Gnente profughi al confìn _LR Notissie

gnente profughi al confin notissie la rena domila
gnente profughi al confin notissie la rena domila
Gnente profughi al confìn
Magari i ne dise che semo rassisti, che no semo zénte che vol ben al prossimo, parò prima de parlàr dovì vardàr quanto La Rena Domila l'à visto. La storia scominçia ne la lontàna Africa, da 'ndoe un continente intiero se stà spostando par çercàr fortuna in Europa, scapàndo, i dise, da la guera. Dopo avèr percorso el deserto, i ciapa i famosi barconi, i sbarca in Sicilia e da qua, i vorìa nar in Nord Europa passando par el resto de l'Italia. I francesi i se mete sul confìn par no far passàr i migranti, 'desso la Germania vol seràr el confin a sud e l'Austria verso l'Italia. Ma com'èla la situassion al confìn tra l'Alto Adese e l'Austria? Ne le nostre vacanse in Trentino èmo visto el Passo Resia conossù come la cuna del nostro fiume, Passo del Brènero e par finìr Passo Stalle ne la val de Anterselva e Prato a la Drava in Val Pusteria. In tuti i tri i casi, no se vedèa parsone diversamente bionde e diversamente bianche da quele parti. Sul discorso Brènero, gh'è un fraco de contròi in stassion a Porta Nova a Verona da parte dei militari e de la polissia sui treni che va verso la Crucarìa; infàti secondo i giornài iè stà fermà solo in du. Secondo le statistiche de la polissia austriaca, i migranti andà in Austria in maniera no propio giusta ma de sfroso, iè stà 65 a genàr, 52 a febràr e 26 a marso. Casso, ghe n'era de più a Giassa e Ferara de Monte Baldo! Qualchedùn ne tol par el cul? Moràl, più te si vissìn a l'Africa e più la gestion deventa 'na rogna. No se capisse se i scapa da la guera o se i vien par star meio, no se capisse se iè profughi o migranti. Le notissie iè quel che iè, i giornài te conta quela de l'orso, i politici i siga da uno stato a l'altro. Stemo andando via de testa, le solussioni iè poche finora, çerto l'è, che un tempo, par 'nar in 'Merica ghe voléa un laòro e quel che gh'era no l'era rose e viole. Se mi scapo da 'na guera e voio 'nar in meio, me ràmpego su par le piere de le Dolomiti e no ciapo un treno con el ris-cio de èssar ciapà da la polizei. Mah, cose strane, de 'sto passo no se va al mèio e in molti casi ghe va de mèso i buteléti. De sicuro al confìn no gh'era migranti....  Andrea Toffaletti...(Verona 05.07.2018 - La Redassión)





Pin It