Se tachèmo al fil? _LR Notissie

Se tachèmo al fil? notissie la rena domila
Se tachèmo al fil? notissie la rena domila
Se tachèmo al fil?
Par èssar al passo co' i tempi, se pensa a una metropolitana, inveçe a Verona a la filovia come gh'era 60 ani fa, quela co' le tiràche par intendarse. Drènto a le mura i 39 filobus da 18 metri i sarà no inquinanti a baterie, fora inveçe, co' i fili. La costrussion dopo èssar stà rimandà, dovarìa partìr da setembre par finìr nel 2022 co' un costo de 143 milioni de euro, finansià par 80 milioni dal Stato e 63 da AMT. Se parla de Stato e enti, ma a la fine jè schèi nostri! El percorso el passa da Borgo Trieste, San Michèl, Stadio, zona Fiera, Genovesa e anca verso Parona fin a Cà de Cozzi par capirse. Le più grandi çità europee a parte la "metro" pol contàr anca su la tranvia. La nostra çità tempo fa, l'avéa pensà a questa solussion, ma se diséa che se dovéa sbusàr le strade, cosa che no sucede in questi giorni con la Fibra! A livél de casìn ne la circolassion, sia la tranvia che el filobus porta rogne diverse, ma sempre rogne. Se la paura nel far la "metro" l'è catàr qualche reperto romàn, se no se scava, no te podarè mai savèr cosa gh'è soto tera. La via Postumia l'è stà sconta in Corso Cavour, quindi, 'ndoe l'è el problema? El filobus co' le tiràche no l'è un qualcosa che pol darte una bota de novità, veloçità e métarte al passo co' el resto del mondo, visto che Verona l'è tra le prime çità turistiche in Italia. Pol èssar un qualcosa che pol aiutàr ma no la solussion ai nostri problemi....  Andrea Toffaletti...(Verona 10.07.2018 - La Redassión)





Pin It