Radio Scarpa nel ricordo de Maida _LRNOTISSIE

Radio Scarpa nel ricordo de Maida
Radio Scarpa nel ricordo de Maida
Radio Scarpa nel ricordo de Maida
Nel lontàn 2007 l'è 'nata Radio Scarpa, una Radio che no l'è una Radio come diséa la nostra Maida, butèla conossù durante un intervista par una stassion radiofonica veronese. La se godéa farme interviste su la nostra cultura, parché ghe piaséa el veronese, anca se, le so origini i-era del sud. Quante sganassade èmo fato mi e èla, fin quando un bruto mal el s'a presentà a la so porta a soli 40 ani. Cossìta durante la so malatia, tra una chemio e l'altra che no riussìa a tegnérla in pié l'è nata questa inissiativa. Dovì savér, che l'è stà invità a lassàr el laòro parché la perdéa massa tempo con le cure, questo quèl contà tra le làgreme. Un giorno g'ò dimandà se ghe sarìa piasù dir le notissie su Verona, in Italiàn, parché par el resto podéa pensarghe mi. La risposta l'è stà positiva, l'era un momento par no pensàr al mal e una rivincita come "speaker", tegnendo conto, che da più de vint'ani l'era nel setòr. Par registràr 5 minuti, le nostre ciàcolade le podéa duràr un par de ore. Un giorno, mentre vegnéa fora da la Cèsa de San Zèn, dopo avèr tacà una dei tanti lumìni par èla, l'è rivà la so telefonada. El mal no gh'era più, un miracolo durà fìn al 2009, quando el s'a ripresentà con tuti i interessi. Par i 10 ani del sito l'ò volù con mi e cossita, da Varese'ndoe la s'era trasferì con so marì par le cure, l'è rivà a Verona. Un mese dopo, un sms de dolòr, me dise che no gh'era più speranse. Quasi ogni giorno un sms me diséa quanta soferensa g'avéa in corpo, par du mesi ò leto i so messagi e posso dirVe, che in vita mia, no ò mai sentì una cosa de 'sto tipo. Messagi che conservo ancora, come la voia de far Radio Scarpa in so onòr, parché èla, l'era speciàl, bona come un toco de pan e ringrassio el Signòr de averme dà la possibilità de avérla vù come cara Amiga....(Verona 03.02.2019 - El Diretòr)





Pin It