Costermàn

COSTERMÀN
Popolassión: 3.738 Altessa: 237 metri sóra el livèl del mar
Superfice: 16,74 chilometri quadri Comùni confinanti: Tòri del Benaco, Rìole (Rivóli Veronese), Afi, Bardolìn, San Zén de Montagna, Cavrìn, Garda.

Le prime testimonianse de la presensa de l'òmo nel teritorio de Costermàn jè da considerar risalenti a "l'Età del Bronso" come ne vien dimostrà dai reperti in ceramica e vasi biconici catadi in località Meoni, mentre ne le vicinanse de Marciaga numerose incisioni rupestri con guerieri e spade le dovarìa risalir a "l' Età del Ferro". De epoca romana jè i reperti catadi nel 1897 e a l'inissio del '900 a Valdoneghe, ne le località de Castèl, Campo de la Morte e a Ca' Nova de Albarè come un querciolo de sarcofago, na statueta de brónso e qualche toco de strassa laorada par la sepoltura. Così s'à pensà inissialmente che'l nome de Costermàn podesse derivàr da "Castro Romano", ma secondo i esperti el toponimo l'è de origini longobarde, in latin medievàl, "Costa Arimannorum" che'l fa riferimento a la presensa dei "arimanni", òmeni libari. Con la presensa a partir da l' VIII° secolo dei possedimenti in questo teritorio dei monasteri de San Colomban de Bobbio e de Santa Giulia de Bressia, se nota un çerto svilupo dei çentri de Costermàn, Marciaga, Castion e Sapora (l'atuàl Albarè). I primi documenti scriti i ne parla de la località Montegolo (XV febrar 810: "In fundo Cabrinade seu in Montecolo), o Cervinica, l'atuàl Baesse presente ne l'atestado del XV diçembre 837 mentre la prima testimoniansa scrita par Costermàn l'è su el diploma del 22 lujo 1045 de l'imperadór Enrico III in favor del Monastero de Santa Giulia 'ndóe i abitanti del "Castrum quod vocatur Novum castrum situm in Monte Rezino in vicinia Garde" jè esentadi a fornir ricovero e magnàr par i cavài dei funsionari imperiali; a metà del XII secolo dal documento "Breve recordationis de Terris Ecclesiae Sancti Columbani" vien provada l'esitensa de Sapora. Sóto el dominio scaligero, Costermàn faséa parte de la "Gardesana del'Aqua", federassión de diese comuni (Malsésen, Brensón, Pai, Tórri, Albisàn, Garda, Costermàn, Bardolìn, Sisàn e Lasise) che la gavéa compiti de repressión e de ripartissión dei oneri fiscali oltre a una larga autonomia riconossuda ànca da i dominadori sucessivi come i Visconti (1387), i Da Carrara (1404) e la Republica de Venesia fin al 1802. Sóto el governo de la Serenissima, el teritorio el godea de un periodo 'bastansa tranquilo a parte nel 1630 l'ano de la peste; e pròpio in questo ocasion che le cése de San Lorenso e de la Beata Vergine del Socorso jè stà trasformade in lazareti. Dopo el dominio Austriaco el paese el passa sóto l'Italia nel 1866. La parochia de Costermàn l'è stada costituida nel 1497 e la cesa atuàl dedicada a San Antonio Abate, l'è stà costruida nel 1850. Da segnalàr tra Virle e Marciaga el Santuario de la Madona del Socorso 'ndóe secondo tradissión el 6 setembre ai primi del XVI secolo, un pastor sordomuto l'éra guarido magnando un toco de pan che gavéa dà la Madona dopo la so aparission. La cèsa l'è a navada unica con l'altàr de destra dedicado a la Vergine del Rosario e con una pala rafigurante i Santi Antonio Abate e Nicola da Bari mentre su l'altàr de sanca gh'è una pala dei Santi Bartolomeo e Francesco con sóto la Madona con butin tra i angeli, de la Scóla del Brusasorzi. In stile baroco l'è l'altàr magior in marmo con baldachin del 1765, che conserva una taolaeta in legno dei primi del XVI sec. con rafigurado l'aparision de la Vergine al pastorel. Da visitàr tra Costermàn e Castion l'è l'antico borgo con céseta del XII secolo de San Verolo; a Marciaga la cèsa parochiàl dei Apostoli Filippo e Giacòmo l'è stà costruida su n'altra del XVI secolo. La parochia l'è stà creada nel 1541 con la separasion da la Pieve de Garda. La cèsa parochiàl de Santa Maria Madalena a Castion ultimada nel 1752, sembrarìa èssar stà costruida con un poche de piere de quèla vècia posissionada un tempo sul Monte San Michel. A l'interno gh'è conservà una tela del Brusasorzi. E sempre in questa frassión gh'è la stupenda Vila Pellegrini con giardìn a l'italiana, costruida nel 1760 modificando quèla esistente del XIV secolo. De questa ghe resta alcune lapidi del '500 e un afresco de Francesco Morone del 1492. Da segnalàr altre vile come la Torri-Giuliari de propietà dei Salesiani a Albarè, la Rizzardi-Becelli del XV secolo, la Marchi e la Ferrario. Da visitàr a Marciàga la tór otoniana del 783, la Val dei Molini scavada dal progno Tesina e par finìr el çimitero de guera todesco 'ndóe i riposa in paçe 21.951 soldà de l'ultima guera mondiàl.


Pin It