Quando el carnevàl l'è un carnevàl _LRNotissie

carnevàl l'è un carnevàl
carnevàl l'è un carnevàl
Quando el carnevàl l'è un carnevàl
No volémo tiràr fora le brute vicende che nei ultimi ani l'à colpì el poro Bacanàl del Gnoco e relative conseguense su altri comitati che i è cascà nel casìn par caso. L'è come sparàr su la crose rossa. Dovémo partìr parò da lì, parchè l'è da lì che nasse el casìn del vènardi gnocolàr 2017 e 2018. Ma se femo un passo indrio el carnevàl veronese, storicamente, nel corso dei secoli l'è cascà ne la miseria de spirito, moràl e anca de schèi; el "carnovale è ridotto ad un insipida farsa" come dal 1815 al 1838, dal 1845 al 1855, dal 1869 al 1898 e dal 1900 al 1923 ecc. Come avì visto, ben o mal i casini gh'è sempre stà. 'Desso co' el novo presidente e relativo novo (?) comitato Bacanàl del Gnoco e i altri 6 comitati storici de la çità gh'è qualche bega, che va al de là dei coriandoli. Cossita a la fine, se tira a sorte, l'ordine de partensa del corteo al venardi gnocolàr no tegnendo conto de ci l'è definido storico. La gossa che l'a fato nar de sora l'aqua dal vaso. I 6 comitati i pretende de contàr de più nel carnevàl veronese e forse no i sarà presenti al venerdì gnocolàr. La storia del nostro glorioso carnevàl butà nel cesso, par de le beghe più o meni importanti, questo parchè gh'è una çerta ignoransa su la storia carnevalesca. La Rena Domila con nùmarose riçerche storiche e la publicassion del libro "Bacchanalia" porta inànsi la storia del carnevàl veronese da 20 ani. L'è ora de finìrla con' le beghe volémo solo coriandoli, questo dito durante le nostre conferense dal publico presente. Ogni ano femo 10 conferense sul tema e no semo mai stà ciamà dai comitati; la sodisfassión la vién da la zènte e soratuto da l'Enciclopedia Treccani che l'a volù materiàl da noàntri su l'argomento. El carnevàl l'è dei veronesi no de quatro gati!…  (03.02.2018 - La Redassion)





Pin It