Castèlnovo

CASTELNOVO (Castèlnuovo del Garda)
Popolassión: 13.214 Altessa: 130 metri sóra el livèl del mar
Superfice: 34,43 chilometri quadri Comùni confinanti: Lasise, Bussolengo, Sona, Valéso (Valeggio sul Mincio), Peschiera del Garda.

Le origini del paese le se perde ne la note dei tempi, basta pensàr ai ossi, selci e freçe catade ne la frassión de Ronchi o a la scoerta sucessive come le fondamenta de 'n vècio castèl forse de l'ano mile. Castèlnóvo l'è caraterisado da la presensa de la tór con orolojo posissionada su l'antica roca, resto del castèl costruido a la fine del XIV secolo da Giangaleazzo Visconti e butà zò nel 1530 e da la cèsa parochiàl de Santa Maria con campanìl romanico. El comune comprende le frassioni de Cavalcasele con le contrade con Albara, Burlin, Camalavicina, Palù e Zuccotti, Sandrà con Volperara, Oliosi con Campagnarossa, Mischi, Mangabia, Valcerea, Zénati e infine Ronchi. Nel teritorio comunàl podémo ricordàr Vila Rizzini-Salvelli in çentro paese con un bèl parco intorno, Villa Ridolfi Sella con una magnifica lòsa formada da numerose colonete e una meridiana afiancada da una masìsa colombara, Vila Mosconi a Sandrà e Vila Arvedi d'Emilei a Cavalcasele. In questa frassión sul col de San Lorenso, Re Carlo Alberto l'osservava le manovre e le strategie durante le guere d'Indipendensa. no molto lontàn podémo notàr la presensa de la céseta de la Madona dei Angeli con un ex-convento e un tempieto dedicado a San Lorenso. Nel çentro de Cavalcasele gh'è la cèsa dei Santi Filipo e Giacòmo mentre ne la frassión de Sandrà gh'è la céseta de San Martìn messa ai passi del poro limon e infine la cèsa de Sant'Andrea con al'interno una stupenda pala del Brusasorzi. Ne la frassión de Oliosi gh'è la cesa de la Madonna dei Angeli, con afreschi datadi 1434 e dove ogni tersa dominica de noémbre gh'è la Fiera del bestiame. Storicamente la prima grande distrussión del paese l'è stà a opera de Federico Barbarossa. L'imperadór l'a combatudo contri i Veronesi a Vaccaldo (vissin a Vigasi) dopo éssar stà a Roma e obligà a passàr l'inverno a Isola de la Scala, el vólea tornar in Germania passando par Verona. A quél pónto i Veronesi insieme con Milanesi i voléa farghe atravérsar l'Àdese a Ponton, ma el Barbarossa informado da de le spie l'à sconfito in questa località le trupe nemiche che nel fratempo le s'éra rinforsà con i padoani. Infufà come 'na bestia Federico l'a dato l'ordine de métar a fero e fogo i 22 castèi tra l'Àdese e 'l lago de Garda, tra questi ànca quél de Castèlnóvo. Nei XVII secolo l'à costruido la strada che del Sud Tirolo passando par Cerain, Ponton e Castèlnóvo la portava a Mantova, denominada "dei Barbari". Questo comune, importante dal pónto de 'ista strategico, l'è stà un grande testimone de eventi storici come a esempio nel 1509 quando i francesi de Luigi XII, mentre durante el periodo dela Liga Santa, par tegnér libaro el terén par la difesa, al paese de Castèlnóvo ghe stà imposto de taiàr tute le piante intorno al paese. Nel 1626 el doge de Venessia el confermava el Vicariato a Castèlnòo, con dirito de jurisdission fin a 10 lire veronesi, mentre el conte Alvise Cossali el podéa giudicar cause tra le 10 e le 100 lire. Sensa contàr la peste del 1630 che l'a fato comparsa ànca da ste parti grassie a le trupe imperiali comandade da Collalto. Da segnalàr che nel 1780 el sindaco de Peschiera l'à dimandà al Podestà de Verona de inglobar Castèlnóvo, ma nel 1781 tri ambassadori del paese, contro el Senato de Venessia jè riussidi a no far realisar sto progeto. no podéa mancàr Napoleón vinsidor su i Austriaci ne la batàja de Castèlnóvo. Questo paese l'è stà teatro ànca de le saguinose guere de indipendensa infati el catava justo justo in mèso al famoso "quadrilatero". I austriaci al comando del generàl Principe Thurn und Taxis par vendicarse de l'ocupassion del paese da parte de diversi volontari con a capo Luciano Manara, dovuda al rifornimento de munissioni e altri 450 òmini del Di Noaro, jà brusado el paese massacrando done, òmini e buteleti. Sucessivamente ne la seconda guera de indipendensa con al comando Alberto d'Asburgo i s'a acampado otantamila soldà austriaçi intorno al paese dopo èssar scapadi da Solferin. A Sandrà, el 28 april del 1848 ghe stada la batàjatra la Brigata Savona contro i Austriaci comandadi dal generàl Wohlgmut e ànca la carica del magior Lamarmora contro du' squadroni de ussari (ungheresi). Mentre a Oliosi ne la seconda guera de indipendensa, quaranta italiani del 44° fanteria con a capo Benati jè riussidi a difendarse da un batajon de Ulani.


Pin It