Albaredo

ALBAREDO  (ALBAREDO D'ÀDIGE)
Popolassión: 5.254 Altessa: 24 metri sóra el livèl del mar
Superfice: 28,25 chilometri quadri Comùni confinanti: Belfiór, Ronco al'Àdese, Roérciàra, Bonavigo, Veronèla.

Albaredo l'è posissionà 'ndóe el progno Alpón el se buta ne l'Àdese, a 30 km diressión sud-est da la çità de Verona. El teritorio l'è stà abità con tuta probabilità fin da l'antichità, prima dai Euganei e dopo dai Atestini verso el 1000 a.C. In epoca romana dopo la batàja de Azio nel 31 a.C. contro Antonio e Cleopatra, el vitorioso Otaviàn "Augusto" el g'à dà ai soldà veterani dei teréni da spartirse, formando cossita de le colonie, come nel caso de Albaredo. L'Àdese no'l passava in 'sta zona in quél periodo ma da Cologna Veneta in diressión Montagnana-Este, 'n fato parò importantissimo l'à fato deviàr el corso del fiume verso Albaredo: la tremenda piéna con relativa "rotta della Cucca" (=Veronèla) del 17 otobre del 589 d.C. El primo documento scrito 'ndóe podémo 'édar el nome de Albaredo l'è quél del 893 d.C., che ne dise de la donassión de la "Curte de Albareto" da parte de Re Berengario I a la contessa Gisla. Tra i paroni de Albaredo da segnalàr Gioàni Vescovo de Verona che nel 1035 l'avéa comprà piassé del 30% dei teréni donà nel 1037 al Monastero Benedetin de SS.Nazàr e Celso; nel 1077 Albaredo l'éra de propietà de la casa d'Este e in 'sto periodo le tere tra l'Alpón e 'l Guà i éra sóto la giurisdissiòn del governadór de Vicensa; da Enrico d'Este la zona l'è passa nel XII secolo, come ne dise un ato de vendita, ne le mane de Crescenzio fiól de un comerciante de Verona, che l'à dà origine a la potente faméja dei Crescenzi con pién contról su Albaredo fin a l'arivo de Eselìn da Romàn. E grassie a Eselin nel XIII secolo, scomincia le lote tra i ghibelini da lu guidà e i guelfi con a capo i Sambonifacio. In che'l periodo i Trevigiani, i Vesentini e i Padovani i s'éra messi d'acordo par çercar de vìnsar su Eselin, butando zò tuto quél che gh'éra de strategico lóngo la strada verso Verona, come nel caso de Albaredo arènte a l'Àdese e de la so "Rocca de Rivalta" ('desso loc.Motta), ricostruida in poco tempo dai Crescenzi mentre tra el 1232 e 'l 1237 el castèl l'à cambià parón un fraco de 'olte fin a la so completa distrussión da parte de Eselin. Con i Scaligeri s'à 'isto un çerto svilupo de Albaredo ànca parché la popolassión l'éra stà esentà nel pagamento de le tasse, ma essendo ligà ai De la Scala gh'è tocà subir tuti i vari episodi politiçi e militari de Verona. Nel 1338 da 'ste parti jè passadi ànca i Fiorentini e i Venessiani aleadi contro Mastino II, ciavando tuto quél che se podéa ciavàr e butando sóto-sóra tuto el paese fin a la paçe del 1339. Nel 1387 dopo i Scaligeri, Albaredo l'à perso tuti i privilegi e vendù a Nicolò Bastiani mentre nel 1392 tuti i beni de Rivalta jè passadi dai Visconti a Iacopo del ponte albaredoCastèllo. Con Francesco Carrara parón de Pàdoa pochi ani dopo, se vede la nàssita su l'Àdese de un ponte fortificado e par deventàr parón de la Marca Veronese l'avéa dichiarà guera ai Visconti. L'an dopo nel 1406 jè rivadi i Venessiani che dopo avér vinto sui Carraresi i s'à imposessà de Albaredo. Sóto la Serenissima a parte el passàio de le trupe de la Lega de Cambrai e la peste nel 1630 la vita l'è andà avanti in tuta tranquilità con el costante svilupo del comercio su l'Àdese. Nel 1797 jè rivà i francesi portando casini e guere ripetude contro i austriaçi fin a la paçe del 1815. Nel 1870 l'è stà costruido un ponte par unir le do sponde de l'Àdese (fasendo parò pagar un pedagio) e fato saltà in aria nel 1945 dai todéschi in fuga ne la seconda guera mondiàl. Da segnalàr la cèsa parochiàl de Santa Maria ricostruida nel 1735 sui resti de 'na vècia cèsa del XIV secolo ma restaurada piassé 'olte nei ultimi secoli; drénto gh'è conservà 'na tela del pitór veronese Francesco Montemezzano dissepolo de Paolo Caliari "el Veronese" e 'na bèla statua in legno color oro del XV° secolo. A Cà del Sete se pól darghe n'ociada a la cèsa de Santa Lussia costruida sicuramente prima del 1480 quando l'è stà afrescà el presbiterio; tra i afreschi da segnalàr quei del XV secolo con la "Madonna in trono allattante bimbo", " Madonna in trono tra i SS. Giacòmo e Caterina", "Madonna in trono tra i SS. Antonio Abate e Rocco" e "San Rocco". Tra le vile da 'édar Vila Perosini-Fontana in stile rinassimentàl e con linee neoclassiche, Vila Serego-Rinaldi in località Becasieta de Coriàn conossuda fin dai tempi dei Scaligeri parché Antonio de la Scala el ghe l'avéa regalà nel 1382 al so capitàn generàl Cortesia Serego, Vila Colombaron-Rocca a Rivalta antico castèl trasformà in nobile residensa.

Pin It