Veronesi tuti mati

Veronesi tuti Mati, l'è la rubrica che fa par ti se te vol passàr de le ore sganassàndo. Tuti i to problemi sparisse, te passi da le storie de i Paladini de la Giustissia a quele montane de i Du de l'Ave Maria. "I Grandi Classici" l'è la rubrica de la goliardia veronese co' i grandi poeti che merita de èssar vardà. Par finìr, el Canton de le Monàde, co' curiosità, barseléte e tante dimande co' risposte de vita vissù. Se par caso te si un buteléto, te consiliémo, de ciamàr i to genitori prima de lésar le rubriche, alcune parole no le fa parte de "l'Academia de la Leteradura"!!!
Altro

I grandi classici

Una rubrica particolàr l'è "I grandi classici" che te fa passàr i bruti pensieri e te fa sganassàr. I più grandi poeti de la "Goliardia veronese" co' le poesie più incredibili, Monaldo Todaro conossù come Tolo Da Re co' "La Banda in Piassa", "La cantada de l'Osèl" e "Lode a la scorèsa", el grande Angelìn Sartori co' "La Lode a l'ecelentissima merda", "Fasoi e artigleria" oltre al "Bognón", el nostro Diretòr Andrea Toffaletti co' la "Scorèsa vestìa" e la "Creassión", El grande Turcaine conossù come Attilio Turco co' "La rasa, la frasa", Roberto Puliero co' "Piutosto" e 'l nostro Rava co' "El ruto". No Ve resta che lésar quel che podèmo ciamàr opera d'arte più che poesia, el genio de questi artisti l'è de alto livèl
Altro

D.A.M. I Du de l'Ave Maria

Dal lontàn 1997 du butèi, Mi & Lu, co' la passión par la montagna, i s'à deciso, passo dopo passo a visitàr tuto quèl che la natura ne regala. Le prime peste ne la tera imbombèga da l'aqua iè stà intorno a Verona par dopo remenàr le montagne veronesi in longo e in largo. Parò se gh'è da magnàr o da bèar, no i se tira indrio e i mete i pié soto la tola anca ne la Bassa. Una gran esperiensa che nel tempo l'à ciapà par man anca el Triveneto. Se te serve un consilìo su le nostre montagne, le persone iè quele giuste. Nel 2016 i chilometri percordi a pié i è stà de più de 650 co' Alpi e Dolomiti, un vero record, par un totàl de 80 itinerari.
Altro

El cantón de le monàde

Una rubrica molto particolàr che te fa passàr la tristessa e la te farà sicuramente sganassàr. Una de le prime rubriche del sito, nata nel lontàn 2002, nel corso del tempo la s'à sgrandà co' tanto de parchè e par come. No te resta che lèsar le curiosità, le barseléte o spedìr i to pensieri a La Rena Domila. Segnala anca ti qualcosa de "strano" che t'è capità. El cantón de le monàde l'è una rubrica 'ndóe l'importante l'è no pensàr a le desgrassie.Se par caso te gh'è una dimanda, qua te pol stàr sicuro che no te cati la risposta, se te vol imparàr l'inglese qua te pol stàr sicuro che te ris-ci de imparàr el todesco!
Altro

OmoSignàpola e Pìtaro

La to çità l'è in pericolo? Qualche malvivente l'à cavà i semafori o s'à brusà la Pearà sul fogo? Te pol ciamàr i Paladini de la Giustissia, L'OmoSignàpola in compagnia del Pìtaro, i è pronti a sistemàr i problemi a Goto çity (Gotham çity). Se 'l Sindaco ordina, el comissario Cordoni risponde e ghe passa la bala al Tenente Arà che quasi sempre ciama l'OmoSignàpola che no bisón disturbarlo quando el varda la tilivisión da borghese, ne la so vila su le Toreséle soto el nome de Conte Brulé. Ogni riferimento a persone, bestie o cose l'è puramente casuàl e l'è fruto de fantasia!
Altro