Cultura Irlandese (LRI)

Tuto quel che te devi savér su la storia e la cultura irlandese partendo da la preistoria par rivàr fin ai Celti. Un argomento bel grando che la nostra Evy l'è riussì a spiegàr in poche righe. Ve invitémo a butàrghe un ocio, la cultura irlandese l'è veramente interessante. Cosa te speti?

 

  

 
// Podarìa interessarte
La Rena Irlanda Redassión + Curiosità + Cultura

> CULTURA, POLITICA E RELIGIÓN DA LA PREISTORIA AL DÌ DE ANCÓ

Cultura, politica e religión da la preistoria al dì de ancó
Introdussión - Questo spassio e volarìa averghe la pretesa de deventàr 'na rubrica, a la bona, par tuti i veronesi (e non) che vol saver un po de pì su la storia irlandese. Eco alora che nasse sta rubrica che, a poco a poco, la percorerà tuta la storia de l’Irlanda in modo semplice e ogetivo. Le fonti a le quali farò riferimento je de lo storico irlandese Séamus Mac Annaidh. L’isola de l’Irlanda la stà a la vista de la vissina Gran Bretagna e, anca se nel corso dela storia le sa intrecià un saco de olte, je rimasto do posti molto difarenti. I romani i vedea l’Irlanda (conossua come “Hibernia”) un posto fredo e inospital ma invese i Vichinghi i ghe tegnéa a navigàr par el longo da la Scandinavia fin chì. Prima in viagi de andata e ritorno e dopo i ghe anca rimasti. I Normani, dissententi de quei popoli che abitava l’atual Francia, i vedea l’Irlanda come n’estension del loro regno in espansión. Con l’andar del tempo i cari veci Normani je diventà pì irlandesi dei irlandesi stesi! Altri Normani invesse je diventè francesi o inglesi e..ja scomessià a farse guera. Sucesivamente gli inglesi ja scomessià a voler conquistàr ste tere e ja sempre visto l’Irlanda come na colonia da esar sotomesa e integrà nel loro regno. Ma la vecia tigre celtica no la g'avea nissuna intenssión de sotometarse e esar tratà a la stesa maniera de l’inghiltera. Col pasàr del tempo e dei ani, conquistar l’Irlanda dovea parer pì come un problema sempre pì groso che come na facile conquista. L’Irlanda! Con la so cultura leteraria e le so tradissioni le na tera che gli inglesi no ja mai capìo in fondo. L’era (e forse l’è ancora) un posto selvadego, pien de magìa e superstissioni ma nelo steso tempo el so nome el s'a fato conossar in tuta Europa par i so santi e i so scolari. Questa l’è la tera da le mile face, amorevole, in scrutabile, frivola e fanatica ma sagia. Da i eroi de la grande mitologia ai protagonisti de la grande Famine. La lengua e la storie tradissionali je sempre ste na parte central de l’esar irlandese. Una de le prime favole de l’epica irlandese, Tain Bo Cuailgne, la conta de come i poeti – quei che a mantegnuo vive le storie – i se sia catà tuti assieme par contarsela e ricosrtuìr, ci con un toco ci con n’altro, la storia che i riusciva a contar de l’epica afinchè questa la vegnese preservà par tute le generassioni. Questo el sucedea molto prima che i monaci cristiani del VIII secolo, anca lori i g'avea na pasion par le lengue, i trascrivesse el tuto sensa saver che i stava dando vita a na cultura che la fondea tradissioni bardiche a la scola cristiana. L’impato de l’irlanda ne la cutura del mondo moderno la g’à momenti diversi come el premio Nobel par la letteratura Seamus Heaney che l’è l’ultimo esempio de chel che sta tera la sempre creà e che continua a fiorir. El novo vissin al vecio el coesiste ben da ste bande. I giovani irlandesi te li senti ciacolar in un local tuto ala moda come nel pub de campagna con le cavre fora. Nel’Ovest ghe i famosi “Cottage” con le parabole satellitari fora. La magioransa de la popolassion le zsoena e, in un certo modo, i definisse quel che al giorno de ancò significa esar irlandesi, giovani europei. Con 5.5nmilioni de persone l’isola l'è al centro de na produssion Hi-tech con grandi industrie. ( un esempio? Vissin ndoe laoro mì gh'è la “Microsoft”) De sicuro l’isola la ofre minerali e carbon in abondansa ma la vera risorsa jè i so zoeni che jè inteligenti, amichevoli e anca entusiasti de quel che i gà. Ne lo steso modo l’imigrassion dei europei cossita come de inglesi e americani in sta tera le testimoniansa de come molte persone le abia deciso che questo l’è un bon posto ndo vivar, laorar e tirar su fameja. Ben soma, el futuro no le conosse nissùn ma a mi me par che l’Irlanda la g'abia le carte in regola!
 

