Guida & Curiosità Irlandesi (LRI)

Cosa gh'è da èdar in Irlanda? Com'èla la festa de San Patrissio vista da una veronese? Come giràr l'Irlanda in compagnia? Tante iè le curiosità de questa rubrica irlandese, che la grande Evy con sempliçità la ne mete nero su bianco. i so consilii iè interessanti e i pol darVe 'na man se par caso volì far una vacansa da quele parti....

 

 

 
// Podarìa interessarte
La Rena Irlanda Redassión + Curiosità + Cultura

> COSA CATÀR IN IRLANDA

Cosa catàr in Irlanda - Curiosità de l'Irlanda
Tanti i vien in Irlanda con mile aspetative de sènari soranaturali, de energie magiche, de natura romantica e…i torna a casa forse un po disilusi parchè i se spetava qualcosa de diverso. Certo l’è che le tradissioni folcloristiche e la mitologia irlandese messià ai sènari che ghe da ste bande fa in modo che un qualcosa de magico suceda. Te vedi ‘sti sènari e dopo te entri in un pub qualsiasi e tra no stufado de agnel e un par de patate (che no le manca mai, de ogni forma e color!) te te ricati nel così conossuo "Irish Caric" cioè el tipico divertimento al’ irlandese: bireta, musica, ciàcole. E se te si fortunà nel pub i taca anca el camìn e alora te te cati propio nel posto giusto. In Irlanda, el famoso ciél el cambia rapidamente par l’efeto che el vento el g'a su le nùgole, i colori nel giro de un minuto jé diversi e te par che el tempo el se fermi o el cora pì veloce. El spassio el te ziga ne le recie grassie al vento e l’orizonte l’e imenso. El belo l'è che te pol caminàr da na spiagia a na colina, da un prà pien de fiori a un lago e tuto nel giro de poche ore. La geologia de sta tera l'a fato in modo che, pur esendo n’isola picenina, la gabia sta richessa incredibile. Quel che gh'è assolutamente da 'edar l'è tantissimo e te poderìa 'egnar la oja de tornàr in sta tera pì olte..ancora e ancora: mì l’è da tredese ani che vegno qua e desso ghe vivo anca e.. no la ma gnancora stufà sta isola 'erda! Te arivi qua, la magioransa de le olte, da Dublìn. Dublìn la g'a parechio da ofrir e l’é un bon punto de partensa, l’e piena de osteli, b&b e otel de tute le stele e sorte. Pub ghe ne fin che te te stufi e ristorantini de qualsiasi etnia anca. De irlandesi ghe ne ma te capitarà de sentir parlar in ogni lengua trane inglese probabilmente…polaco, spagnolo, indian, cinese… apena fora da la capitàl pero te te inoltri ne la vera Irlanda e nel giro de poco te te rendi conto ndo te sì, anca se da la vista aerea la pol dar emossioni.
 

