Tessera Eletoràl on-lain, la fola.... _LR Notissie

Tessera Eletoràl on-lain, la fola
Tessera Eletoràl on-lain, la fola
Tessera Eletoràl on-lain, la fola....
Se par caso, te vol nar a votàr e la to tessera eletoràl l'è piena de timbri, persa o ciavà, te pol dimandàr on-line la nova tessera o la copia sul sito del Comune de Verona, fasèndola rivàr a l'Anagrafe del to Quartièr. Un servissio utile ai veronesi, sensa 'nar tacà la rena, ma fasèndo solo quatro passi vissìn a casa tua. Dopo du giorni, secondo el sito del Comùn te pol nar a ritirarla sensa far colòna e pérdar tempo, presentandote co' la fotocopia de la carta de identità e 'l nùmaro de la pratica. In verità...un sportèl in funsión e l'altro l'era ocupà par le carte de identità eletroniche; ò dovù tor el nùmaro e far colona de mes'ora; in più no l'era pronta e l'è stà stampà al momento. Par finìr, consegnà in man, timbrà "duplicato" (???) sensa custodia de plastica de protessión. Quando se vol far un novo servissio, bisón anca mantegnerlo in vita come se deve. Tegnémo conto che i servissi anagrafici nei quartieri no i gh'è de sabo ma solo dal luni al vénardi da le ore 9 a le ore 13, quindi te devi dirghe a un parente in pension de nar a ritirarla par ti. 6 ani fa m'è stà invià un adesivo par el cambio del "seggio" da tacàr sora la tessera, che fasendo i conti, l'era impenìda (come quela de tuti i veronesi). Quindi me son dimandà, l'adesivo si la tessera nova no. El me voto no interessa a nissuni? Parchè tuta 'sta fadìga par farla da novo? No l'è meio tornàr al vècio sistema de un tempo, quando te bastava la carta d'identità nel giorno del voto?... (El Diretòr 12.06.2018)







Pin It