Bon Conpleàn... Berto !!! _LRNOTISSIE

auguri berto barbarani
auguri berto barbarani
Bon Conpleàn... Berto !!!
La vita de Berto a cura de Andrea Toffaletti 
Tiberio Roberto Barbarani par amiçi Berto, nato el 3 diçembre 1872 in via Ponte Novo n°5, l'è stà el cantòr de la çità de Verona; definirlo poeta l'è massa poco, visto che a distansa de piassé de 70 ani da la so morte semo ancora qua a parlàr de lu. L'è riussì a trasmètar una cosa molto importante, l'amòr par la nostra çità e par le nostre tradissioni. In compagnia dei so amiçi Angelo Dall'Oca Bianca e Renato Simoni l'à lotà par salvàr Verona, la so Piassa Erbe co' el so GhètoSe no fusse stà par lu, el famoso "gobo" vendarìa i "cerini e fulminanti" davanti al mercà o al semaforo. No se réndèmo conto de quél che n'a lassà in eredità, la belessa de la nostra çità. Gnanca "Minico Bardassa" che l'à maltratà, raspà sensa criterio e sensa carità la césa de San Zèn, l'è riussì a sassinàr la basilica del nostro patrono, l'è deventà "stramba, fina e più bela". Berto l'era un conservadòr, ma definì anca socialista parché g'avéa a cór i "ultimi", come "El Bastardo, La Carboneta, El Gobo, El vècio da la banchéta" che catèmo drénto ai "Pitochi" del 1897. Altri i disèa che Berto fusse el poeta de la primavera, infati catèmo "Primavere" nel "Rosario del Cor", "La cansón de Primavera" e "Al tornàr de le róndene" drénto "Le Montebaldine", "Le ròndene" ne la racolta "Le Adesine", "Primavera" e "Sbusaneve" drénto "I Sogni" e "Primavere" nel 4° Cansoniér. Berto no'l g'avù 'na vita sempliçe, a 9 ani l'è morto so pare Bortolo e l'è stà costreto a dar 'na man a so mare Adelaide Pojani ne la botèga de feramenta de faméia. Cossìta l'à lassà la scóla, riussèndo parò a finìr el Liceo preparàndose privatamente mentre so fradèl Vitorio, l'è riussì a deventàr medico. Ne le ore lìbare con Renato Simoni, el frequentava la casa de l'avocado Augusto Caperle a San Leonardo e in compagnia de so fiói e altri butèi deventà famosi nel tempo. Questa compagnia o cenacolo de artisti, l'era conossù col nome de "smarmàia". Nel 1892 a vint'ani, catèmo la so prima poesia "Lètara a Nina" publicà nel setimanàl umoristico "El Can da la scala" a firma "Barbi-cane". La Nina l'era la so fonte poetica, che ancó podèmo definìr virtuàl, in alcuni casi un poco spudoràda e scandalosa "l'à vossudo e stravossudo, lassàr fora da la vesta, un tocheto de col nudo! Po, la dise che l'è onesta", o quela dona da regalarghe "i fighi co' la gossa". Berto scominsia laoràr come cronista nel giornàl L'Adige 'ndóe e grassie a un amigo l'à conossù Angelo Dall'Oca Bianca. Ne la cronaca veronese, Berto ciàpa ispirassión par "El campanàr de Avesa", da un çerto Momolo Brenta, che s'a suicidà nel campanìl piassé alto de Verona, quèl de Avesa. Nel 1900 vién fora el primo de quatro cansoniéri, mentre l'ultimo, el quarto, nel 1936 stampà da Mondadori par un totàl de 50 mila copie vendù. Le so poesie, i era conossù a livèl nassionàl tanto da deventàr amigo de Crespi, Testoni e Trilussa. Berto el passava da momenti de sucesso a eventi tragici de fameia, come la morte de so mare, del fradèl Vitorio medico a Dolçé con relativa sistemassión de la cognà e dei fioi. Entrando nei cansoniéri, nel primo, del 1900 catèmo le racolte "El Rosario del