Verona capitàl de la cultura 2021? _LR Notissie

Verona capitàl de la cultura 2021?
Verona capitàl de la cultura 2021?
Verona capitàl de la cultura 2021?


I nostri politici, ghe piase cantàr una cansón dal titolo "cultura". Ogni tanto salta fora, magari par el periodo eletoràl, par lassàr un segno a la çità giusto par un pugno de voti in più. 'Desso se vol Verona capitàl italiana de la cultura, co' tanto de candidatura, cosa riussì ani fa a Màntoa. Dopo parò te vedi el sindaco tra el Papà del Gnoco e la squadra de balón de l'Hellas Verona e te capissi che gh'è qualcosa che no va, soratuto parchè el carnevàl dovarìa tor par el cul ci ne comanda. In questi ani la cultura l'è stà desmentegà da la politica, lassà da 'na parte, ricordando solo i soliti eventi, come la lirica, i grandi teatri e qualche mostra ma scondendo le cose manco visibili a i oci dei veronesi fate in gran parte da associassioni e volontari, magari fora dal çentro storico. El volontariato l'è una miniera che'l più de le 'olte no'l vièn aiutà, magari ci le fà, vién scambià par mato o i ghe dise che g'a dei interessi sconti da qualche parte. Tante 'olte, nissuni s'a, quanti e quali eventi culturali gh'è a Verona e stranamente vién publicisà sempre quéi. Se vardémo la festa de San Roco a Quinsàn l'è nata nel 1480 ma no vién aiutà da l'aministrassión comunàl in particolàr par i eventi che se cata durante tuto l'ano. De cose de 'sto tipo se ne vede un po dapartuto, gnanca un strasso riconossimento a La Rena Domila che da vint'ani porta avanti la cultura veronese e che tra l'altro l'è presente sul sito del Comùn. Ci fa cultura el séita a farla, el più de le 'olte tirando fora schèi dal propio tacùin sensa pretèndar gnente in cambio. Caro Sindaco, la cultura fora da le mura de Verona gh'è sempre stà, forse bisognarìa savèr el significato de questa parola e far in modo che la vaga insieme al turismo, fonte de vita par la nostra çità.  (Verona 25.02.2020)... 

Pin It