> COSA GH'È DA 'ÈDAR

Cosa gh'è da 'edar
Ha, Penny Bridge DublìnDUBLIN! Da 'edar: Temple Bar, San Stephen’s Green, la National Gallery, el National Museum e le verie cése come San Patrik e Christ Curch. Tote na cartina turistica e dage n’ocio. Par moarte ghe: autobus, la Dart e la Luas e n’infinità de taxi. I punti turistici i gh'è un po ovunque quindi par informarte no te g'he meti gnente anca parchè jè molto organizè da sto punto de vista qua invesse par quel che riguarda puntualità de trasporti mia massa. Scioping! Scioping! Scioping! A Grafton strit, Henry Strit e nei vari centri comerciali sparsi ovunque. Se te gh'è bisogno de supermercati i mejo par qualità e presso je: Tesco e Dunnes. Le porte de DublìnGhe anca de le coriere “coach” che te porta ovunque in Irlanda e i bilieti i costa veramente poco. A Sud de la çità ghe le montagne de Wicklow e te par za de esar da l’altra parte del mondo. Se te rivi da l’aereoporto de Shannon, ne la costa Ovest te si a un tiro de s-copo da la contea del  CLAIRE 'ndo ghe le famigerade scoliere de Moher (vedi la me foto son proprio là!) e lì vissin gh'è el Burren. a sud del Claire gh'è la contea del  KERRY con el visitatisimo Ring of Kerry. Al Nord invesse del Claire gh'è la contea de GALWAY e el Connemara, pì a Nord te gh'è el DONEGAL mentre de fronte a Galway gh'è le famigerate e stupende isole Aran. Andando a Sud te cati CORK. Andado sempre a Sud gh'è Waterford City e Wexford. Al’interno isola el sénario l’è un po manco incantevole ma ghe tanti siti archeologici e storici de gran importansa. Le tombe preistoriche de Newgrange ne la contea del Meath. A Cork ghe tanti “Stone Circle” e cioè Sercoli de Piere (no le che'l sona cosita ben en veronese …) gh'è tombe e çerchi fortificadi ovunque ne la parte Ovest. Cése cristiane ghe ne parechie e le pì importanti jè a le Skelling Michael e a la Rock of Cashel, sensa parlar de le atmosfere che se cata a Clonmacnois, Glendalough e Monasterboice. Verso el Nord de l’Irlanda la campagna l’è imensa e stupenda, quasi selvadega in certi punti. El Nord je le verdi Glens of Antrim. “Glen” in gaelico vol dir “Vale” e le binare geometrie de le Giant’s Causeway. Nel Sud-Est Down la ofre la serena natura del Strangford Lough con la grande presensa de le Mo’urne Mountains, mentre all’Ovest Fermanagh gh'è el sénario del Lough Erne un favoloso posto par i sport de acqua, la pesca e par esplorar i resti de i monasteri. Eco! Un po de “TIPS” (=sugerimenti, come i le ciama chi) par farse un’idea inissial de ‘ndo se preferisse andar…
E par la felicità de tuti ve do un po de siti de compagnie aeree:
www.aerlingus.ie
www.ryanair.com
E par inissiàr el to sogiorno a Dublìn visita l’agiornatissimo sito
www.visitdublin.ie
Par mì la meio maniera de girar le ciapàr na machina e ndar ndoe te porta el vento, sensa far massa programi e sensa farse massa storie.



