19ani de La Rena Domila _LR Notissie

auguri a noàntri, bona pasqua a voialtri
auguri a noàntri, bona pasqua a voialtri
19 ani de La Rena Domila....
Auguri a Noàntri, Bona Pasqua a voialtri. Me par ieri quando l'è nato el sito, primo a.rìl del 1999. In pochi ghe credéa a parte mi, le critiche piovù par la me idea podèa fame passàr la voia. Ve ricordo che 20 ani fa, internet el movèa i primi passi e un sito l'era un qualcosa de extraterestre. 'Desso, anca co' feisbuc se vede s-ciàpi de persone parlàr de argomenti praticamente istessi dei nostri. Ma tegnér in vita un sito par tuti 'sti ani l'è un discorso, scrìvar 'na roba e no farse più védar l'è un altra cosa, più façile. Mi g'o sempre messo la facia, su internet, in tilivision e anca ne le conferense. Siti internet e sociàl che i tenta de parlàr de le nostre tradissioni e de la nostra léngua sensa vèrghe dei studi e un poca de spariènsa drio a le spale, ris-cia de sassinàr la realtà de le cose e quèl tramandà. No basta crèdar de savèr. Comunque, dovì ricordarVe, che ci parla de le nostre tradissioni e de la léngua veronese su internet dopo el 2000 o su fb dopo el 2008.... l'è nato dopo La Rena Domila!  Nel noèmbre 1998 g'avèa 2 libri e quèl de Berto Barbarani ma no riussìa a far 'na pagina ueb. Gh'è volù quasi 6 mesi, che se ghe penso 'desso me vièn da sganassàr. El sito l'era La Rena. Nel deçembre 1999 el sito sèra ma nel genàr 2000 rinàsse co' el nome de La Rena Domila. Quando avèa dato la notissia che'l sito seràva baràca e buratìni, nei criticoni se lésea in facia un sorìso. Inveçe, quando, grassie a l'amìgo Giorgio Gioco e a la giornalista Emma Cerpelloni finisso sul giornàl L'Arena a fine genàr 2000, gh'è stà un minuto de silensio nei rosegòni. La stessa sera el giornalista Cantiero me intervista par TeleArena e no ve digo cosa l'è sucesso giorni dopo. Da quel momento, i è cambià tante cose, riconossimenti su giornali nassionali e internassionali, conferense, spetacoli, un archivio de oltre 1500 libri su Verona e oltre 30 mila foto su la Lessinia e la presensa sul sito del Ministero dei Beni e le Atività Culturali. St'ano credéa de fermàrme, 19 ani iè tanti, ma ci vive nel mondo el m'a dito:"in quale porto meto la me barca dei ricordi, quel qualcosa che me liga a la me tera, se te sèri?" Auguri a noiàltri e Bona Pasqua a voiàltri !   (El Diretòr 01.04.2018)





Pin It