghe ne bevi un gosso, bela ingiassà.

Le guide del paese spiega par do ore la storia nel bunker e a la fin, te vién oferto un bicerìn de graspa par scaldarte. Nei prossimi ani vegnarà sistemà el tuto par colpa de le infiltrassioni, intanto gh'è un pochi de tubi che porta l'aqua fora nel bosco.

Quando el pissaròto riva a Resia, el se buta nel lago. Anca qua bisòn vèrzar 'na parentesi storica, che pol èssar utile a capìr come mai, da queste parti, ci parla italiàn no l'è ben visto o vién messo in un cantón.

Nel 1920 el Governo Italiàn l'a permesso de alsàr el livél de l'aqua del lago de 5 metri par la produssión de energia eletrica. El progeto l'è finì ne le mane de la società Montecatini che grassie a 'na concessión rivà no in maniera onestissima da Roma, s'a passà a 22 metri. El popolo no l'a protestà parché no savéa de le vere intensioni de la società eletrica. Una tolta par el cul in "stile italiano" i dise. Ma quando la verità l'è saltà fora a Curón un tempo Graun, la protesta e la tensión l'era a 1000, smorsà subito con l'invasión todesca nel 1943.

Se pensava che tuto fusse finì con la seconda guera mondiàl, ma tra el 1948 e 'l 1950, l'è ritornà de moda una diga idro-eletrica e sempre con la Montecatini, ciapando tri laghi, Resia, Curón e San Valentìn con l'unión dei primi du. La zénte l'a dovù lassàr le case dei paesi storici de Arlung, Piz, Gorf e Stockerhöfe e 'na parte de Curón e Resia, par èssar precisi 163 case butà zò e 523 ett. de tereni finì soto aqua. El 16 luio del 1950 le campane de la cèsa romanica del XIV° secolo de San Piero de Curón le à sonà par l'ultima volta, mentre, pochi giorni dopo, i abitanti i l'a portàde via. El 23 luio nel tentativo de far saltàr in aria la césa s'a salvà solo el campanìl.

Cossita par ci vol ciapàr la bici, quatro pedalade, le fa ben a la salute, longo la ciclabile de l'Adese, conossù da Verona, come l'antica strada romana Claudia Augusta. El nostro fiume nei so 410 km l'è l'unión de storia, de popoli e de tradissión, passando par l'antica çità dei cimbri de Glorenza a 22 km da Resia, da Naturno conossù dal vescovo Procolo, Meràn, Bolzàn, Trento, Rovereto, Verona, la bassa inluamarà e la tera agra Polesana....."'desso l'è mar!"

 Andrea Toffaletti

 







 
Pin It