> L'È RIVÀ SAN PATRISSIO

L'è rivà San Patrissio
“San Patrissio vien de note co le scarpe tute rote…col capèl de la Befana…” Forse sbajo storia… Carnival in Irlanda? foto san patrissioPiù o meno Desmentegheve fritole e spiuma da barba: qua ghè San Patrissio chel porta: gnomi, fatine, carri, gente in mascara, teatro de strada, bande americane e la famosa parada. Tanta, tantisima cagnara, i pub i se impenisse de gente e le strade le se impissa de alegrìa. Finalmente le giornate jè pì longhe e la primavera a le porte. Per Paddy’s day fameie, butei e maraje varie (tanti turisti) jè in giro a far bordél. Gh’è sinque giorni de festa anca se chel pì importante l’è el 17 de Marso giorno de la morte del santo nel 461 d.C. che se celebra con la famosisima parada Visto che ve voi ben e che ho scrito poco sti mesi, ve “regalo n’anticipassion” e un po’ de storia de sta festa. Inansituto Patrissio l’e chel, che l'à butà fora tuti i bissi da l’Irlanda con un campanèl, logo san patrissio 2l’è partìo da la ponta de Croagh Patrick, 'na montagna alta 765 metri, meta al dì de ancò de pelegrinagi crisitiani. Infati, picola curiosità, qua in Irlanda no ghè bissi (de chei veri!). San Patrissio l’à cristianizà tuta l’isola, l’à fondà un saco de cése che se cata sparse su tuto el teritorio. Patrissio el ghe spiegava la religiòn a la gente usando un serfojo (trifoglio) che'l simbolegiava el conceto de Trinità: Padre, Figlio e Spirito Santo. El serfojo, ciamà Shamrock, l’è ancò el simbolo de l’Irlanda (insieme al’arpa dei bardi) e qua, par mascherarse, i se le pitura in facia. Eco alora che par selebrar ‘sto Santo Santisimo i nostri amici irish i fa i bagordi e, tanto par cambiar, i bee un par de pinte. L’e un carneval!!! San Patrissio l’è festegià dapartuto in ogni cità e vilagieto irlandese ma, fator comerciale molto importante, l’è festegià in tuto el mondo. A Boston par esempio i colora el fiume de verde, infati sta cità le molto conossùa par éssar stà in pasado meta de migrassioni irlandesi. A Verona sicuramente ghe sarà dei pub che festegia “in verde” la giornada e alora: piturìve la facia de verde, tachì na bandiera irlandese a le finestre e via coi festegiamenti! La festa NasSionàl de St Patrick (Paddy’s day) la scominsia el 12 de Marso fin al 17, giornada de la parada. Eco el programa par quanto riguarda Dublin: 14 de Marso - Cacia al tesoro: divertimento aSsicurà par tute le età! Con la scusa de catàr el tesoro se scopre la cità Skyfest: zughi pirotecnici spetacolari e musica; 15 Marso: Merrion Square la diventa na piassa con eventi sparsi ndoe de certo no se se stufa; 17 Marso. La Parada!!! Da no pèrdar, màscare, ospiti dal’estero, bande Cèilì Mòr: el pì grande evento de dansa e musica tradissionàl irlandese con la famosa Kilfenora Cèilì Band Durante tuti i giorni del festival ghe sarà eventi musicali, spetacoli in gaelico, teatro da strada. Spero de vèdarve in tanti… mi laorerò piturà de verde, ma dopo le 4 TUTI “IN PIASSA”!!! Ve speto…

