La colpa l'è tua, politica e promesse _LR Notissie

La colpa l'è tua, politica e promesse
La colpa l'è tua, politica e promesse
La colpa l'è tua, politica e promesse

Quando semo in periodo de elessioni, in particolàr quele par el novo sindaco. le promesse e le idee supera la fantasia, ma ci te voti come primo çitadìn te'l conossi ben o quasi e te gh'è massima fiducia, tanto da parèr l'unica cosa sicura, mentre quando se vota par le politiche nassionali, te toca fidarte dei giornài, de internet e vardàr al partito, pitòsto che a la persona. Ma, nele realtà picenine, salta fora le comiche. Un sindaco el nomina i so assessori, ciapando de le decisioni insieme, secondo un programa eletoràl. Uno dei assessori deventa sindaco 5 ani dopo, ma el fa varianti ai progeti pronti a partìr, disendo che'l sindaco prima no'l capìva un casso e l'è giusto cambiàr. A quel punto el vécio sindaco, organìsa 'na conferensa stampa, diséndo che con lu l'è cose i-èra partì, o mejo, messo zò el primo quarél, no specificando magari un debito futuro par i çitadini (a 'olte l'è così) mentre co' el novo sindaco (so assessòr e compagno de tante batàje) l'è tuto fermo e vién blocà. Se catemo dopo altri 5-10-15-20 ani con in man un pugno de mosche, nissuni l'è riussì a far qualcosa de novo, parché, a modificàr le cose pronte su la carta e firmà da un qualsiasi Ministero, pronto a contribuìr a la spesa de una qualsiasi opera, pol èssar blocà in maniera definitiva. El ris-cio gh'è sempre. Poche idee e confuse, figurémose se 'l Ministero a Roma el sà, cosa  fà le realtà de pochi abitanti come par esempio la nostra. Dopo tuto 'sto discorso, femo un par de esempi pratiçi, sensa far nomi; arsenàl e filovia no ve dise gnente? L'importante l'è dar colpa sempre a quel prima e in çerti casi anca a quel dopo, ma la nostra çità l'è ferma. Se vardémo al filobus, gh'èra 60 ani fa. Podémo dir de far come i gàmbari!......... Piero Marùgolo (Verona 17.07.2019)


Pin It