Bevilaqua

BEVILAQUA (Bevilacqua)
Popolassión: 1.758 Altessa: 14 metri sóra el livèl del mar
Superfice: 12,20 chilometri quadri Comùni confinanti: Terasso (Terrazzo), Boschi Sant'Ana, Minerbe, Montagnana PD, Urbana PD.

Comùne de la bassa veronese a 46 chilometri da Verona con la so frassión Marega. In località Castèleto l'è nato l'antico çentro de Bevilaqua ai tempi de romani, 'ndóe ghe passava la "Strada Vicinalis" che la univa Ostiglia a Este. Prima de la famosa "Rotta della Cucca" (antico nome de Veronèla) del 19 otobre 589 d.C., l'Àdese el travérsàva el Comùne de Bevilaqua. Nei secoli sucessivi l'à subido un mucio de invasioni barbariche catandose el più de le 'olte in mèso a le batàje come quèla tra veronesi e padovani nel 1142 par el "dirito de cadéna", così nel 1336, bevilaquaGuglielmo Bevilacqua par conto dei Scaligeri l'à costruido 'n castèl-fortessa par difendarse dai Cararesi e dai Estensi. La faméja Bevilacqua che l'à dato el nome al paese l'éra de origine trentina e par èssar precisi de Ala, 'ndóe i éra brai comercianti de legna. A Verona, Guglielmo a la corte de Mastino de la Scala, el godea de una discreta fama tanto da ricevar l'investidura de Vassal del Vescovo, mentre so fiól Francesco, che l'à terminado el castèl, l'éra un ambassador tra i più famosi de l'epoca. El castél che durante la Lega de Cambrai l'è stà roinà, el vien trasformado da l'architeto Sanmicheli nel 1532 in vila, mentre nel 1756 Gaetano Ippolito Bevilacqua l'à restaurado l'interno, ma nel 1848 i austriaçi i g'à tacà fogo. Restaurado diese ani dopo da Felicita B., el vien trasformado in casa de riposo nel 1933 e ocupà dai todéschi ne la seconda guera mondiàl. Ma le rogne par sto castèl no jè finide. Nel 1966 a l'interno, l'è s-ciopà 'na caldaia (a l'epoca gh'éra un colegio dei Salesiani) brusando tuto da nóvo. Dopo èssar stà lassado al sò destin, dal 1990 grassie ai Cerato, el pól èssar ancora amirà nel so splendór. Da 'édar l'è la ceséta de San Pierin con dipinti del '300-'400 con fondamenta romane, anticamente pieve de un abitado ciamà Porto. Foto: El Castél 


Pin It