Sempre de corsa _LR Notissie

sempre de corsa con le manifestassioni a verona
sempre de corsa con le manifestassioni a verona
Sempre de corsa

Piassa Bra e la pora Rena i è deventà teatro de le corse ciclistiche e podistiche mentre tuto el casìn va a finìr nel resto de la çità. A 'olte càpita che le manifestassioni le tàia a metà la çità, par ore, come nel caso de le maratone. Quindi o te devénti atleta tuto de un colpo o te resti serà drento in casa par mesa giornàda. La StraVerona la porta più de vintimila persone ma le altre manifestassioni manco de la metà. Ma no se pol cavàr qualche corsa o far in modo che rompa de manco i maroni a i altri 250.000 abitanti de Verona? Eh no, 'desso se parla de far quela da Màntoa a Verona nel 2021 con gràn finàl drento a La Rena. Grande evento el dise el sindaco che unisse do çità culturàli e vissine. Màntoa par via de cultura, la fa molto de più de Verona, tegnendo conto che l'è 3 volte più picenina. Noàntri semo fortunà par el patrimonio storico-artistico presente e par qualche mostra organisà ogni tanto de un çerto prestigio. Par el resto gh'émo concerti e una manifestassión folcloristica che se vol far passàr par culturàl. Le serate culturali inveçe i-é sparse par la çità e quasi sempre no se sà de l'esistensa. Ma la cultura no porta schéi e in tanti casi l'è fata da volontari, tra cui professori e vari esperti che g'a passión par 365 giorni l'an. Una politica che l'è ecologista solo par pochi giorni,che no varda al PM10, ma che te fa còrar ne le pòlvari sutìli. Parchè no realisàr una pista ciclabile da Verona a Màntoa, drita come un autostrada par le auto? Meio una corsa, manco complicà par le menti politiche. In Comùn se parla de ecologia, de cultura e de sport, ma i-è discorsi scolegà tra lori come le piste ciclabili. Ma ogni tanto salta fora una perla, come quèl Consiliér Comunàl che g'a proposto un ponte pedonàl da la Giarina a Sotoriva, inutile come el filobus. Mi, in Consilio g'avaréa proposto la ricostrussion del Ponte Postumio, co' el marmo cavà da le preàre de la Valpoleséla. Ma questo fa parte de la nostra storia, massa complicà. Se inveçe, se vol pensàr a l'ecologia, magari, le biçi nolo-comunàli sparse qua e là nel çentro, podarìa èssar sistemà anca nei vari quartieri, in modo da lassàr l'auto a casa. In pratica, ghe vol piste e zone verdi par far sport, par còrar o nar in bici; le manifestassioni le dura mésa giornada....... Giani Carpenea da Vilabartolomea (Verona 10.07.2019)...


Pin It