Du sesìni par 'na sporta_LRNotissie

Du sesìni par 'na sporta
Du sesìni par 'na sporta
Du sesìni par 'na sporta
El casìn vegnù fora par 'na nova tassa l'è rivà a dei livèi 'bastansa carnevaleschi visto el periodo. Parlémo de quela su le sporte bio che se cata ne le botèghe de fruta e verdura. Ogni volta che te pèsi a esempio un chilo de naranse o tri chili de pomi te vién messo sul conto anca da i 2 ai 7 centesimi par la sporta. La zénte l’è stufa che ogni ano vién inventà una nova tassa, tra l’altro presente come questa, in quasi tuta Europa. A fine ano, ogni faméia la spendarà 10 euro in più par colpa de ‘sta vacada. La scusa l’è sempliçe. Le sporte utilisà a esempio nei supermarcà un tempo i era de plastica inquinante, ‘desso le sarà amighe de l’ambiente. Sui social, molti dei nostri letori i s’a inventà de no utilisàr le sportìne ma de métarghe el scontrìn su ogni singola ‘banana, pérsego o serùmolo, ma nissuni savéa che ogni scontrìn de la fruta e verdura l’è sempre in compagnia de la tassa, quindi, quatro pomi vol dir anca quatro sporte da pagàr. La roba che fa da sganassàr l’è, che la polemica nata a livèl nassionàl dando colpa al governo ladro e no europeo no tegnendo conto de ‘na roba. Qual? Un tempo un chilo de pomi te podéi pagarlo 1000 lire al chilo, da quando gh’è la nova moneda semo rivà a un euro al chilo, in pratica 2000 de le vece lire. In più co’ vari aumenti semo andà ben più in alto. Quindi, parchè lamentarse par 2 centesimi quando el costo dei pomi l’è el dopio de prima? Nissuni dise gnente parchè la fruta e verdura la costa un bordèl. Mistero. Tra l’altro la sporta bio te pol utilisàrla par le sgaùie, la roba moia par capirse e quindi no te la crompi par far la diferensiada. Un nostro letòr el n’a fato védar che sul scontrìn, te pol catàr anca el costo de la sporta, pecà che quela foto l’è stà scatà con un smar-fon da 600 euro. La nova tassa no la sarà giusta, ma anca el çitadìn ghe mete del suo…  (08.01.2018 - La Redassion)





Pin It