> ZENTE DEL MESOLITICO IN IRLANDA

Zente del Mesolitico in Irlanda
Sta maraja del Mesolitico irlandese la vivea pì che altro nela parte Nord de l’isola e forse i era pasà da quei che ancò se conosce come Scossia e Wales, infati la costa dell’Irlanda la se pol védar da entrambi sti paesi. Sti popoli i vivea in picoli grupi de solito visini a la costa o ai fiumi, iera presochè nomadi e i vivéa de cacia in un teritorio molto diverso da come l’è l’isola de ancò. I primi insediamenti jè ste catè sula riva del fiume Bann visin a Corelaine e l’è datà a 7000-6500 a.C. El sito antropico piassè vecio del’isola el data a novemila ani fa e l’è pien de sasi apuntii che i vegnéa usà come cortei o sisore. Nno se sa se de sicuro da ndoe sta zente la vignesse con sicuressa ma iera forsi provegnenti da Nord-Est. Testimonianse je ste racolte a Coleraine, Dundalk, Boora nela contea de Offlay e nel Sud a Blakwater.



> IRLANDA NEOLITICA

Zente del Mesolitico in Irlanda
A Nord de la Contea del Mayo, vissina a Ballycastle, ‘na serie de piere je ste de recente desquerte ne no scavo, jera soto 6 metri de pantan. Sto scavo le sta importante parchè l’è na testimoniansa ciara che na olta da ste bande ghera tantisima zente. Le popolassioni del Neolitico je, par capirse, chele responsabili dela costrussion de el famosissimo passajo de Newgrange nela contea de Meath, (vedi foto) de 11 metri de allessa con un diametro de 85 metri: questo l’è el laoro de na società ben organizà! Monumenti simili je ste catè anca a Knowth e a Dowth lassandone sensa alcun dubio sul fato che na grande popolassion la vivesse nella Val del fiume Boyne. La grande tomba de Newgrange lé la testimoniansa real de come l’orientamente de ste popolassioni el fosse all’astronomia, un picolo foro su un lato dela tomba (de 19 metri de longhessa) el lassa passar un ragio de luce che ilumina tuta la parte central dela camera al tramonto del solstissio de inverno. Gli archeologi i data la tomba a cinquemila ani a. C. cioè 500 ani prima de la costrussion de le Piramidi egissie e 1000 ani prima de Stonehenge. Ancò Newgrange l’è conossuo come uno dei siti più antichi del mondo.

> PRIMI MITI E LEGENDE

Primi miti e legende
N’altra storia paralela su le origini d’Irlanda l’e contà da dei storici cristiani del 1100 a.C. che i colessionò e unì asieme credense e legende che le fasea chiaramente parte de na tradission molto pì antica. Ste storie le conta de giganti, de zente supernatural, de grandi battaglie , de divinità e de incantesimi magici. Vien dato ala genealogia irlandese un origine dai tempi de Noè – via spagna, Egito e Babele – e le conta de come persone conossue col nome de “Milesians” le abia conquistà l’Irlanda caciando da la tera popolazioni come i Fir Bolg e i Tuatha De Danann. I Milesians jè conossui par esar i veri progenitori de la gente che ogi ciameno “Irlandese”. N’altra caratteristica tipica de le storie irlandesi l’è dinneseanchas, o “tradissioni del posto”, ndoe el cantastorie el serca de spiegar come un luogo el g’abia un serto nome o na serta morfologia, Giant’s Causeway nela Contea de Antrim, la saria el laoro del gigante Finn McCool. Finn l’era un comandante o un re, no se sa, de l’esercito irlandese. Le storie le conta che Finn el riusisse a cavarse le spine dai calcagni anca quan chel corea e che el fosse bon de grandisime proe de forsa. Se conta che na olta un gigante el g’avese fato girar le scatole, alora el nostro eroe Finn el ghà tirar un bloco de tera doso, ancò chel bloco de tera lì l’è l’isola de Man. El buso lassà invese l’è el lago de Neagh.La storia irlandese l’e rica de miti e legende de sto tipo. Certe l’è g’à un che de mistico e sacro, come la storia de San Partissio, patrono de Irlanda. Altre invesse jè piene de fate e foleti asieme a re, principesse e divinità mistiche. Zontaghe druidi, i Celti e la nassita de la Cristianità che la linea tra che'l che ghe de vero e chel che ghe de fantastico la svanisse pian pian…

