Arcole

ARCOLE
Popolassión: 6.191 Altessa: 27 metri sóra el livèl del mar
Superfice: 18,87 chilometri quadri Comùni confinanti: San Bonifacio, Zimèla, Veronèla, Belfiór

Comùne posissionà ne la campagna de l'est veronese e travérsà da l'Alpón. Su l'origine del nome gh'è varie ipotesi, el toponimo Àrcole podarìa derivàr da arculae sepolcri no grandi o da l'arma harcus par tiràr le frece. ànca l'origine del paese no l'è sicura, i numarosi reperti catadi durante i scavi archeologici podarìa farne pensàr de la presensa romana nel teritorio ànca se no l'è da butàr l'ipotesi de un insediamento ne l'Età del Bronso de la "çiviltà teramare" mentre el primo documento scrito su Àrcole l'è del 1075. Nel medioevo se parla de la presensa de 'na fortificassión "Castrum de Arculis" come 'ne dise el cronista Rolandino nel 1224 su i numarosi assalti de Eselìn da Romàn terminadi nel 1242 con la distrussión del castèl insieme con quél de San Bonifacio. Un documento del 1375, invéçe, ne parla de la costrussión del Palasso de Giustissia a Soave volù da Cansignorio co'' i schèi dei vintiun paese che i éra sóto la giurisdissión de Soave, tra cui ànca Àrcole. Dopo el periodo Visconteo l'è stà l'ora nel 1405 de la Serenissima in paçe e con 'n notevole svilupo economico del paese fin a l'arivo dei francesi. arcoleFamosissima nel mondo l'è la batàja de Àrcole combatù nei giorni 15-16-17 noémbre 1796 tra le trupe Napoleóniche e quéle austriache. Par ricordàr 'sto evento l'è stà posissionà nel 1810 un obelisco arènte al ponte su l'Alpón 'ndóe Napoleón l'à combatù e vénso la batàja, sensa desméntegàrse che a Parigi su l'Arco de Trionfo gh'è scolpido el nome de Àrcole. Par ci vól aprofondir l'argomento el pól far 'na visita al Museo Napoleónico de Àrcole. Da 'édar in paese gh'è Palasso Ottolini del XVII secolo con pòrtego a quindese archi con sóra dei bei mascaròni, Vila Malaspina-Pellegrini "la Decima" 'ndóe un tempo se pagava le Decime (tasse) ricostruida nel 1563 sui resti de n'altra costrussión, mentre, arènte gh'è "l'Arco dei Croati" fato con i quarèi nel '400. Ne la frassión Alzana gh'è la céseta del XII secolo de Santa Maria arènte a l'Alpón, documentà fin dal 1199, che la se presenta con 'na bèla fassàda in stile rinassimentàl e campanìl a forma de toreta de l'800. Drénto se pól amiràr du bei afreschi, "La Madona col Butìn" ritegnù miracoloso e la "Pietà". Poco distante da la cèsa se pól far 'na visita al Museo de la çiviltà contadina con vèce atressadura agricole e reperti interessanti de un tempo. E par ci ghe piase el vin, magari pól béarse un bèl gòto de Àrcole D.O.C. in una de le so forme, Bianco, Rosso, Sciardonè (Chardonnay), Pinot Bianco, Pinot Griso, Garganega, Novèl, Cabernet, Merlot e Cabernet Savignon (Sauvignon) a la nostra salute! Foto: Obelisco che ricorda la batàja Napoleónica del 1796  


Pin It