Una capitàl templare _LR Notissie

templari la rena domila notissie
templari la rena domila notissie
Una capitàl templare?
Da aprìl 2018 Verona no sarà più quèla de prima. Se fusse vera 'sta notissia, sarìa 'na cosa positiva/negativa. Secondo le voçi che gira a Verona l’è stà scoèrta una tomba del XII° secolo ne la cèsa de San Fermo, quèla del Gran Maestro de l’Ordine dei Templari, un catalàn de nome Arnau de Torroja, morto a Verona nel 1184; un esempio unico al mondo in quanto, con el Concilio de Vienne del 1312, un bel mucio de Templari iè stà copà, co’ torture o brusà vivi, sensa èssar messi soto tera. Storicamente Arnau, deventà amigo del patriarca de Gerusaleme Eraclio, in compagnia dei cavalieri ospitalieri, l’era andà in çerca de ‘na man par el regno de Gerusaleme, in Inghiltera, Francia e Italia. Ormai vècio l’è morto a 70 ani proprio a Verona. Forse el 21 de aprìl 2018 vegnarà presentà al mondo questa ecessionàl scoèrta, anca se secondo noàntri, me par 'na bala, una storia come quela de Romeo e Giulieta. Un problema che no l’è da soto-valutàr, l’è, che Arnau, g’à combatù in Spagna e Portogàl contro i musulmani a difesa dei Cristiani e che quindi la nostra çità podarìa finìr soto a i oci de qualche “fanatico” che nei ultimi ani g’a messo l’Europa nel teròr. Dal punto de vista turistico, par la nostra çità, ‘sta scoèrta, sarìa un gran colpo del cul, da l’altra parte, no l’è da star co’ la testa sul cussìn. Sperémo che no la sia vera 'sta notissia (La Redassión)





Pin It