Cor, I Pitochi, Le Montebaldine, El campanàr de Avesa"; ne le Montebaldine catèmo de le poesie che no le parla de la montagna come Santa Lussia e El Fermacarte, un teschio usà in teatro e catà nel testamento de un critico teatràl milanese. Dopo el saluto a la grande montagna, entrémo nel secondo cansoniér nel 1911 co un strucón forte al fiume e a la so val, Le tre cune, el capolaóro de San Zén che ride e la primitiva Giulieta e Romeo del 1905 sistemà nel 1941. La copertina 'sta 'òlta l'è co' na riprodussión de un quadro de Angelo Dall'Oca Bianca. L'editòr Cabianca, a quel punto, cambia anca la copertina de la prima edissión, 'na ristampa in colaborassión de l'amigo Angelo. Su "Le tre cune" dovémo dir do parole in quanto intensa e paragonabile a una soap-opera moderna. Gh'émo "La serva disonorada", 'na storia che parla de 'na butèla violentà e lassà da un soldà, che da la disperassion la copa el fiól; finì in tribunàl Berto ghe dà la possibilità de rifarse 'na vita con un omo onesto. "L'ultima barufa" inveçe, parla de 'na dona che capisse che'l so omo el vol scapàr lassàndola da sola col fiól 'pena nato. Ne l'ultima cuna, la gioia de la maternità "la mama se mola, un poco el corpeto, la boca se incòla, el tato l'è chièto". Nel 3° Cansoniér del maio 1922 stampà in 5000 copie, se passa da l'inverno e le desgrassie come la "morte del botegàr" e "Sogno de l'aqua grossa" a la vita e la "Primavera" co' i so "Sbusaneve" par finìr con uno studio complesso dal saór longobardo come "Dona lombarda" co' Rosmunda e Alboino sul col ciamà de San Pièro 'ndóe l'è nata la çità. Nel 1927 Berto sposa Anita compagna fedele fin al 1944 e no la famosa Nina, mentre nel 1932 dopo trent'ani finìsse la so esperiensa lavorativa al quotidiàn "Il Gazzettino". Nel 4° Cansoniér publicà nel 1937 col titolo "L'Autuno del Poeta" catémo in copertina Santa Libara. Berto ormai straco e vécio, artisticamente solo, el ritorno a l'antico, a la vita  in tute le sfumadure come nel "Cristo su la scala" a le fantasticherie come nel  "l'Omo de bon cor e la formìga" e a le fole consà de tradission veronese come "La Cabala del Gnoco". In pratica gh'émo el Monte Baldo nel primo cansoniér, la montagna che dà el senso de protessión; l'Adese che passa par la çità portàndola in brasso nel secondo, la descrissión de Verona e de le so origini nel terso e l'ultimo saludo del poeta con tute le emossiòni che i à fato conóssar Berto, nel quarto Cansoniér. No podémo desmentegarse che un poche de poesie iè stà musicade come quéla del concorso carnevàlesco del 1927 e quéle sul lago de Garda. Nel 1939 l'è stà inaugurà el famoso Vilàio volù da Angelo Dall'Oca Bianca 'ndóe tra i presenti no podéa mancàr Berto. Propio durante quél evento, el prefeto l'à pensà de far "un opera de ben a nome Barbarani". Cossìta l'è stà costituìda 'na Fondassión con un patrimonio de un milión e 200 mila lire par costruìr un istituto par l'educassión e l'istrussión professionàl par i buteléti pori cani. A Berto gh'è stà assegnà un vitalissio de 2000 lire al mese dal Ministero de la cultura popolare. La Verona tanto amà e decantà ne la poesia finisse soto ai bombardamenti de la seconda guera mondiàl e Berto, vola in çiél vardando da sóra la so çità. Andrea Toffaletti..(Verona 03.12.2021 - La Redassión)