> L'ETÀ DEL BRONSO

L’Età del Bronso
Jè molte le testimonianse de sta zente del bronso che la scomessiava a messiàr i metai par crear armi e utensili, semo nel 2000 a. C.L’età del Bronso in Irlanda la dura fin al 500 a. C, periodo in cui riva i Celti. La carateristica pì tipica de sta era je i “Dolmen”, chesti je 3 piere piantè al teren con na piera piata mesa in sima ale altre a formar la parte sentral del cumulo tombal. Dopo moltisimi secoli la tera intorno no la g’è pì e ste piere le se cata rialsè contro la linea drita de l’orizonte. I domen i pararìa esar stè costruìì par tombe singole o anca par interi siti tipo cimiteri. De tuti i strumenti in bronsde sto periodo l’Irlanda la g’à un grandisimo numero de esempi de trombete varie e campanele. Oltre pì de 100 tentativi jè sta fati da studiosi par sercar de far sonar sti campanei e trombe de l’età del bronso irlandese dopo i molti falimenti una dele pì significative scoperte l’è sta chela de risonar el corno irlandese, scossese e inglese de l’età del bronso.

> L'ORIGINE EUROPEA DEI CELTI

L’origine europea dei Celti
I Celti iera zente del periodo del fero che i vegnea dal’europa centrale ma – i dize- i fusse de origine indo-europea e i ariva in Irlanda nel 500 a. C. Da i utensili restà ai giorni de ancò, par esempio ornamenti, zoiei o armi, se capisse come i fusse fortemente influensè dal nord Europa nele tecniche e nei decori. Le tesimonianse archeologiche le ne dize come diverse popolassioni celtiche le sia rivè chi a scaloni tra el 500 a.C al 500 d. C. Queste je conossue come le sivilizassioni de Hallstadt e de La Téne, questa la influenza l’Irlanda nel 200 a. C.e la ghà come i primi siti conossui in Austria e quei pì tardi in Svissera. L’area geografica conossù come Gallia la se catava tra Francia, Belgio e gran parte dela Sviscera. I era tere de gran diferensa sia geografica che climatica che portò ala diversità le varie popolassioni. Anca se el mondo dei Celti o Keltoi l’equival el se risolve soto el nome de la Galia questa no l’era tuta celta: gh’era iberici nel Sud-Est, i Liguri tuti intorno le coste del Mediteraneo, i Greci a Marsilia e i Germani atorno al’area del’alto e basso Reno. In Galia come par le popolassioni italiche la distinssion tra celti e non celti a un certo punto le dificile da definìr.

> LÉNGUA CELTICA

Léngua celtica
“Celtic” l’è un termine (pronuncià con la “c” dura) che descrive un grupo de lengue ancò rapresentè da Irlandese, Gaelico Scossese e Manx, quest’ultima la apartien al grupo gaelico ciamà dela “q”. Invesse Bretone, Galese e la lengua dela Cornovaja je ciamà gaelico de tipo “p”. I celti del grupo “p” i se ciama cosita parchè no i savea pronunciarla sta consonante e alora par esempio el pater latino el diventa in irlandese moderno athair opure i cambiaa el sono dela “q” par cui da porpora (purple) i disea in irlandese corcora. Quei che parla irlandese i pol capir sensa problemi ci parla el Gaelico Scossese ma no i capisse quei che parla bretone o galese parchè sti do grupi de lengue le sa svilupè a distansa par domila ani o pì. Le lengue celtiche insulari je chele che pì sa svilupé nele isole, tipicamente Britagna, Irlanda, l’isola de Man e parte de la Francia. Le lengue insulari je divise in do parti le Goidelic e le Brythonic. El Manx lé na forma de gaelico parlà ne l’isola de Man e l’ultimo nativo a parlar chela lengua originale l’è morto nel 1974 ma ancò molti i serca de recuperar la memoria storica e imarar la lengua da ci ancora se la ricorda. La lengua irlandese e scossese le ancò parlà anca in Nova Scotia, in Canada e la diventa giorno dopo giorno sempre pì un fator de valor cultural, de grande orgojo e de identità storica.


 
// Podarìa interessarte
La Rena Irlanda Redassión + Curiosità + Cultura



Pin It