Profughi 80 Erbéso 7 _LRNotissie

Profughi 80 Erbéso 7
Profughi 80 Erbéso 7
Profughi 80 Erbéso 7
Ne la ex base N.A.T.O. ne la contrà "Vacamozi" nel Comùn de Erbéso, vegnarà sistemà 80 profughi o simili. Pecà che in questa contrà lontàna un pochi de chilomentri dal paese, ghe vive 7 abitanti, quatro con piassé de 90 ani. 'Desso che riva l'inverno i migranti i se cata in un posto che a le quatro del pomerigio el sol no gh'è più e sensa contàr che no gh'è mési de trasporto. El sindaco l'avéa proposto de utilisàr el posto par publicisàr prodoti tipiçi e sistemàr le palassine par farghe case vacanse co' tanto de impreditori pronti a darghe 'na man. Tra l'altro, tanti pensionati i fa fadìga a rivàr a fine mese e inveçe da darghe 'na man a lori e un pochi de servissi al paese (che gnanca a la dominica g'a una corièra par rivàr in çità) se fa i caritatevoli co' dei migranti, che fin a ieri i vedéa la sàbia. Questo l'è el pensiér nostro e de tanti çitadini che no i sà come gira tuta 'sta giostra. Le dimande iè tante e le risposte iè poche. Cossita el sindaco, vol convìnsar la cooperativa de Vercelli  che gestisse el "campo profughi", a far rifornimenti de magnàr, bèar e altro, nel paese; in questa maniera l'afàr se fa in du e anca le botéghe la pol tiràr su qualche schèeto. Nissuni se rende conto che un Comùn co' 800 abitanti sparsi de qua e de là par le contrà, se cata co' un 10% de profughi. Se vardémo 700 ani fa, gh'era el popolo dei Cimbri che in pochi secoli l'è riussì a colonisàr la Lessinia. Anca lori i era extracomunitari par noàntri; ma i vegnéa dal nord e quindi i conossèa el fredo; no i se faséa màntegnar, boni de laoràr e farse 'na casa. Questi profughi moderni, che i dise de scapàr da la guera, in molti casi no ghe piase el magnàr o el posto messo a disposission. 8 de lori iè scapà dal "campo" de Erbéso nel cor de la note par rivàr a la stassion e nar a Milàn o Roma; questo dito ai Carabinieri a Poiàn (i pol iscrivarse a la maratona de Verona). Un altro problema podarìa èssar, l'ordine publico visto che in caso de rogne, el comùn, no pol permetarse un vigile. Ghe tanta brava zénte che la dise che tuti semo çitadini del mondo e che bisón èssar caritatevoli. Questo discorso i podarìa fàrghelo a quèi pori veci de Vacamozi, vedémo cosa i ghe risponde! Nei prossimi giorni e mesi védemo cosa salta fora, ma i profughi in fuga i pol darne un idea che in quela comunità montana le rogne iè drio rivàr...(Verona 13.11.2017 - La Redassión)





Pin It