Zarèa

ZARÈA -SERÈA - ZERÈA (Cerea)
Popolassión: 16.529 Altessa: 18 metri sóra el livèl del mar
Superfice: 70,30 chilometri quadri Comùni confinanti: Concamarise, Casaleón, Sanguinè, Bovolón, San Piéro de Morubio, Angiari, Legnago, Melara RO, Bergantino RO

Zerea l'è uno dei piassé importanti comuni de la Bassa Veronese con le frassioni San Vito, Cherubine, Frescà, Aselogna, Sparè (Asparetto), Barbere, Palesela e Santa Teresa in Val. Le origini de 'sto comun jè preistoriche come pól dimostrarne i reperti de l'Età del Bronso, come la capana catà a le Morandine e 'l vilaio su bèn quatordese etari in località Castèl che secondo la fantasia popolar sarìa identificabile ne la mitica çità de Carpenea. A Zerea inveçe, altri reperti come lapidi e un ara con bassorilievi de sène de caza de epoca romana, pól farne capir ancor piassé l'importansa de 'sto paese zà ne l'antichità. El toponimo el g'avù varie trasformassioni Cerete nel 923, Cereda nel 1352, Zerete nel 1413 e par che'l vegna da "Cerrus", varietà de Quercia, cha pol indicàr un bosco pien de "çerri, sèri". Tra i primi documenti scriti su Zerea g'avémo quél del 923, 'ndóe se lese che Eriprando Arcidiacono de Verona l'à concesso ai capifaméja de ricostruir el "castrum" e de finìr la costrussión del "castèl" con intorno muri e piere par poderghe abitar. Pochi ani dopo el Comùn de Verona e i conti Canossa e San Bonifacio, jè entrà in conflito con i Canonici de la Catedral de Verona par entrar in possesso de Zerea. In sto periodo se sentìa l'udor de cambiamento con la nàssita de una strutura comunàl e nomine dei podestà che sicuramente no ghe andava zò ai Canonici che i pensava a un gesto autonomista. Cossita grassie a la presensa a Gazo de Federico II i Canonici i s'à fato rilassar un diploma che'l vietava ai abitanti libere elessioni e nomine aministrative. Ma 'sti divieti no jè servidi gnente, al punto che, i Canonici, jè stà costreti a véndar i so beni el 12 dugno 1223, 'isto le numaròse ribelioni in corso, al nóvo Comùn. Nel 1233 Zerea l'è stà messa a fero e fogo da i soldà Mantoani, case e castèi in completa rovina. Dopo el Dominio de Eselìn da Romàn e dei Scaligeri jè rivà i Venessiani a l'inissio del '400; a parte un altra distrussión del paese da parte de la Lega de Cambrai nel 1509 e la ridussion del nùmaro de abitanti con la peste nel 1630, la vita sóto la Serenissima l'è andà avanti in tuta tranquilità, se vede la nàssita de numaròse vile e palassoni ànca nel çentro abitado da parte de nobili faméje. Nel 1796 finida la Republica Venessiana, l'è rivà Napoleón con i soldà e la cavaleria par combàtar contro i austriaçi. Sóto i francesi nel Regno d'Italia Napoleónico, Zerea l'à soferto un periodo bastansa bruto con numarosi episodi de delinquensa, mentre sóto i austriaçi un pochi de ani dopo, no gh'è stà particolari pericoli ma 'na costante difusion del spirito patriotico, con gran dimanda de amission dei ceretani nei grupi vólonatari contro la dominassión straniera. Dopo èssar entrà a far parte de l'Italia nel 1866 l'è scomincià 'na grande opera de bonifica ne le "Grandi Valli Veronesi" dando inissio al svilupo del paese. A l'inissio del '900 grassie al "Marangon" Bepi Merlin de Sparè che g'avù l'idea de trasformar un mobile vècio e carolà in un mobile in stil, Zerea l'è deventà la capital ne la produssion del mobile d'arte, prinçipale fonte economica del comune e in gran parte de la Bassa Veronese. Tra le cése da segnalàr la parochiàl de Zerea dedicà a San Zén e la Beata Vergine Maria del XVIII secolo costruida sóra a n'altra dopo che l'è vegnuda zò nel stesso secolo; drénto podémo 'édar sié capele con pale come Santa Lussia de l'Ugolini, La Sacra faméja del Danieli e La Madona coi Santi Zén e Dòminico del Brusasorzi e l' Ultima çena del Perotti; numaròse statue in legno o in marmo Sacro Cuore, Imacolà, San Zén, San Francesco, San Roco, San Antonio, Santa Teresa del Bambin Gesù; el fonte Batesimal l'è a destra, ai pié del'altàr maiòr: bloco unico in marmo bianco, a forma otagonal, de la seconda metà del XVI secolo; mentre fora, el campanìl l'è del '400. N'altra cèsa le quèla de la Madona del Spasimo del XVIII secolo costruida inglobando el capitel "miracoloso" de la Madona, con le donassióni de ci nel 1630 el s'à salvà da la peste. Da ricordàr la cèsa del '500 de San Vito e Modesto ne la frassión de San Vito, un tempo faséa parte de un convento de Carmelitani 'ndoè l'è stà scoerta 'n ara romana. E par finìr in belessa, la cèsa romanica de San Zén, fata costruìr nel XII secolo da Matilde de Canossa, vegnuda zò piassé 'olte l'è stà ricostruida in modo masisso a l'inissio del XX secolo; de la vécia costrussión gh'è restà dei afreschi del '300 con Santi e Madone, l'abside e un poche de colone; chi jè stà catade du lapidi funerarie de epoca romana. Tra le vile da segnalàr Vila Franco-Bertelè "El Piaton" del XVII secolo, costruida su dei teréni comprà da la faméja Franco nel XVI secolo, arènte a la cèsa de San Zén, completa de giardìn, corte, porteghi, barchesse, stale e l'oratorio de Sant'Antonio Abate del XVIII secolo con tele de Michelangelo Prunati; Vila Dionisi "Cà del Lago" del XVIII secolo con drénto afreschi de Marco Marcola e G.Montanari, arènte a 'na tór del '400, presenta un bèl parco con statue e l'oratorio de Sant'Eurosia; a Remedel gh'è Vila Guastavérza del XIX secolo in origne del '400 con arènte l' Oratorio de Sant'ana del XVII secolo. Tra i palassi da segnalàr Palasso Grigolli antica residensa dei conti òmonimi vissudi nel XIII secolo e Palasso Ormaneto. Tra i personagi famosi da segnalàr Paride da Zerea cronista veronese del XIII secolo e 'l matematico-idraulico Antonio Maria Lorgna. Par ghe piase la natura incontaminada consiliemo de far un salto a l'Oasi del Brusà.


Pin It