08 Speciali - Le foto del Vènardi Gnocolàr 2020

Vènardi Gnocolàr 2019
Vènardi Gnocolàr 2019
08 Speciali - Vènardi Gnocolàr 2020

El Vènardi Gnocolàr l'è una manifestassión che da secoli va inànsi a "moto perpetuo". No serve grandi sforsi, basta far quel che s'a sempre fato, ma st'ano l'è andà pèso anca ciamàndo Calogero Jerry Calà come presentadòr. No serve grandi nomi, ma una bòna organisassión professionàl e no fata a la bòna desmentegando i problemi del passà. Una diesìna de ani fa, par creàr una note magica come quela del carnevàl de Vilafranca, i-è stà posissionà i càri in fondo al corteo gnocolàr, con risultado disastroso; el carnevàl l'è finìo a le ore 23 nel deserto completo. St'ano par nar de corsa, par far manco tempi morti tra 'na màscara e l'altra "busi" o restàr fermi par colpa dei caréti massa grandi, tuti i figuranti a piè i-è stà posissionà davanti al corteo. Pecà che le prime figure i-è entrà a San Zèn a le ore 16.30 e i primi càri un ora dopo, con poca zènte restà nel fredo de febràr e i buteléti scapà a casa da ore, visto che'l spetàcolo co' soli figuranti e bande, l'è belo fin a un çerto punto. Questa l'è stà vendù a i veronesi come "novità", desmentegà da ci organisa, presente nel 2020 come dies'ani fa. De solito se impara da le vacade fate, inveçe se preferisse nar inànsi sempre par la stessa strada. Tra le varie cose dite anca da i media in maniera storta, l'è la vera storia del nostro carnevàl decantà come el più antico d'Italia e d'Europa; pecà che in Italia gh'è almanco 5 carnevàli più veci del nostro e co' data de fondassión sicura e no inventà come la nostra. Me riferisso a quèl 1531 e a la fola de Tomaso Da Vico completamente falsa. Ci fa el paiàsso no l'è bon de far cultura, ma ci fa cultura pol far anca el paiasso! Mi a TelePaçe ò spiegà la vera storia del nostro carnevàl, che l'è ben diversa da quèla presente sul sito ufissiàl del Papà del Gnoco. Dominica de carnevàl 100 cavài, da Castèlvècio i fa el so giro fin a San Zèn, par rievocàr la cavalcata de Tomaso Da Vico, con poca zènte presente, fata par far colòr (se catémo do cavalcate in pochi giorni una nel vènardi e una a la dominica... mah!). El marti in Gran Guardia un bel convivio, ma riservà a pochi visto el costo del biliéto. Un altra cosa, parché a San Zén, devo pagàr un piato de gnochi se storicamente l'éra una distribussión gratuita? Un tempo el carnevàl se faséa grassie a quèl ricavà dai dazi su castagne e olive. Ritornando al Bacanàl 2020, bisognarìa vardàr la qualità e manco la quantità, e staolta i càri de qualità che podéa nar a Cento o Viareggio ghe n'èmo contà 3-4; le màscare co' relativa corte i-èra composte da un s-ciapo de persone, giusto par far presensa. Così no va, qualità o se stà a casa. Le màscare italiane, come qualità no i-èra tanto distanti da quèle de la nostra provinçia, le servìa giusto par far folklòr. El vilàio del carnevàl l'è restà piantà a San Zèn, co' tàole e panche, fin a mes'ora prima de l'inissio de la sfilada mentre la sera prima el g'a ospita la squadra de calcio de l'Hellas Verona, Cosa çentra el carnevàl co' el balón? E par finìr in belessa, in via Adua l'è saltà una tubassión e i ultimi 5 càri ghe toca tornàr indrio a le ore 19.45. S'a visto un missioto de cose, come dito, bisón vardàr la qualità e magàri scurtàr el percorso par vie più larghe, finendo prima che in çiel, se veda le stele. Voto Bacanàl 2020 de La Rena Domila.... 5-5 1/2 l'an passà èmo tegnù un voto alto.  El Diretòr

 




 
Pin It