La Colonéta ciavà _LR Notissie

la colonéta ciavà a Brea
la colonéta ciavà a Brea
La Colonéta ciavà


Poco fora la contrà Brea a Selva de Progno, l'è stà ciavà la famosa colonéta de la Madona, un opera vècia de 200 ani scolpì da Francesco Gugole. Uno dei simboli Lessinici che no gh'è più, che podémo solo ricordàr grassie a le foto. I ricordi parò i serve fin a un çerto punto anca parché oltre a èssar come dito un simbolo l'è un qualcosa de unico par la so forma poligonàl sora al piédestàl e par quel che ghe stà scolpì; da 'na parte la 'Sunta e de l'altra la Pietà incoronà. Nei secoli s'a visto benedissioni, devossioni e pelegrinàgi da molto lontàn, ma ciavarla l'è un gesto che te fa restàr sensa parole. I paroni del terèn 'ndóe se catàva la colonéta i g'avéa paura da tempo che la podesse èssar ciavà, defàti i g'avéa messo de sora un brasso mecanico de un càrga-luàme, prontamente spostà dai ladri. Ma parché ciavàr questa colonéta spersa a Brea e soratuto parché i paroni del terèn i g'avéa tuta 'sta càga? Ci pol averla ciavà? Un opera de 'sto tipo quale marcà pol 'verghe? Mah, disémo che visto el peso, el ladro no l'éra da solo. Intanto in Lessinia gh'è ci vol darghe 1000 euri a ci fornisse informassioni utili a i Carabinieri par catàr la colonéta. Sperémo che un giorno la possa tornàr indrio anca se, de 'ste sculture, da ani, ghe ne sparisse una ogni tanto; ghe nemo perse almanco 20 de le piassé de 100 contà tra le zone de Verona e Vicensa. (Verona 02.03.2020)... 

Pin It