LRNotissie: Questión de bandiere

Questión de bandiere, dal Veneto al Trentìn, problemi e ciàcole che no serve a gnente.
La Regione Veneto l'a proposto de métar la bandiera co' el famoso león denànsi a i ufissi publiçi o durante manifestassioni istitussionali. Questa idea l'a provocà un poco de casìn, parchè se va a pensàr, più a un qualcosa de politico, de un partito in particolàr, più che a un simbolo del popolo. Cosa gh'è de mal a métar la bandiera regionàl 'ndoe gh'è 'na scola o un monumento, come nei altri stati? Dovarìa èssar esposta la bandiera de Verona, del Veneto e quela italiana, par ogni logo istussionàl secondo noàntri. Se dopo 'na persona ghe vede un qualcosa de politico, parchè gh'è un referendum su un indipendensa regionàl, par auto-gestirse un poche de cose sensa dìpendar da Roma.... beh alora se pol pensàr mal de tuto, i problemi forse, i è ben altri. 'Desso se vol cavàr anca quele al confìn co' el Trentìn, parchè el più de le 'olte le se cata in zone de montagna e co' el vento le se sbrega. A tal proposito i amiçi trentini, i ghe meterà un cartèl che parò el segna Trentino da tute e do le parti (i dise che sia publiçitario e no stradàl...ma l'è sul confìn!). Se no te conossi la geografia o el to navigatòr el te sbate de qua e de là o te si ne la nebia da cortèi, te pensi de èssar in Veneto e magari te si in Trentìn o magari come ai pié del Baldo, verso Boca Navene, i confini i séita a cambiàr e quindi, no te capissi più qual'è el Veneto e qual'è el Trentìn. Un bel casìn! Parchè bisón complicàr la nostra esistensa?






Pin It