Auguri de Bone Feste

bone feste
bone feste
Auguri de Bone Feste 
"Se mi dovesse far un bel presepe, par farghe el niàl al fiol de la Madona, me bastarìa vardàr la me Verona e restarìa incantà fin San Giusepe, se mi dovesse far un bel Presepe". Queste i-è i versi del grande Mario Salazzari che condividémo co' i nostri letori par entràr nel tema de le Feste. L'importansa de 'sti giorni no l'è solo magnàr e béar fin a la vecia, ma star in compagnia de la famèia o de amiçi. Sarìa belo anca, che nissuni ghe tocasse laoràr de dominica o Nadàl, seràr i çentri comerciali par dar la possibiltà a tuti de vardarse in facia e ciacolàr, smorsando anca la tilivision. Un tempo magnàr tortelìni in brodo l'era un lusso che te podéi gustàr solo soto le feste, 'desso con un par de euri te ghe ne crompi mèso chilo e pronti in un minuto. Stesso discorso par i regài, un tempo te ghe ne bastava uno, desso se crompa anca quel che no serve. Questo par dirVe, che se le cose le va mal o se no gh'è più ciàcole tra le persone, gh'è un motivo. Bisognarìa recuperàr el senso de Famèia ormai sparìdo, recuperàr i valori, insegnàr ai fioi che le cose bisogna guadagnarsele, e no de butàr i schèi da la finestra par de le vacade che te ciapi in man una 'olta sola ne la vita. Tra pochi giorni semo nel 2018, no cambia gnente dal 31 deçémbre al 1° genàr, se te eri ne la merda prima no cambia gnente el giorno dopo. La speransa l'è, che le cose le vaga par el méio durante l'ano, soratuto, star ben e in salute; l'è un grande valòr che pochi ghe pensa o l'importante l'è el codeghìn coi krauti o la to squadra de calcio che la perde? Bon Nadàl, bone feste e bon 2018 a tuti da La Rena Domila e dal Vostro Diretòr





Pin It