> UN GIRO PAR L'IRLANDA CO' LA EVY

Un giro par l'Irlanda co' la Evy
La pì bela roba da far quando te vivi a Dublìn le ciapàr na machina e ndar a védar cosa ghè là fora da la çità, o come i le ciama chi la Dirty Old Town (la vecia çità sporca). Sa far? Sa no far? Ndo ndar? De preciso no lo sarevemo mai. Fato sta che mì e do me amighe emo ciapà el via, afità la machina e vinto lo scago de la guida roèrsa. Emo pontà el dièl e semo ndè verso Sud. Prima tapa: la çità de Kilkenny ‘ndo emo catà un ostèl del dopo guera –ah g'avéa paura che i ragni i me Dublìn de notemajasse evyde note! i era neri e grandi come la me facia- ma se sen adatà ala mejo ne na camareta da quatro. Parchegià e meso zo un po de roba emo scomensià a caminàr e a capir ndo l’era el çentro. Se sen subito acorte che gh'era na specie de festival (Kilkenny Arts Festival www.kilkennyarts.ie). Qua in Irlanda la çità piassè granda l’è Dublìn, le altre, Kilkenny compresa, le par San Giovani, Isola…insoma lori i le ciama cità…mì le ciamo paeseti, citadine. Comunque sia gh'emo avuo sta fortuna de védar el paese in festa con bandiere giale e nere da par tuto e musica dal vivo nei vari pub e tanti fiori. Apena fora da l’ostèl emo caminà su na colineta ndo gh'era na césa gotica. La catedràl de St. Canice le datà ala metà del 1300, la gà dele tombe del XVI e XVIISpire Hanry St. secolo fora che jè originali e na tore de lato tipica irlandese che se ciama Round Tower. Verso el çentro emo fato un bel gireto a piè e se sen sentà fora in un bel pub a St Kieran Street, una dele principali. Kilkenny l’e na cittadina medievale, gh'è un bel castèl grando che el gà la vista sul fiume Nore e su un parco grandissimo, tegnuo da dio ndo gli Irish i va a portar a spasso el can, a zugàr coi butini e i va anca a còrar. Dal fiume se vede l’altra parte de la cità e un bel ponte. Ghe tanti localini moderni ma anca pub tradissionali ndo bear, magnar e far quatro ciacole. Oviamente gli Irish no i magna tardi la sera e i sèra le cusine par le nove o diese massimo. El giorno dopo semo ndè in serca de un po’ de ciesete e bassorilievi su tori e je tute in vilagieti super picoli e nascosti. Le indicassioni tipiche je del tipo: al cimitero sula sinistra gira a destra par l’uficio dele poste (che l’è verdo) e va drito fin al primo campo de cavre…se sen capii? El tuto in un acento che fa invidia ai nostri veci. Ben , l'è così che emo guidà par un po’ a Ovest e emo sercà el castel, cioè le roine de Baleen Castle del 1647, a Freshford. I paroni no i gh’era ma emo deciso che, dopo tuta la strada fata e la fadiga par catarlo, l’era meo darghe n’ocio. El castèl l’è in un campo privato dei signori Bowling e l’è circondà da filo spinà ed eletrico. Che l’è elettrico lo so parchè quando stavo scavalcando ò ciapà la scossa. “Da fogo!” me son dita, desso rido ma in verità o ciapà un bel spaento! Par cui cari butei: mai scavalcar un campo Irish! Da Freshford emo ciapà na “scorciatoia” par ndar a Clomantagh ndo ghe un castel del XVI secolo. Se sen perse nei boschi. Emo fato un po’ de stradine a dopio senso con un saco de curve ma ala fine seguendo le istrussioni de un vecio col can (ala prima a destra gira…) emo catà la strada principale e, dopo un poco, el castel. La tersa tapa l’è sta nela contea de Tipperary a Cashel, ndò i fa el sidro, ma noialtre sercavimo sempre un castel. In realtà ghe na roca medievàl stupenda che la se vede za da la strada e par de esar in una favola. Sula roca ghe na catedràl gotica tuta in roina, sensa teto e con dei muri ricostruii ma se vede chiaramente certe decorazioni e ghe na parte che le medievale del 1100. Fora se vede un evy paesagio da cavàr el fià e ve lasso n’altra de le foto che ò fato che un po la rende l’emossión proà. Da Cashel emo deciso de ndar verso el mar a sud e emo sièlto Wexford come meta finàl de la giornada. Arivà là emo parchegià al porto e fato un gireto par vedar de prenotar un Bed and Breakfast. Dopo un po’ de giri ne emo catà uno con tri posti liberi, un bel bagno pulio e un oste che balbettava ma simpatico. In realtà Wexford no l’è che la sia bela, le picenina, sporcheta e un po’ triste sinceramente parlando. Alora emo deciso de ndar a magnàr ne na pisseria ndo, pasando prima, ne parea che el profumo el fusse bon. Ghemo meso un po a ricatarla ma ghe l’emo fata. Ovio che la pissa qua no l’è che la italiana ma l’era la più bona che o magnà fin desso. Se capitè da chele bande domandì de “Robertino”. La dominica emo fato na bela colassión, evy a spasso in Irlandale me amighe le sa aventurà con un Irish Breakfast con panceta, ovi, salsicce e fonghi. Le g'a tuta la me amirassión ma mì no ghe lo fata! Visto che l’era el nostro ultimo giorno de tur dovevamo scomessiàr a riavicinarse verso nord. Emo fato un po’ de costa e a metà matinata se sen catà in un paesìn ciamà Rosslare sul mar. Che emossion vedar el mar, ma che fredo però! ( stan che vien Puglia o Sardegna butei, mi ve lo digo! Almanco par l’estate un po de caldo…). Par finìr prima de ritornàr a Dublìn emo fato sosta a Wicklow, çitadina de mar, colorata e con tanti localini carini. Pinta e pranzo lì e dopo de ritorno par le sei de sera con un po de tristessa ma… lo rifaremo presto..desso che saven che guidàr no le sto gran drama!

 


 
// Podarìa interessarte
La Rena Irlanda Redassión + Curiosità + Cultura




Pin It